කලා ලෝකයේ කවුරුත් දන්න තරු රැසක් මේ වෙද්දි ලේලීලාගේ, බෑණලාගේ ආදරය, ගෞරවය ලබන්නට වාසනාවන්ත වෙලා. ඉතින් අපිට හිතුණා මේ කාරණාව ගැන කලා ලෝකේ ජනප්රිය නැන්දම්මලාගෙන් අහලා බලන්න. ඒ අනුව අපි කිහිප දෙනකුටම කතා කළා. බලන්නකෝ තරු නැන්දම්මලා තම ලේලිලා, බෑණලා ගැන කියන්නෙ මොනවද කියලා.
එයා බෑණා කෙනෙක් නෙමෙයි අපේම පුතෙක්
සුසන්තා චන්ද්රමාලි
මගේ දුව රටම දන්න මැණිකක්. ඉතින් මගේ දුව බැඳලා අවුරුද්දක් ගතවුණා. හැබැයි වසරක් ගතවුණා කියන එක මට ලොකු කාලයක් නෙමේ. මොකද තිසුරිත්, පුතාත් පොඩි කාලේ ඉඳලම එකට හැදුණු වැඩුණු අය. එයාගේ මවුපියන් පවා අපි සමඟ හොඳට හිතවත්. ඉතින් පුතාගේ ගතිපැවතුම් ගැන ඒ පුතා පොඩි කාලේ ඉඳලම මම දන්නවා. අපේ පවුලේ අයත් එක්ක ළගින්ම ඇසුරු කළ පිරිසක් තමයි ඒ පුතාලා.
ඉතින් දුවට ගැළපෙන හොඳ දරුවෙක් ලැබුණා. පුතා අපිට බෑණා කෙනෙක් නෙමේ අපේම දරුවෙක්. මම දුවව ඇස් දෙක වගේ බලාගත්තේ. ඇයට දක්වපු ආදරය, සෙනෙහස පුතා දැක්කා. ඉතින් මම බලාගත්තාටත් වඩා මගේ දුවව හොඳට බලාගන්නවා. එයයි මගේ සතුට. මම ප්රාර්ථනා කළේ මගේ ඇස් දෙක පියවෙන්න කලින් මගේ දුවට හොඳ සැමියෙක් ලැබෙන්න කියලා.
ඉතින් මගේ හැම බලාපොරොත්තුවක්ම ඉටුවෙලා මම ඉන්නේ ගොඩක් සතුටින්. ජීවිතය කියන්නේ අමුතු දෙයක්. අද ඉන්න කෙනා නෙමේ හෙට ඉන්නේ. මේ හැම දේම සිදුවෙන්නේ අපේ දෛවය අනුව තමයි. ඉතින් මගේ දුවට හොඳ සැමියෙක් ලැබුණා. අපේ පවුලට තවත් පුතෙක් ලැබුණා. මම හිතන්නේ පුතා දෙවියන් අපට දුන්න තෑග්ගක් කියලා. මගේ දරුවන් දෙන්නාව හැමදාමත් සතුටින් තියන්න කියලා මම හැමදාමත් ප්රාර්ථනා කරනවා.
එයා මගේම දරුවෙක් වගේ
කුසුම් රේණු
කලා ක්ෂේත්රයටම තවත් ආදර්ශයක් වුණු කැදැල්ලක් තමයි ශ්රියන්ත මෙන්ඩිස්ගේ කැදැල්ල. ඉතින් මේ කැදැල්ලේ පුංචි කිරිල්ලියො දෙන්නෙක් ආදරණීය මවුපියන් යටතේ හැදී වැඩී උස්මහත් වුණා. ඉතින් ශ්රියන්තගේ ලොකු දුව බැඳලා කාලයක් ගෙවුණත් පුතකුගේ අඩුව පුරවපු ශාන් ගැන කුසුම් කතා කළේ හරියට ඔහුගේ දරුවකු මෙන්ය. අපේ ගෙදර ගැහුනු ළමයිම ඉන්න පවුලක්. මගේ දුවලා දෙන්නව අපි හොඳට හැදුවා. ඉතින් ලොකු දුව බැඳපු පුතා මගේ ගෙදර මගේම දරුවෙක් වුණා. මගේ දරුවන්ට පියෙක් වගේ හොඳ සැමියෙක් වුණා. මට එය ලොකු සතුටක්. පස්සේ මමත් වගකීම්වලින් නිදහස් වුණා. ඔහු අපට ශක්තියක් වුණා. පුතාගේ වැඩත්, ගෙදර වැඩත් සමබර කරගෙන දරුවන් සමග ලස්සනට ජීවත් වෙනවා දකිනකොට අපිට ඉතින් එයට වඩා සතුටක් නෑ.
