ගෙවල් කඩ කඩා හැදිල්ල දැන්වත් නවත්වන්න

ගෙබිමක් තෝරා ගැනීම සහ ගෘහ නිර්මාණය වාස්තු ශිල්පයේ ප්‍රධාන අංගයන්ය. ජලය, වාතය, හිරුඑළිය ජීවියකුගේ පැවැත්ම සඳහා හිතකරව අවශ්‍ය වෙයි. අතීතයේ රාජධානියක් තුළ රජ මාලිගය ජලතටාක, අන්තඃපුර, විශ්‍රාමශාලා, වන උයන් සියල්ල නිර්මාණය වූයේ සැලැසුමක් අනුවයි. වාස්තු විද්‍යාව යනු ආසියාතික රටවල්වලට පමණක් ආවේණික ශිල්පයක් නොවන බව විමසීමේදී පැහැදිලිය.

නිවෙසක් යනු මවුපිය යුවළකගේ සහ දරුවන්ගේ සාමකාමී නිදහස් වාසස්ථානයයි. ගුණගරුක හදවත් ඇත්ත වුන් පිරි නිවහන දෙව්ලොවකි. රෝගී හෝ දුර්ගුණ පිරි වාසභූමිය අපායකි. නිරෝගීකම සම්පතකි. රජෙක් වුවද ලෙඩෙක් නම් රජකමෙන් පලක් නැත යන්න පැරැණි කියමනකි.

හිරුඑළිය සහ වාතය මිනිසාගේ පැවැත්මට උපකාර කරයි. ජීවය සපයයි. ජලය දිවිය ආරක්ෂා කරවයි. මෙම පහසුකම් සපිරි බිම මිනිස් වාසයට සුදුසුය. වාසයේ සැලැසුමට භූමියේ දිසා, අනු දිසා පිළිබඳවද සැලකිලිමත් වීම අවශ්‍ය වෙයි. එයට පරිබාහිරව භූමි දෝෂ පිළිබඳවද අවධානය වැදගත්ය. සොහොන්පිටි, වගුරු බිම්, බෑවුම් සහ අනතුරුදායක ස්ථානද මිනිස් වාසයට නොගැළපෙයි. බහිරව දෝෂද නිවහනක පැවැත්මට අහිතකරයි. අග්නි පුරාණයේ සඳහන් පරිදි ශ්‍රියාකාන්තාව හෙවත් ලක්ෂ්මි දේවිය බෙලිගස, කෙසෙල් මල, කන්‍යාව, කුංජරය, තෝමරය, පටපිළිය සහ පියකරු නිවහනට වඩින්නේ යැයි මතයකි. නිවෙසක් පියකරු වන්නේ නිවැසියන්ගේ යහපත් පැවැත්ම තුළය. නිවහන යහපත් පැවැත්මටත්, යහපත් පැවැත්ම නිවහනටත් යහපතම සලසයි.

වර්තමානයේ ඉතා කුඩා බිම් කඩෙක ගොඩනැඟෙන නිවෙස තුළ විද්‍යාත්මක සහ පාරම්පරික වාස්තු රීතීන් අනුගත කළ හැකිද? එය බලවත් පැනයකි. නිවෙස වටා බැඳි තාප්පය වාතාශ්‍රය වළකාලයි. භූමියේ මුහුණත අනුව නිවෙසේ යහපත් දිශා අනුගතයට කඩුලු බඳියි. ළිඳ, වැසිකිළිය සුදුසු පරිදි ස්ථානගත කිරීම අපහසුය. තාප්පය නිවෙසේ බිත්තියක් වීමෙන් ප්‍රේත පාදය නිවෙසේ ඇතුළට පැමිණ ඇත. නිවෙසේ බ්‍රහ්මපාදය දෙපයට පෑගෙයි. උඩු මහලට ඇති පඩිපෙළ වාමාවෘතවය. සියල්ල වාස්තු විද්‍යාවට අනුව ගැටලු රැසක පෙරනිමිත්තකි. කළ යුත්තේ වෙනසය. අයහපත් දැකීම යහපතට හැරවීමය. ඒ සඳහා කැඩීම්, බිඳීම්, වෙනස් කිරීම් නිවෙස්හිමියා අසරණ කිරීමකි. රටට ණයකරුවකු වී කඩා බිඳ සැකසූ වාස්තු කටයුතු තුළින් යහපතක් නොදුටු පිරිස අපමණය.

