දහසකුත් අපේක්ෂාවන් මුදුන් පමුණුවාගෙන තමාගේ කියා නිවහනක් ගොඩනගා ගැනීම සඳහා භූමියක් මිලදී ගැනීමේදී හෝ සොයාගැනීමේදී තමාටත් තම පවුලේ සාමාජිකයන්ටත් අනාගතය සුබවාදීව සෞභාග්යය උදාකර දෙන භූමියක් තෝරාගැනීමට සුපරීක්ෂාකාරී වේ නම් එය ඔබට ඉතා වැදගත් වනු ඇත.
නැගෙනහිර දිශාවට වැසි දිය ගලා යන භූමියක් නම්
මෙම භූමියේ වෙසෙන අයට ඉතා යහපත් මානසිකත්වයකින් යුතුව තම ආත්ම ශක්තිය ගොඩනැගෙනු ඇත. ගෘහ ජීවිතයේ දියුණුවද දූ දරුවන්ගේ අධ්යාපනික දියුණුවද ලබාගැනීමට හැකි වේ. සමාජයේ ගෞරවාදරයට හා උසස් කීර්තිනාම ධන සම්පත් ගෙන දෙන, පදිංචියට සුදුසු යහපත් භූමියකි.
ගිනිකොන දිශාවට වැසි දිය ගලා යන භූමියක් නම්
මෙම භූමියේ වෙසෙන අයගේ පවුල් ජීවිත අවුල් සහගත වීමෙන් හා නිතර ණයතුරුස්වලින් පිරි මානසික සහනය අඩු වේ. ධනය කොතෙක් ලැබුණද තමාට නොදැනීම එය විනාශ වී යනු ඇත. පදිංචියට අසුබදායක භූමියකි.
දකුණු දිශාවට වැසි දිය ගලා යන භූමියක් නම්
මෙහි වෙසෙන නිවැසියන්ට සිතට විවිධ අසුබවාදී බලෑම් එල්ලවනු ඇත. එනම් ගිනි බිය, විදුලි හා අකුණු සර ආදී හදිසි අනතුරු තුළින් සෝ සුසුම් දුක් කම්කටොලු ගෙන දීමට හා තම ඥාති වර්ගයාගේ විනාශයට මුල්වන විපත්තිදායක කරුණු යෙදෙනු ඇත. පදිංචියට නුසුදුසු භූමියකි.
නිරිත දිශාවට වැසි දිය ගලා යන භූමියක් නම්
උත්සාහයේ තරමට ප්රතිඵල අඩුවනු ඇත. නිතර සොර සතුරු බියද අවි ආයුධ තුළින් හානිද සිදුවීම හා තමන්ගේ සහෝදර ආදීන්ට හදිසි අනතුරු ගෙනදීමේ ප්රවණතාව වැඩිය. පවුලේ දියුණුවටද බාධා ගෙන දේ. මෙයද පදිංචියට අසුබ භූමියක් ලෙස සැලකේ.
බටහිර දිශාවට වැසි දිය ගලා යන භූමියක් නම්
මෙවැනි භූමියක වෙසෙන අයට නිකරුණේ විය හියදම් සඳහා කරුණු යෙදෙනු ඇත. විශේෂයෙන් කාන්තා පක්ෂයේ අයට නිරතුරු රෝග පීඩා විපත් ගෙන දීමේ ප්රවණතාව වැඩිය. පවුලේ සමගියටද බාධා ගෙන දේ. මෙම භූමියද පදිංචියට අසුබ වන්නේය.
වයඹ දිශාවට වැසි දිය ගලා යන භූමියක් නම්
මෙහි වෙසෙන ගෘහ මූලිකයාට විදුලි සර වැනි හදිසි විපත් ගෙන දීමටද, පවුලේ වැඩකටයුතු දියුණුවට මන්දගාමී තත්ත්වයකට හා දූ දරුවන්ගේ අධ්යාපනය, රැකියා කටයුතු අඩාළ වීමටද හේතු යෙදේ. මෙම භූමියද පදිංචියට අසුබ වන්නේය.
උතුරු දිශාවට වැසි දිය ගලා යන භූමියක් නම්
මෙහි වෙසෙන අයට ඉතා යහපත් හදිසි ධන ලාභ, නිවාස, ඉඩකඩම්, යාන වාහන සහ සමාජයේ ගෞරවය ලැබෙනු ඇත. එහෙත් ලැබෙන දෙය රැකගැනීමට අසීරුතාවක් උදාවනු ඇත. නිවැසියන්ට නීතිමය වශයෙන් ගැටලු මතුවී අපකීර්තියට පත්වීමටද ඉඩ ඇත. මෙම භූමිය පදිංචියට සුබදායක වනු ඇත.
ඊසාන දිශාවට වැසි දිය ගලා යන භූමියක් නම්
විශේෂයෙන්ම මෙහි වෙසෙන අයට දෙවියන්ගේ ආශීර්වාදය වැඩි වශයෙන් ලැබෙනු ඇත. තම ආගම දහමට නිතර නැඹුරුවීමක් පෙන්වයි. දූ දරුවන්ගේ අධ්යාපනික හා සමාජයීය දියුණුවට මංපෙත් විවර වෙයි. ගෘහ ජීවිතයේ සතුට සමාදානය හා කාන්තා පක්ෂයේ අයට උසස් නිලතල දැරීමේ භාග්යය උදාවනු ඇත. මෙම භූමිය වාසයට ඉතා යහපත් වනු ඇත.
ඉහත දැක්වූ කරුණු අනුව ඔබ අසුබදායක භූමියක පදිංචි වී ඇත්නම් වාස්තු විද්යානුකූලව සුබදායී ලෙස භූමිය සකසා ගෙන පවුලේ දියුණුව, සෞභාග්යය උදා කරගන්න.
මෙම කරුණු අපගේ දීර්ඝකාලීන ගවේෂණාත්මක අත්දැකීම් තුළිනි.
ගුප්ත විද්යා හා ජ්යොතිෂවේදී, ජේ. එම්. ජයන්ත ඒකනායක
