ජූලි 28 ඉරිදා සිට අගෝස්තු 03 වැනි සෙනසුරාදා දක්වා ඔබට මොකද වෙන්නෙ?

මේෂ ලග්නය : හිතුවක්කාර ගති
ලග්නාධිපති කුජ හතර වැන්නේද, සඳු 2, 3, 4, 5 භාව හරහාද ගමන් ගනී. මේ සතිය තුළදී ඔබට වෙනදාට වඩා හිතුවක්කාර ගති ඇති වී තමන්ගේ අදහසටම අනුව කටයුතු කරන බවක් පෙනේ. සමීපව ඇසුරු කළ ඥාතීන්ගෙන්, මිතුරන්ගෙන් දුරස්ව, තනිවම වැඩකටයුතු කරගෙන යෑමෙන් නොයෙකුත් පාඩු විඳීමට සිදුවෙයි. තමන්ගේ උත්සාහයේ නියම ප්‍රතිඵල අනුන් භුක්ති විඳින කාලයකි. නහර පිළිබඳ රෝගයක් ඇති වීමට ඉඩ තිබේ. ආදායම් තත්ත්වය පහළ යයි.
ජය අංකය : 4, ජය වර්ණය : රන්වන් පාට
වෘෂභ ලග්නය : සහෝදර සබඳතා
සහෝදර සහෝදරියන් සමඟ එක්ව සතුටු වීමට අවස්ථාවක් ලැබෙන අතර, සඳු 1, 2, 3, 4 භාව හරහාද, ලග්නාධිපති සිකුරු තුන් වැන්නේද ගමන් ගනී. මුදල් තත්ත්වය එතරම් යහපත් නොවන සතියකි. සෙම් රෝගයක් නිසා ප්‍රතිකාර ගැනීමටද සිදුවිය හැකිය. විදේශයක සිට පැමිණි ඥාතියකුගෙන් විශේෂ උපකාරයක් ලබා ගැනීමට ඔබට මෙ කාලය තුළදී හැකි වන අතර, විදෙස් ගමනක් ගැන සිතුවිලි පහළ වෙයි. ඉගෙනීමේ කටයුතුවල නිරත වෘෂභ ලග්න හිමියන්ට නොයෙකුත් බාධක ඇති වෙයි.
ජය අංකය : 3, ජය වර්ණය : කොළ පාට
මිථුන ලග්නය : වැරදි මඟ පෙන්වීමක්
ඔබ මේ සතිය තුළදී බුද්ධියෙන් අඩු කෙනකුගේ වැරදි මඟ පෙන්වීමකට අනුව කටයුතු කර විශාල පාඩුවක් කර ගන්නා අතර, ලග්නාධිපති බුධ 1, 2 භාව හරහාද, සඳු 12, 1, 2, 3 භාව හරහාද ගමන් ගනී. එදිනෙදා වැඩකටයුතුවලට බාධක එල්ල වෙයි. ප්‍රමාණය ඉක්මවා කල්පනා කිරීම නිසාම හිසට බර ගතියක් දැනේ. නරක මිතුරන් ඇසුරට ලැබෙන අතර, වියදම් පැත්ත වැඩි වන සතියකි. ඥාතියකු සමඟ සුළු අමනාපයක් ඇතිකර ගනී.
ජය අංකය : 1, ජය වර්ණය : නිල් පාට
කටක ලග්නය : සැප පහසුව
මේ සතිය තුළදී ඔබගේ ලග්නාධිපති සඳු 11, 12, 1, 2 භාව හරහා ගමන් ගැනීමෙන් සිතට සැනසීම, ශරීරයට සැප පහසුව ඇතිව කාලය ගෙවී යයි. පින්දහම් කිරීමට යොමුවෙයි. හිතවතකු තමන් වෙනුවෙන් පිළියෙළ කරන ලද සංග්‍රහයක් භුක්ති විඳීමට අවස්ථාව සැලසේ. අලුත් ඇඳුම් – පැලඳුම්, ආභරණ ආදිය මිලදී ගනී. පදිංචි නිවෙස පිරිසුදු කර අවශ්‍ය අලුත්වැඩියා කටයුතු කිරීමට පෙළඹෙන කාලයකි. ශරීර සෞඛ්‍ය යහපත්ව පවතී.
