මෙරට ජනයාගෙන් බහුතරයක් සිය එදිනෙදා කටයුතු කාරණාවලදී ජ්යොතිෂයට අනුව අවශ්යතා ඉටුකරගැනීමට උනන්දු වෙයි. එහිදී සෙනසුරු රාහු, ආදී යුගයන් ගැන ජනයා දක්වන උනන්දුව මෙන්ම සුබ පලදෙන යෝග ආදිය ගැනත් උනන්දු වීම සිදුවේ. එමෙන්ම ගමනේදී බිමනේදී මෙන්ම අලුත් වැඩකදී සුබ නැකැත් සුබ මුහුර්ත ආදිය ගැන ඉතා උනන්දුවෙන් යුතුව කටයුතු කරන පිරිසද අතිවිශාලය. එසේ තමන්ගේ වැඩකටයුතු සාර්ථක කරගන්නට ජ්යොතිෂයේ පිහිට පතන බොහෝ දෙනා සිය සුබ ගමන් බිමන් ආදියේදී සතුන්ගේ ක්රියාකාරකම් කෙරෙහිද අවධානය යොමු කරති. එවැනි සතුන් අතර කටුස්සා, කපුටා, හූනා ආදියට හිමිවන්නේ සුවිශේෂ ස්ථානයකි. සුබ ගමනක් යෑමට මුල් පියවර තබද්දී හූනකු ‘චික් චික්’ ගෑම අසුබ දෙයක් බවට බොහෝ දෙනාගේ විශ්වාසයයි. එමෙන්ම ගමන අතරතුර කපුටකු හඬලන ආකාරය, කපුටකු පැහැරීම ආදියද විශේෂ සංඥා බවට ජනයා අතර විශ්වාසයක් වෙයි.
මේ ආකාරයට විවිධ සතුන් ගැන පැරැණි පොතපතෙන් හෙළිදරව් කරන ආකාරය අනුව පතන පරිදි ඒ සතුන් ගෙන එන නිමිති හඳුනාගත හැකිය.
මෙහිදී කපුටාට හිමිවනුයේ සුවිශේෂ ස්ථානයකි. සෙනසුරුගේ වාහනය ලෙස සැලකෙන කපුටා කෙරෙහි ජනයා අතර ඇති විශ්වාසය අසීමිතය. ඒ අනුව කපුටා නිවෙස අසල ගසක වසා කරව් කළොත් නිසැකවම නෑයකු අමුත්තකු පැමිණෙන බවට පැවැසේ. එහිදී සිදුවන්නේ යම් නිවෙසක පිරිස නෑගමනක් යන්නට කරන කතාබහ අසා සිටින කපුටා අදාළ ගෙදරට ගොස් පණිවුඩය ලබාදීමට බවයි සැලකෙන්නේ. ඒ සඳහා කපුටාට උදව් කිරීමට අදාළ පවුලට සම්බන්ධ නොපෙනෙන බලවේග උදව් කරන බවයි පැවැසෙන්නේ.
එමෙන්ම කපුටකු හිස මත වැසීම තුළින් පෙන්වා දෙන්නේ සෙනසුරු අපලය පැමිණෙන බවට පෙරනිමිත්තක් බවද පැවැසෙනවා.
මෙහිදී කපුටාගේ විවිධ ක්රියාකාරකම් ගැන සුළුවෙන් තැකිය නොහැකිය. මන්ද කපුටා යනු දීර්ඝායුෂ ඇති සතෙකි. කපුටාගේ මරණයක් පහසුවෙන් දැකිය නොහැකිය. එනිසාම කපුටා ඉතා උනන්දුවෙන් වටපිටාව පරීක්ෂාකාරීව සිටින්නකු ලෙස ප්රකටය. කපුටා අනතුර කලින්ම දකී. එහෙයින් තමාට මෙන්ම අනුන්ටත් සිදුවන අනතුරු කපුටා හඳුනාගනී. එවැනි දේ අදාළ අයට හැඟවීමට කපුටා පසුබට නොවන්නෙකි.
කපුටු සංවාසයක් දැකීම අතිශයින්ම අශුභ සිද්ධියකි. එයින් මරණය ගැන ඉඟි පළවේ. එමෙන්ම ස්ථාන පාළු, අලාභහානි ගැනද මේ තුළින් කියැවෙන බවයි හඳුනාගත යුත්තේ.
එවැනි දර්ශනයක් දුටු විට එය ගණන් නොගෙන අමතක කර දමනවාට වඩා ඊට සුදුසු පිළියම් කිරීම වඩාත් සාර්ථක කටයුත්තක් බවට පැරැණි ඍෂි මතයේ සඳහන් වේ. මන්ද එයින් අනතුරු වළකා ගැනීමට හැකි බවයි පැවැසෙන්නේ.
එමෙන්ම හූනාද බොහෝ දුරට මිනිසාට සිදුවන අනතුරු හඳුනා ගන්නෙකි. එහෙයින් යම් ගමනක් අතරතුර හූනු හඬනැගීම නොසලකා හැරීමට ඇතැමුන් කටයුතු කළද එවැනි අවස්ථාවල අසුබ පල අත්විඳි වගට හඳුනාගෙන තිබේ. එහෙයින් මෙවැනි දේ නොසලකා හැරීම සුබ නොවන අතර මේ ආකාරයට සතුන් පෙන්නුම් කරන නිමිති ගැන බුද්ධිමත්ව සිතාබලා තමාගේ සුබසිද්ධිය උදෙසා කටයුතු කිරීම සුබ වේ.
ප්රවීණ ජ්යොතිෂවේදී, සත්යජිත් සම්පත්
