ඔබටත් දරුපල අහිමිවෙලාද?

දහසක් බලාපොරොත්තු පොදි බැඳගෙන විවාහ දිවියට එළඹීමෙන් පසු ඔවුන්ගේ ඊළඟ ප්‍රධාන අරමුණ දරුවකු ලබාගැනීමය. එහෙත් මේ වන විට එම ප්‍රාර්ථනාව සිහිනයක් බවට පත්වන අවස්ථා වැඩි වෙමින් තිබේ. ඊට හේතුව දරුවන් නොමැතිව දුක් විඳින අඹුසැමි පිරිස ශීඝ්‍ර ලෙස ඉහළ යෑමය.

වාර්තමානයේ විවාහ වන සෑම යුවලකටම එසේ දරු සම්පත් හිමි නොවීම කනගාටුවට කරුණක් බවට පත්ව ඇති අතර ඒ හේතුව නිසාම විසිර ගිය පවුල් ජීවිත ප්‍රමාණය අති විශාලය. ජීවිත කාලය පුරා සුසුම් හෙළමින් විඳවන අඹුසැමියන් ප්‍රමාණයද අතිවිශාලය. එසේම පවුල් ආරවුල් ගැටුම් බහුතරයකට මේ ප්‍රශ්නය හේතු සාධක වී ඇති බවද අද වන විට පැහැදිලිව පෙනී යයි.

මේ සම්බන්ධව ගැඹුරින් කරුණු විමසා බැලීමේදී අඹුසැමියන් විවාහයට ප්‍රථම නිසියාකාරව හඳහන් ගළපා නොගැනීම යන කරුණු ප්‍රබල හේතුවක් සේ දැක්විය හැකිය. මන්ද ඒ ඒ අයගේ කේකන්දර තුළ ඇති දරු පල සම්බන්ධ වූ විවිධ ග්‍රහ පිහිටීම් එකිනෙකාගේ ග්‍රහ තත්ත්වයන් සම්බන්ධව ගැළපෙන්නේ කෙසේද යන්නත් සොයාබැලිය යුතුය. එසේ නොමැතිව කාන්තාවට පමණක් වරද භාරදී නිදහස් වන්නට සිතීම සාර්ථක නොවේ. මන්ද දරු පල අහිමි පිරිමින්ද බහුතරයක් සිටින බව තේරුම් ගත යුතුය.
මේ කාරණා සඳහා ප්‍රබලව බලපානු ලබන්නේ ඒ ඒ ජන්මීන් පෙර භවයන්හි කළ පව් පින් බවටද පුරාණ ඍෂිවරු අදහස් දක්වා ඇත. ඒ අනුව මිල මුදල් යාන වාහන මේ සියල්ල ලබන්නට පෙර පින වාසනාව තිබූ ඇතැම් අයට දරු පල නොමැතිව දුක් වීමට සිදුවූ අවස්ථාද ඇත. ඒ කිසිවක් ලබන්නට පෙර පින නොවූ බොහොමයක් දෙනා දරු සම්පත් විශාල වශයෙන් ලබමින් ජීවත් වන අයුරුද දැකගත හැකිය. මේ දෙවර්ගයේම සම්පත් ලබමින් ජීවත් වන අයද සමාජය තුළ දක්නට ලැබේ. එනිසා තමන් පෙර භවයන්හි කළ කී දේවල් අනුව දරු පල ප්‍රමාද වුවද අහිමි වුවද ඒ තත්ත්වයන් නිසි ලෙස මඟහරවා ගන්නට කළ හැකි වත් පිළිවෙත් බොහෝ ප්‍රමාණයක් ජ්‍යොතිෂයේ දක්වා ඇත.

ජ්‍යොතිෂ ශාස්ත්‍රයට අනුව දරුවන් පිළිබඳ සොයාබැලීමේ ක්‍රමවේදයන් රාශියක් ඇත. ඒ අනුව කේන්දරයක පස්වැන්නෙන් දරුවන් පිළිබඳ හඳුනාගත හැකිය. යම් ජන්මියකුගේ කේන්දරයේ පස්වැන්න දෙස ඉතා කල්පනාකාරීව අවධානය යොමුකළහොත් ඔහුට ඇයට ලැබෙන නොලැබෙන දරු සම්පත් ගැන සියල්ල එහි සටහන්ව තිබෙනු දැකගත හැකිය.