ජය අංකය : 2, ජය වර්ණය : කහ පාට
සිංහ ලග්නය : නිෂ්ඵල වියදම්
ඔබගේ ලග්නාධිපති රවි 12 වැන්නේ ගමන් කිරීමත්, සහ සඳු 10, 11, 12, 1 භාව හරහා ගමන් කිරීමෙන් මේ සතිය තුළදී ඔබට නිෂ්ඵල ලෙස මුදල් වියදම් කිරීමට සිදුවෙයි. මහත් බලාපොරොත්තු ඇතිව කරන වැඩක් අතරමඟ අතහැර දැමීමට සිදුවෙයි. ගෘහ ජීවිතයේ සතුට, සාමයද අඩු වී යන කාලයකි. දරුවන් වෙනුවෙන් වෙනදාට වඩා වෙහෙසී වැඩ කරන සතියකි. යටපත්ව තිබුණු අසනීපයක් නැවත මතු වීමට ඉඩ ඇත.
ජය අංකය : 3, ජය වර්ණය : කොළ පාට
කන්‍යා ලග්නය : ධන ලාභ
ඔබට මේ සතිය තුළදී ධන ලාභයක් ලැබෙන අතර, ලග්නාධිපති බුධ 10, 11 භාව හරහාද, සඳු 9, 10, 11, 12 භාව හරහාද ගමන්ගනී. ආදායම් තත්ත්වය යහපත් අතට හැරී අනාගත දියුණුව සඳහා අලුත් ආයෝජනයකට පෙළඹෙයි. ගෘහ ජීවිතය සාමකාමී වන අතර, දරුවන්ගේ ජයග්‍රහණ දැක සතුටු වීමට අවස්ථාව ලැබේ. කලකින් නුදුටු ඥාතියකු ඔබ හමුවට පැමිණ උපකාරයක් ලබාගනී. උණ රෝග, සෙම් රෝග මතු විය හැකියි.
ජය අංකය : 2, ජය වර්ණය : කහ පාට
තුලා ලග්නය : අසමඟිකම්
අඹු-සැමියන් අතරද, ඇසුරු කරන අය අතරද, අසමගිකම් පැනනඟින සතියකි. සඳු 8, 9, 10, 11 භාව හරහා ගමන් ගන්නා අතර, ලග්නාධිපති සිකුරු 10 වැන්නේය. ව්‍යාපාර කටයුතුවල යෙදී සිටින තුලා ලග්න හිමියන්ට ආදායම ඉහළ යන සතියකි. සමාජය තුළ තමන්ගේ තත්ත්වය උසස් වන අතර, අනවශ්‍ය ලෙස මුදල් වියදම් වන කාලයකි. කලක් පැවති රෝගයක් සුවවෙයි.
ජය අංකය : 1, ජය වර්ණය : දම් පාට
වෘශ්චික ලග්නය : අවිවේකී සතියක්
සඳු 7, 8, 9, 10 භාව ස්ථාන හරහාද, ලග්නාධිපති කුජ පුණ්‍යස්ථානය වන නව වැන්නේද ගමන් ගනිමින් සතිය ගෙවී යයි. රැකියාවේ, ව්‍යාපාරයේ වගකීම් මෙන්ම ගෙදර-දොර යුතුකම් කිහිපයක්ද එකවර ඉටුකරමින් කාර්යබහුල ලෙස අවිවේකීව කාලය ගෙවී යයි. අතමිට යහමින් මුදල් ගැවසෙයි. වැඩකටයුතු කලට වේලාවට ඉටුකර ගැනීමට අවශ්‍ය පහසුකම් නොඅඩුව ලැබේ. සති අන්තයේ දුරබැහැර ගමනක් යෙදේ.