මේ අයුරින් නිවැසියා තමන් නැවත සකස් කළ නිවෙස වාස්තුවේදීන් දසදෙනකුට පෙන්වුවද ඔවුන් පවසන්නේ පෙර සැකසූ යහපතෙහි අයහපතය. අඩුපාඩුය. මෙලෙස කඩාබිඳ සැකසීම තුළ නිවෙස සම්පූර්ණයෙන්ම කඩා නව නිවෙසක් සාදා ගැනීමට හැකිය. නිවැසියා කායික, මානසික පිරිහීමට පත්කරවන එවැනි අල්ප වූ වාස්තුවේදීන්ද යහපත් වාස්තුවේදීන් අතර ඇත. අයහපත් වෙනස් කිරීමෙන් ගැටලු උග්‍ර වෙයි.

නිවෙසකටද පොරොන්දම් පරීක්ෂාවක් ඇත. එය නිවෙසේ වර්ගඵලය අනුව සැකසෙයි. නිවෙස නොගැළපෙන්නේ ගෘහ මූලිකයාට විය හැකිය. නිවෙසේ නැකැත සොයා එම නැකැත අනුව බිරිය හෝ දරුවකුගේ නැකැත් සීහුමකට නැවත වර්ගීකරණය කොට එම ගෘහ මූලිකත්වය නිවෙසට යහපත් කළ හැකිය.

බහිරව පූජා ආදියද ඉතා සරලව, සුළු මුදලක් වැය කිරීමෙන් කළ හැකිය. දුටු සැණින් කඩාබිඳ දැමීම් නිර්දේශ කිරීම යහපත් වාස්තු ශිල්පියකුගේ පැවැත්ම නොවේ. කඩා බිඳ දැමීමෙන් තොරව දෝෂභංග කළ හැකි පාරම්පරික ක්‍රමවේදයන් රැසකි.

දකුණ, ගිනිකොන, වයඹ, නිරිත දිසා ළිඳ සඳහා අයහපත් වුවද ළිඳ ප්‍රධාන ද්වාරයට නොපෙනේ නම් එම දෝෂය පහවී යයි.

පඩිපෙළ දෝෂයට කොහොඹ ලී පඩිපෙළට එක් කිරීමෙන් දෝෂ භංග වෙයි. නිවෙසෙහි ඉදිරිපස අන්නාසි, අරලිය, රත්මල්, කෙසෙල් නිවෙසට කරදර, බාධක ගෙනදෙයි.

නිවෙස ඉදිරිපස සුදු මල් බහුල වීමද කළු වර්ණය නිවෙස තුළ බලවත් වීමද නිවැසියනට අහිතකරය.

නිවහන දෝෂසහගත වීම, කඩාබිඳ දැමීම, විකිණීම, හැරයෑම වැනි විකල්පයනට හේතුවක් නොවේ.

කඩාබිඳ දැමීම්වලට යොමුකරවන්නා වාස්තු ශිල්පියකු නොවේ. නිතරම වාස්තු දෝෂ දකින පෙන්වන හිතවතාද, ඥාතියාද නිවැරැදි වාස්තු ශිල්පියකු නොවේ. සේවාදායකයාගේ වියදමත්, කාලයත්, රහසේ විනාශ කරන්නාගේ ශිල්පය කුමක්ද?
ජ්‍යොතිෂවේදී මතුගම ජයනෙත්ති