පස්වැන්නේ සිටින ග්‍රහයන් පස්වැන්නට දෘෂ්ටි හෙළන ග්‍රහයන් එහි අධිපති සහ එම ග්‍රහයාගේ තත්ත්වයත් එසේම පුත්‍රකාරක ගුරුතේත් පස්වැන්නත් පුළුල්ව සොයාබැලිය යුතු කරුණුය. යම් ස්ත්‍රියකගේ කේන්දරයේ සඳු, කුජ, සිකුරු ග්‍රහයන් අසුබව නීච හෝ සතුරුව පීඩාවට පත්වී නම් ඇය ලිංගික කටයුතු කෙරෙහි යොමු නොවන්නීය. එහෙයින් ඇයගෙන් දරුපල අපේක්ෂා කිරීම නිෂ්ඵලය. යම් ලෙසකට පහ අධිපති උච්චව හෝ ස්වක්ෂේත්‍රව බලවත්ව සිටීනම් වාසනාවන්ත දරුවන් ලැබේ. එසේම ගුරු, සිකුරු උච්චව පස්වැන්නේ සිටීමද සුබ ග්‍රහ පිහිටීමකි. එයින් බුද්ධිමත් දරු සම්ත් හිමිකර දේ. යම් ලෙසකට ගුරු නීච වුවහොත් අකාරුණික බවින් යුතු දරුවන් ලැබෙන බව පැහැදිලිය.

යම් ලෙසකට බුධ ග්‍රහයා ලග්නයෙන් පහේ හෝ නවයේ සිට අනෙක් ග්‍රහයන් දුර්වල වූ විට පිරිමි දරු සම්පත් බහුල කරයි. ජන්මියකුගේ ලග්නය සිංහ වී රවි, සඳු දුර්වලව කුජ හා ශනිගේ දෘෂ්ටියට ලක්වී නම් උපදින දරුවන් අන්ධභාවයට පත්වන බව සඳහන් වේ. එසේම ඉතා හොඳින් තේරුම්ගත යුතු කාරණය නම් දරු ගැබක් හටගන්නේ රවි, සඳු, සිකුරු තම නවාංශකවල සිටින අවස්ථාවල ඇතිවන ලිංගික සබඳතාවකින් පමණක්ය යන්නය.

එසේම විවාහක අඹුසැමි යුවලක් ඉතා හොඳින් තේරුම්ගත යුතු කාරණයක්ද වෙයි. ඒ, තමන් අපේක්ෂා කරන දරුවා පිරිමි දරුවකුද ගැහැනු දරුවකුද යන්නය. මන්ද පිරිමි දරුවකු අපේක්ෂ කරන දෙදෙනකු ඇසුර පැවැත්විය යුත්තේ මාස් ශුද්ධියෙන් 6,8,10,12,14,16 යන දිනවලදීය. එසේම ගැහැනු දරුවකු අපේක්ෂා කරන දෙදෙනකු ඇසුරේ යෙදිය යුත්තේ 5,7,9,11,13,15 යන දිනවලදීය. එසේම තමන්ට ලැබෙන දරුවා ඉතා ගුණවත් යහපත් බුද්ධිමත් දරුවකු වේවායි පතන අඹුසැමියන් යහනේ දකුණු පසින් සැමියාද, වම්පසින් බිරියද ලෙස යහනට පැමිණිය යුතු වෙයි.

යම් ලෙසට කේන්දරයේ දරු පල සටන්ව ඇතත් එය ප්‍රමාද වේ නම් ඒ සඳහා තමන් නිතර යන එන බෝධින්වහන්සේ නමක් තෝරාගෙන සතියේ සඳුදා සහ සිකුරාදා දිනවල බෝධි පූජා හතක් තබා එම පින පත්තිනි මෑණියන්ට අනුමෝදන් කර තමාගේ දරු පල සිහිනය ඉටුකර දෙන මෙන් ඉල්ලා සිටිය යුතුය. එවිට ඔබගේ යම් අකුසල කර්මයක් හේතුවෙන් දරු පල ප්‍රමාද වේ නම් ඒ තත්ත්වය මඟහැරී ගොස් දරු සිහිනය සැබෑ කෙරෙනු ඇත.

ප්‍රවීණ ජ්‍යොතිෂවේදී, ජය ශ්‍රී නන්ද කුමාර