ජය අංකය : 9, ජය වර්ණය : රතු පාට
ධනු ලග්නය : විදේස ගමනක්
ලග්නාධිපති ගුරු වැයස්ථානය වන 12 වැන්නේද, සඳු 6, 7, 8, 9 භාව හරහාද ගමන් ගනිමින් ගෙවී යන මේ සතිය ඔබට තරමක් වියදම් අධික වෙයි. විදෙස් ගමනක් බලාපොරොත්තුවෙන් සිටි ධනු ලග්න හිමියන්ට එම අදහස ඉටුවෙයි. දරු ශිෂ්‍යයන් ඇති අයට ඔවුන්ගේ මුරණ්ඩුකම් දැක කනස්සල්ලට පත්වීමට සිදුවිය හැකිය. ගෘහ ජීවිතය කරදර සහිත වන අතර, ශරීර සෞඛ්‍යයද එතරම් යහපත් නොවේ.
ජය අංකය : 3, ජය වර්ණය : නිල් පාට
මකර ලග්නය : වැරදි සිතුවිලි
සඳු 5, 6, 7, 8 භාව හරහාද, ලග්නාධිපති ශනි වැයස්ථානය වන 12 වැන්නේද ගමන් කරයි. ඔබට මේ සතිය තුළදී ඇති වන ආර්ථික අපහසුතා නිසා වැරදි ක්‍රමවලින් මුදල් උපයා ගැනීමට වැරදි සිතුවිලි පහළ විය හැකියි. වැරදි සිතුවිලි ක්‍රියාත්මක කළහොත් නීතියේ රැහැනට හසුවීම අනිවාර්ය වෙයි. ප්‍රවේසම් වන්න. අසල්වැසියන් සමඟ ඇති වන මතභේද දුරදිග යාහැකි සතියකි.
ජය අංකය : 3, ජය වර්ණය : කහ පාට
කුම්භ ලග්නය : නිදහස
නිදහසේ සිටීමට ලැබෙන සතියකි. ලග්නාධිපති ශනි අයස්ථානය වන 11 වැන්නේද, සඳු 4, 5, 6, 7 භාව හරහාද ගමන් ගනියි. කුඩා ළමයින් ගැන විශේෂ අවධානය යොමුවී ඔවුන්ට අවශ්‍ය දේ සැපයීමට උනන්දුවක් දක්වයි. ශාස්ත්‍රීය කටයුතුවලට යොමුවන අතර, සතිය පුරාම තැනින් තැන ගොස් පුණ්‍ය කටයුතුවල යෙදේ. රුධිර පීඩනය වැඩි වීමේ අවදානමක් පවතින බැවින් කල්පනාකාරී වන්න.
ජය අංකය : 2, ජය වර්ණය : නිල් පාට
මීන ලග්නය : අසනීප තත්ත්වයක්
ඔබගේ ලග්නාධිපති ගුරු නව වැන්නේද, සඳු 3, 4, 5, 6 භාව හරහාද ගමන් ගනිමින් සතිය ගෙවී යයි. රුධිර රෝගයක් හෝ බෝවන රෝගයක් නිසා ඔබට රෝහල්ගතව ප්‍රතිකාර ලැබීමටද සිදුවිය හැකි සතියකි. ඔබ බෙහෙවින් උදව් කළ ඳාතියකුගෙන් ඔබට ආදර සංග්‍රහ නොඅඩුව ලැබේ. ඉගෙනීමේ කටයුතුවල යෙදී සිටින මීන ලග්න හිමියන්ට අලුත් අලුත් අංශවලට යොමුවී සාර්ථක ප්‍රතිඵල ලබාගැනීමට හැකිවෙයි.
ජය අංකය : 9, ජය වර්ණය : ලා නිල් පාට
ජ්‍යොතිෂ විද්‍යා විශාරද, ජ්‍යොතිෂ ශීරෝමනී,
දේශබන්දු අගලවත්තේ චන්දන වීරක්කොඩි