අහස් තලයේ ග්රහයන්ගේ ගමන කියන්නේ නිකම්ම නිකම් සිදුවීමක් නෙවෙයි. ඒක හරියට මහා පරිමාණ චෙස් ක්රීඩාවක් වගේ. මැයි මාසය අවසානයත් එක්ක මේ චෙස් පුවරුවේ තීරණාත්මක ඉත්තන් කිහිපදෙනෙක් එකම කොටුවකට ගොඩවෙන්න සූදානම් වෙනවා. මැයි 14 වැනිදා සිකුරුත්, 29 වැනිදා බුධත් මිථුන රාශියට පිවිසෙන්නේ දැනටමත් එතැන බලය අල්ලාගෙන ඉන්න ගුරු ග්රහයා මුණගැහෙන්නයි. මේ මහා ග්රහ හමුවීම, එහෙමත් නැත්නම් ‘ත්රිග්රහ යෝගය’, ඉදිරි සති කිහිපය ඇතුළත ලෝක දේශපාලනයේ වගේම වෙළෙඳපොළේත් ලොකු පෙරළියක් කරන්න නියමිතයි. Sri Lanka Latest News
විශේෂයෙන්ම කාලයක ඉඳන් ලෝකයම පීඩාවට පත් කරපු යුද ගැටුම් සහ ආර්ථික අර්බුද හමුවේ මේ ග්රහ සංයෝගය යම් සහනයක් අරගෙන එන බව පේන්න තියෙනවා. මේක හරියට රත්වෙලා තිබුණු යකඩයක් නිවෙන්න පටන් ගන්නවා වගේ වැඩක්. ජුනි මස 08 වැනිදා දක්වා පවතින මේ විශේෂ කාලසීමාව ඇතුළත ලෝක වෙළෙඳපොළේ අස්ථාවර බව අඩුවෙලා, යම් මට්ටමක සාමකාමී වාතාවරණයක් ගොඩනැගෙන්නට අවශ්ය පසුබිම නිර්මාණය වෙනවා.
කුම්භ ලග්නය හිමි ශ්රී ලංකා කේන්දරයේ 5 වැන්න වූ මිථුන රාශියේ තමයි මේ මහා සටන සිද්ධ වෙන්නේ. ඒ කියන්නේ රටේ අධ්යාපනය, විශේෂයෙන්ම ප්රාථමික අධ්යාපන ක්ෂේත්රයේ තිබුණු ගැටලුවලට විසඳුම් ලැබෙන කාලයක්. ඒ වගේම 5 වැන්න කියන්නේ ක්රීඩාව නියෝජනය කරන තැන. ඒ නිසා ජාත්යන්තර ක්රීඩා පිටියේ ලංකාවේ නම ඉදිරියට එන ජයග්රහණ මේ කාලයේදී අපිට අහන්න ලැබෙන්න පුළුවන්. මේ හැමදේටම වඩා සාමාන්ය මිනිස්සුන්ට දැනෙන ලොකුම දේ තමයි, අත්යවශ්ය භාණ්ඩවල මිල පාලනය වෙලා අතමිට සරු වෙන්න පටන් ගැනීම.
ඔබ මිථුන හෝ කන්යා ලග්න හිමියෙක් නම්, මේක ඔබේ කාලයයි. විශේෂයෙන්ම ඔබ දැනට ගෙවන්නේ බුධ හෝ සිකුරුගේ දශා කාලයක් නම්, වෘත්තීය ජීවිතයේ වගේම පෞද්ගලික ජීවිතයේත් නොසිතූ වාසනාවන් ඔබට ළඟා වෙන්න පුළුවන්. ඔබේ දක්ෂතා හඳුනාගෙන අධ්යාපන හෝ රැකියා කටයුතුවලින් උපරිම ඵල නෙළාගන්න මේක හොඳම අවස්ථාවක්.
මේ වාසනාව තව තවත් තහවුරු කරගන්න සරලව කළ හැකි වත්පිළිවෙත් කිහිපයක් තියෙනවා. බදාදා දිනයක බුධ හෝරාවෙන් ළා කොළ පැහැති වස්ත්රයකින් සැරසී විෂ්ණු හෝ ගණ දෙවියන් වන්දනා කිරීමත්, සිකුරාදා දිනයක සිකුරු හෝරාවෙන් සුදු මිශ්ර වර්ණ ඇඳුමකින් සැරසී පත්තිනි මෑණියන් හෝ සරස්වතී මෑණියන් උදෙසා වත්පිළිවෙත් කිරීමත් තුළින් මේ විශ්ව ශක්තිය ඔබේ ජීවිතයට සාර්ථකත්වය රැගෙන එනු ඇති.
ජ්යොතිෂවේදී ඔස්මන් පෙරේරා
