හොඳට නරකට දෙකට සෙනසුරු

එක් දිනක් බ්‍රහ්ම විෂ්ණු ස්කන්ධ මහේශ්වර දිව්‍ය රාජයාණන් රැස්වී සිටින දිව්‍ය සමාගමට නවග්‍රහ දෙවියෝද පැමිණ සිටියෝය. දේව සමාගමේ රැස්වීමේදී විෂ්ණු දෙවියන්ට සෙනසුරු දශාවේදී කුමන විදියේ අපලයක් කරාවිදෝ යන සාකච්ඡාවේදී සෙනසුරා මහා නීච එපා කරපු අධමයායි වශයෙන් කියවයි. මෙයින් කෝපයට පත් සෙනසුරු දෙවියෝ විෂ්ණුට කරන දෙය බලා ගනීවි යැයි අභියෝග කොට දේව සමාගමෙන් නික්ම ගියේය. විෂ්ණු දෙවියන්ද සෙනසුරා මට මොනවා කරන්නද කියා නික්ම ගියේය. විෂ්ණු දෙවියන්ට සෙනසුරු අපලය ආරම්භ විය. විෂ්ණු දෙවියෝ සෙනසුරුගෙන් බේරීමට ඇත් වේශයක් මවාගෙන මහ වනයක වර්ෂ සයක කාලයක් සෙනසුරු අපලය ගෙවෙන තෙක් සැඟව සිටි නමුත් එම කාලය තුළ බටකොළ ආහාරයට ගනිමින් මඬේ ලගින්නට සිදුවිය. මෙවැනි කටුක කාලයක් ගතකරන්නට සිදුවූයේ සෙනසුරුගේ බලපෑම නිසා බැව් විෂ්ණු දෙවියන්ට පසුව වැටහිණි.

සෙනසුරු ග්‍රහයා හොඳ කරන්නන්ට හොඳ කරන ග්‍රහයෙකි. ධාර්මිෂ්ඨ ජීවිතයක් ගතකරන්නන්ට සෙනසුරු දශා කාලය තුළ තදබල පීඩා ඇති නොකරයි. ඇතැම් අය හිටි හැටියේ විශාල ධනවතුන් කරවයි. රජවරු කරවයි. ශ්‍රී ලංකාවේ දේශපාලන ඉතිහාසය බලන කල සෙනසුරු අපල කාලයේ රටේ නායකත්වයට පත් නායකවරු ගණනාවක් සිටින අතර, ඒ පිළිබඳ වෙනම ලිපියකින් විස්තර ඉදිරිපත් කිරීමට බලාපොරොත්තු වෙමි. මෙහි අනෙක් පැතිකඩද එසේමය. සෙනසුරු අපල කාලයේ විශාල ධනවතුන් පවා අන්ත අසරණ දුගීභාවයට පත්විය හැකිය. රජවරුන්ට පවා රජකම අහිම විය හැකිය. ජන්මියෙක් උපන් වේලාවේ සෙනසුරු සිටින පිහිටීම හා ගෝචරයෙන් සෙනසුරු ගමන් කරන ස්ථානය හා වෙනත් ග්‍රහ දෘෂ්ටි සංයෝග මත සෙනසුරු ජන්මියාට කෙසේ බලපානු ඇත්දැයි තීරණය කළ හැකිය. සිදුහත් තාපසයාද අත්තකිලමතානු යෝගයෙහි යෙදීමෙන් ශරීරයට අනේකවිධ දුක් දීමෙන් බුදුබව පසක් කළ හැකි යැයි විශ්වාස කරමින් සය අවුරුද්දක් මුළුල්ලෙහි දුෂ්කර ක්‍රියා කරමින් අපමණ දුක්ගැහැට වින්දේද සෙනසුරු අපලය යෙදීමෙන් දැයි කටවහරයේ එන කරුණකි. සත්‍යවාදී හරිශ්චන්ද්‍ර රජුට සෙනසුරු අපලය පලදීමෙන් රජකමින් පහවී දේවියගෙන්ද, දරුවන්ගෙන්ද වෙන්කර දමා සොහොන් පාලකයෙක් වීමෙන් නොයෙක් ගැහැට වින්දේය.

මෙම සෙනසුරු ග්‍රහයා කාක වාහනය පිට ගමන් කරන නුගරුක් නුග සෙවණ නුග විමනේ වාසය කරයි. කළු පැහැති ශරීරයකින් හෙබි වෙයි. වියළී ගිය ළිං, පොකුණු, ගංගා, වැව්, දියඅගල්, යුද භූමි ආදියට අධිපතිකම් කරයි. එක් අතකින් යගදාවක්ද, අනෙක් අතකින් පාරාවළල්ලක්ද ආයුධ වශයෙන් දරා සිටී. අධික රුධිර පීඩනය, ක්ලාන්තය, ආහාර අරුචිය, උණ, වණ, කාස, පිස්සු, ඉදිමුම් වැනි රෝග නිධානයන්ටද සෙනසුරුගේ බලපෑම අධිකව සිටී. මේ හැර සෙනසුරුගෙන් යෙදෙන ප්‍රධාන රෝග අතර ඇම්ම, ඇවිලිල්ල, හිසරදය, වාත රෝග, කැඩීම්, තැළීම්, කොරවීම්, සිහි මුළාවීම් වැනි රෝග, සොර භය, අමනුෂ්‍ය භය, අණ-වින දෝෂ පැමණීමද වැනි දේද සෙනසුරු ප්‍රධාන කොට බලපවත්වනු ලබයි. සෙනසුරුගේ අපලයෙන් මිදීමට අංජන කැට, කළුතල, ලොත් සුඹුළු, බැබිල, කුප්පමේණිය මේවා ජලයෙහි බහා තබා ස්නානය කළ යුතුය. නිල් මැණික් පැලැඳීමද ලෝහ භාජන, නිල් මැණික්, පොල්, තල, කොල්ල, මී දෙනුන්, සෙනසුරු දානය සඳහා යොදා ගැනීමද සුබයි.

සෙනසුරු දෝෂ ඉවත් කරගැනීම සඳහා නීල මණ්ඩල යන්ත්‍රය හෝ ශනි මෘතුංජය යන්ත්‍රය හෝ මහා මෘතුංජය යන්ත්‍රය පැලඳවීම සුබයි. දස ක්‍රෝධ බලිය, මහා නිලග රක්‍ෂය, ගෞඩි රාක්‍ෂය යන බලි ශාන්තිය සෙනසුරු දෝෂ දුරුවීම සඳහා නියමිතව ඇත.
ජ්‍යොතීර් විද්‍යාපති ජී.ඩී. අසංක වීරසිරි