මට ගොඩක් ආදරෙයි
මානෙල් වානගුරු
මගේ පොඩි පුතා හරිම සංවේදී පාඩුවෙ ඉන්න කෙනෙක්. කවදාවත් හිතුවක්කාර වැඩක් කරන්නේ නැහැ. ගෙදර හුරතලේටම හැදුණා. ඉතින් පුතා යාළුවෙලා අවුරුදු හතරක් විතර වෙනවා. දුලාංජලී දුව විදේශගතවෙලා ඉඳලා මගේ උපන්දිනයට මල් කළඹක් සමඟ කේක් එකක් එවලා තිබුණා. පුතා තමයි මට කිව්වේ අම්මේ මම යාළුවෙලා ඉන්න කෙනා එවලා තියෙන්නේ අකමැත්තක් නැත්නම් කතා කරලා බලන්න කියලා. දුලංජලී දුව අවුරුදු 28ක් විතර එංගලන්තයේ හිටියේ. ඉතින් මම බලාපොරොත්තු වුණ දුවෙක් මට ලැබුණා. මගේ පුතාව ඇස්දෙක වගේ බලාගන්න බව මට විශ්වාසයි. ඒ වගේම මමත් ආදරෙයි. ඉතින් දුව එක්ක වැඩි කාලයක් අපිට ඉන්න වෙන්නෑ. එයාලා විදේශගත වෙනවා. පොඩි පුතාට හොඳ දුවෙක් ලැබුණ වගේම ලොකු පුතාටත් හොඳ දුවෙක් ලැබෙනකම් බලාගෙන ඉන්නවා.
වඳින්න පුළුවන් නම්
මමත් වඳිනවා
කුමාරි මුණසිංහ
ජැක්සනුත් මමත් ආදරේ කරලා බැන්දේ. අපේ ආදරය ඉතාමත් සුන්දරව ගතකළා. මුල ඉඳලම පවුල කියන පසුබිමට අපි දෙන්න විශේෂත්වයක් දැක්වූවා. ඉතින් අපි දරුවෝ හැදුවා. දරුවන්ටත් අපි හොඳ දේ කියලා දුන්නා. ඉතින් අපි හැමෝගෙම පුදුමාකාර බැඳීමක් තිබුණේ.
තුන්දෙනාම බඳින්න කාලය එළැඹෙන වයස ළංවෙද්දිත් අපි දේපොළ බැලුවෙ නැහැ. බැලුවේ උගත්කම වගේම ඒ පවුල් එක්ක ඒ දරුවන් තියෙන සම්බන්ධතාවයයි. ඇත්තටම අපේ පවුලට ගැළපෙන ලේලිලා දෙන්නෙකුයි, මට බෑණෙකුයි ලැබුණා. දැන් මම දරුවෝ හයදෙනෙක්ගෙ අම්මා කෙනෙක්. ඒ දැනෙන සතුට මට කියන්න වචන නැහැ. ඒ දරුවන්ගේ මවුපියන්ට වගේම අපිටත් හොඳට සලකනවා. ඒ දරුවන් මොනවා කරන්න ගියත් ජැක්සන්ගේ ගුරුහරුකම් ඇතිව තමයි කරන්නේ.
අද වනතුරු අපිට පාළුවක් තනිකමක් දැනිලා නැහැ. පොඩි පුතා සජිත් නැති එක වෙලාවකට මට දුකක් දැනෙනවා. මොකද පොඩි පුතා මම එක්කම හිටිය නිසා. මේ බැඳීම සංසාරගත බැඳීමක්. සංසාරගත සැලැසුම් මත තමයි අපි මේ හමුවෙලා තියෙන්නේ. ලේලිලා දෙන්නාගෙන් මම බලාපොරොත්තු වුණේ මගේ දරුවන්ට අම්මා කෙනෙක් වෙනවා දකින්නයි. මගේ ලේලිලා දෙන්නා මට සලකනවා. මමත් ගොඩක් ආදරෙයි. වඳින්න පුළුවන් නම් මමත් වඳිනවා මගේ ලේලිලා දෙන්නාට. ඒ අය කරන කැපවීම මම දකිනවා. මම වාසනාවන්ත අම්මා කෙනෙක්. මගේ දරුවොත් වාසනාවන්තයි.
වසන්ත විතාරණගේ