සතුරු කරදරවලින් හෙම්බත් වී, පිහිටක් පතා යන තැන්වලදීත් රවටනු ලැබ අසරණ වූ මිනිසුන් මේ සමාජයේ ඕනෑතරම්ය. නීතියෙන් හෝ බලයෙන් මැඬලිය නොහැකි දරුණු සතුරන් හමුවේ අසරණ වන බොහෝ දෙනා අවසානයේ දෙවියන් ඉදිරියේ කන්නලව් කරන්නේ හදවතේ ඇති දැවෙන ගින්දර නිවාගන්නටය. අන්න එලෙස සතුරන් මැඬලීමටත්, අසාධාරණයට ලක්වූවන්ට පිහිට වීමටත් අපේ ජන විඥානය තුළ සිටින බලවත්ම සහ සැර පරුෂම දෙවි කෙනෙකු වන්නේ සෙනෙවිරත්න කඩවර දෙවියන්ය. පුර පක්ෂයේදී දෙවි කෙනෙකු ලෙසත්, අව පක්ෂයේදී යක්ෂයෙකු ලෙසත් පෙනී සිටින බව කියවෙන කඩවර දෙවියන්, තමන්ට කරන පුද පූජා නූලට තිතට ලැබෙන්නේ නම් එහි ප්රතිඵලයත් ඒ අයුරින්ම ලබා දෙන බව ප්රකට කරුණකි.Sri Lanka Latest News
කලා වැවේ ආරක්ෂකයා ලෙස කටයුතු කරමින් සිටියදී, අත්වැරදීමකින් වැවේ බැම්ම සිදුරු වී ජලය පිටාර ගලන්නට වූ අවස්ථාවේදී එය වළක්වාගත නොහැකි වූ තැන තම ජීවිතය වැවට පූජා කළ ඒ අභීත සෙනෙවිරත්න කඩවර, මරණින් මතු බලවත් දිව්ය ආත්මයක් ලැබුවේ වෛරී සහ සැර පරුෂ ස්වභාවයක්ද සමගිනි. කඩවර දෙවියන්, නරකට නරක ලෙසත් හොඳට හොඳ ලෙසත් ප්රතිචාර දක්වන සුවිශේෂී දෙවි කෙනෙකි. ඕනෑම ශාන්ති කර්මයකදී මුලින්ම කඩවර ගොටුව පිරිනැමීමට ඇදුරන් වගබලා ගන්නේ උන්වහන්සේගේ ඇති ඒ නොමඳ බලය නිසාවෙනි. මහ මුහුදේ රළ පවා නවතා වැඩම කළ හැකි තරම් බලයක් ඇති කඩවර දෙවියන් උදෙසා කෙරෙන කන්නලව්වෙන් කියැවෙන්නේ අසුරයන් සමග යුද කොට දිනූ, කතරගම රන් තොරණේ මුරතේවේ වැඩවසන උන්වහන්සේ අසරණයන්ගේ සකල දෝෂාන්ධකාරය දුරුකර සතුරන් මැඬලන බවයි.
සතුරු කරදරවලින් පීඩා විඳින අයෙකුට නිවසේ සිටම කඩවර දෙවියන්ගේ පිහිට පැතිය හැකිය. ඒ සඳහා නිවසින් පිටත පහන් කණුවක් සාදා, අඟහරුවාදා දිනයක සවස හයට හෝ රාත්රී දොළහට රත් මල්, බුලත් විටක්, හඳුන් කූරු සහ එළඟි තෙල් මිශ්ර පහනක් දල්වා කන්නලව් කිරීම සිරිත් වේ. වඩාත් බලගතු ප්රතිඵල පතා ‘මුනිභද්ර කඩවර දිෂ්ටිය’ මතුකරමින් කෙරෙන වතාවත්වලින් අහස පොළොව දෙබෑ කරමින් කඩවර දෙවියන් වැඩම කරවන බව ජනප්රවාදයේ එයි. සතුරන්ට දඬුවම් දීම සඳහා පිරිනමන ‘කඩවර ගොටුව’ යනු සැබවින්ම භයානක දෙයකි. රතු බත්, හත් මාළුව, පුළුටු, ගොඩ දිය මස් පමණක් නොව රා, අරක්කු සහ ලේ රීරි පවා ඇතුළත් වන මේ ගොටුව පූජා කිරීමෙන් සතුරන්ට ලැබෙන දඬුවම් සුළුපටු නොවේ. නිසි කලට නිසි වතාවත් කළහොත් ඕනෑම බලගතු හදියක් කපා දමා ගෙදරට සෙත සලසා ගන්නට කඩවර දෙවි හාමුදුරුවන්ගේ පිහිට අනිවාර්යයෙන්ම ලැබේ.
ජ්යොතිෂවේදී ඔස්මන් පෙරේරා
