ජ්යොතිෂය ගැන කතා කරද්දී ලෝකේ ඉන්න දරුණුම දඬුවම් දෙන විනිසුරුවරයා තමයි සෙනසුරු. සෙනසුරු මහ දසාවක් ලැබුවා කිව්වම හෝ ඒරාෂ්ටකයක් ලබනවා කිව්වම හුඟක් අය ගැහෙන්න ගන්නවා. ඇයි ඉතින් සෙනසුරු කියන්නේ නිකන්ම නිකන් ග්රහයෙක් නෙවෙයි, අපි ගිය ආත්මවල කරපු පින් පවු මේ ආත්මෙදි මතක කරලා දෙන කෙනානේ.Sri Lanka Latest News
සෙනසුරුගේ මහ දසාව අවුරුදු 19ක් තියෙනවා. ඒ කාලේ ඇතුළත කොහොමටත් මුල් අවුරුදු තුන සෙනසුරුගේම අතුරු දසාව නිසා ටිකක් තදට බලපානවා. හැබැයි ඉතින් බය වෙලා වැඩක් නැහැ, අපේ මුතුන් මිත්තෝ මේවාට නියම ශාන්ති කර්ම කරලා අපලවල බලය බින්දා.
භූත විද්යාවෙන් සහ බලි ශාන්ති කර්මයෙන් එන සහනය
භූත විද්යාවේ හැටියට සෙනසුරු දසාවේදී අපිට කරදර කරන්නේ අවර යක්ෂයා සහ අවරගිරි යක්ෂණිය. මේවායින් බේරෙන්න නම් විෂ්ණු දෙවියන්ගේත්, ආඩි තෙලිඟු භෛරව දෙවියන්ගේත් පිහිට පතන්න ඕනේ. ඒ වගේම ඉස්සර කාලේ බලි ශාන්ති කර්ම කළා. දස ක්රෝධ බලිය, නිළඟ රාක්ෂ බලිය, ගෞඩි රාක්ෂ බලිය වගේ දේවල් අද අභාවයට ගියත්, ඒ ඇතුළේ තිබ්බේ මහා ශක්තියක්.
ගෙදරදීම කරගන්න පුළුවන් වත්පිළිවෙත්
ඔබට පුළුවන් ඖෂධීය ස්නානයකින් මේ අපල ගතිය අඩු කරගන්න. කළුතල, අංජන කැට, බැවිල, ලොත් සුඹුළු, වීපොරි, සතකුප්ප වගේ ඖෂධ තම්බපු වතුරෙන් නාලා බලන්නකෝ ඇඟට දැනෙන සැහැල්ලුව.
ඊළඟ වැදගත්ම දේ තමයි බෝධි පූජා. සෙනසුරාදා දවසක නිල් පාට මල්, තලතෙල් හෝ අබ තෙල් පහන්, නිල් කොඩි පූජා කරලා තුනුරුවන්ට පින් දෙන්න. සෙනසුරුගේ ප්රියතම ගස වෙන්නේ නුග ගස. නුග ගසකට කිරි පැණි වත් කරලා, ගස ස්පර්ශ කරලා සාත්තු කරන එකත් සෙනසුරුගේ හිත උණු කරන වැඩක්.
දාන මාන සහ සත්කාර
සෙනසුරාට අල්ලස් දෙන්න හොඳම විදිහ තමයි දානය. හැබැයි කාටද දෙන්න ඕනේ?
වයස්ගත යාචකයන්ට, අංගවිකල අයට බත් පැන් දෙන්න. විශේෂයෙන්ම කකුලක් ආබාධිත කෙනෙක්ට සෙනසුරාදා උදේක වෑංජන එක්ක කැකුළු බත් වේලක් දෙන්න. සෙනසුරාදා අලුයම කපුටන්ට ගිතෙල් මිශ්ර කිරිබත් දෙන්න. කපුටා කියන්නේ සෙනසුරුගේ වාහනයනේ, ඉතින් වාහනයට සංග්රහ කරාම අයිතිකාරයාගේ හිත උණු වෙනවා.
මන්ත්ර බලයෙන් වින කරදර දුරු කරමු
ඔබට පුළුවන් නුග ගසක් මුල පුදසුනක් හදලා කොල්ලු, නිල් මල්, තලතෙල්, රනින් කරපු මීගොන් රූපයක්, නිල් රෙද්දක් වගේ දේවල් තියලා සෙනසුරු හෝරාවෙන් මේ ස්තෝත්රය 9 වතාවක් කියන්න.
නීලාංජන සමාහාසං – රවි පුත්රං යමාග්රජං
ඡයා මාර්තන්ඩ සංභූතං – තං නමාමි ශනෛශ්වරම්
උදේ හවස මේක කියනකොට සෙනසුරුගේ සැර බාල වෙනවා සිකුරුයි.
යන්ත්ර පැලඳීම සහ ප්රවේශම් විය යුතු දේ…
අපල ගොඩක් තදයි නම් නීල මණ්ඩලය, ශනි මෘතුංජය වගේ යන්ත්රයක් ඊයම් පතක ලියලා 1900 වතාවක් හෝ 19000 වතාවක් ජීවම් කරලා පලඳින්න. හැබැයි එකක් මතක තියාගන්න, සෙනසුරු අපල කාලෙට නිල් පාට ඇඳුම් අඳින එක අඩු කරන්න. ඒ වගේම නිල් මැණික් වගේ ගල් පලඳින්න යන්න එපා, ඒකෙන් වෙන්නේ අපලේ වැඩි වෙන එක.
මතක තියාගන්න, මේ හැම දේකටම වඩා ලොකුම ශාන්ති කර්මය තමයි තමන්ගේ අම්මා තාත්තට සලකන එක, ගිලනුන්ට උදවු කරන එක සහ සිල් රකින එක. ඒ ටික හරියට කරන මනුස්සයාට සෙනසුරු නෙවෙයි මොන අපලේ ආවත් හොල්ලන්න බැහැ.
ජ්යොතිෂවේදී ඔස්මන් පෙරේරා
