ඔබව හසුරුවන ඇසට නොපෙනෙන බලවතා

කෙනකු උපන් මොහොත අනුව ඔහුගේ ජීවිතයේ විවිධ අවස්ථාවන් පාලනය කරන ග්‍රහයකු හඳුනා ගන්නට ජ්‍යොතිෂයට හැකියාව ඇත. එම ග්‍රහයා අපගේ ආත්මකාරක ග්‍රහයා ලෙසද හඳුන්වා දෙයි. ඒ අනුව ඔබ උපන් ලග්නයට අනුව ඔබව පාලනය කරන එම ග්‍රහයා ඔබගේ උත්පත්තියේ සිට මරණය දක්වාම ඔබගේ ජීවිතය පාලනය කරයි. ඒ අනුව පිළිවෙළින් මේෂ ලග්නයේ සිට ඒ ඒ ලග්න හිමියන්ගේ ආත්ම කාරක ග්‍රහයන් කවරේදැයි යන්නත් එම ග්‍රහයින් ලබාදෙන පල මොනවාද යන්නත් සලකා බලමු.

මේෂ ලග්නයෙන් උපන් අයකුට ලග්නාධිපති හෙවත් ආත්ම කාරක ග්‍රහයා කුජය. මෙම ග්‍රහයා උපතේදී බලවත්ව සිටි අයගේ කුජ ලග්න භාවයේම සිටී නම් මහත, තරබාරු දේහ ලක්ෂණයකට හිමිකම් කියන අතර නිර්භීත, සටන්කාමී, එඩිතර අයෙක්ද වෙයි. කාටත් යටත් නොවී උත්සාහයෙන් ජීවිතය දිනයි.

වෘෂභ ලග්න හිමියාගේ ලග්නාධිපති හෙවත් ආත්ම කාරක ග්‍රහයා සිකුරුය. මේ අයගේ ලග්න භාවයේම සිකුරු සිටියහොත් කලාව ප්‍රිය කරන අයෙක් වෙයි. මනා රූප සොබාවකින් හෙබි කලාව ප්‍රිය කරන ඇත්ත කතා කරන අනුකම්පාව ඇති අයෙකි. කාටවත් කරදරයක් නොමැතිව ජීවත් වන්නට ශක්තිය ලැබේ.

මිථුන ලග්න හිමියන්ගේ ලග්නාධිපති බුධ ග්‍රහයාය. ඔවුන්ගේ ලග්න භාවයේම බුධ බලවත් නම් බුද්ධිය නිසා දියුණුව ලබන්නට වාසනාව ඇති අයකු වෙයි. බුධ බලවත්ව ඇත්නම් උසට ගැළපෙන මනා සිරුරක් ලබයි. බුධ ලග්නගතව සිටින විට ගුරු, සඳු, සිකුරු කේන්දරයේ බලවත්ව ඇත්නම් ඔහු උගන්වමින් ඉහළම තැනට යයි.

සඳු ලග්නාධිපති වන කටක ලග්න හිමියන්ගේ ලග්නගතව ගුරු සහ සඳු සිටී නම් එයින් කටක ලග්න හිමියන්ගේ කේන්දරයේ ඇති අනෙකුත් අනිටු දොස් දුරුකර සුබපල ගෙනදෙනු ඇත. මෙමඟින් කටක ලග්න හිමියන්ට පඬිවරයකු වීමට වාසනාව උදාකර දෙන බවද පැවසේ.
සිංහ ලග්නයේ ලග්නාධිපති රවිය. රවි බලවත්ව උපතේදී ලග්න රාශියේම පිහිටන අතර ගුරු, සිකුරු, බුධ, කුජ යන ග්‍රහයන් උපතේදී බලවත්ව ඇත්ද එම ජන්මියා ලොව පුදුම කරවන විශ්මිත වැඩ කරන කාගෙවත් අදහස් ගණන් නොගන්නා, සටන්කාමී බලයක් හිමි තම උත්සාහය මත දියුණුව ලබන අයකු වෙයි.

කන්‍යා ලග්නයේ උපන් අයගේ ලග්නාධිපති බුධය. බුධ බලවත්ව උපතේදී ලග්න ගතව හෝ බුධ, මිථුන රාශියේ හෝ පිහිටයි නම් ඔහු ලේඛන කලාව, ගණිතය මෙන්ම නිර්මාණාත්මක අංශයන්ගේ නිපුණයකු වෙයි. එයින් දියුණුව ලබා උසස් තැනකට පත්වෙයි.

තුලා ලග්නයේ ඉපදී ඇති අයගේ ලග්නාධිපතියා වන සිකුරු ලග්නගතව සඳු සමඟ සිටී නම් විනෝදයට නැඹුරුවක් ඇති සැහැල්ලු ජීවිතයක් ගත කරන අයෙකි. කලාවට ළැදි කලාවෙන්ම ජීවිතය දිනන කෙනකු වෙයි. මේ අයගේ සිකුරු බලවත් වීම තුළ සුරූපී, කඩවසම් අය විවාහයට හිමිවේ. ඉන් අසීමිත සතුටක් ලැබේ.

වෘශ්චික ලග්න හිමියන්ගේ ලග්නාධිපති අඟහරු හෙවත් කුජය. කුජ ලග්නගතව බලවත්ව සිටී නම් හෙතෙම උපන් පළාතට නායකයකු වෙයි. එසේම ඉන්ජිනේරු, කාර්මික, විද්‍යා අංශ, නීති අංශ ආදියෙන් ඉහළට ගොස් අසීමිත දියුණුවක්ද ලබයි.

ධනු ලග්න හිමි ඔබගේ ලග්නාධිපති හෙවත් ආත්ම කාරක ග්‍රහයා ගුරුය. ගුරු ලග්නගත වෙමින් බුධ සමග සංයෝග වේද ඔහු හෝ ඇය දැනුමින් උසස් අයකු වෙයි. මේ අය නීතියට වැඩ කරන සටන්කාමීය.

සෙනසුරු ලග්නාධිපති වන මකර ලග්න අයගේ ලග්නභාවයේ හෝ දෙවැන්නේ සෙනසුරු ග්‍රහයා බලවත්ව සිටී නම් ජන දුක හඳුනන අයකු වෙයි. කිසිවකුට කරදරයක් වන්නට කැමැති නැත. මේ අය අධික දුක් විඳ තම දියුණුව තමා විසින්ම උදාකර ගනී. කෙසේ හෝ සිය අරමුණට යනතුරුම මේ අය උත්සාහය අත නොහරී. කොතරම් දුක් වින්දද එය දුකක් ලෙස නොසිතීම මේ අයගේ විශේෂත්වයකි.

කුම්භ ලග්න හිමියන්ගේ ලග්නාධිපති වන්නේත් සෙනසුරුය. සෙනසුරු සමඟ බුධ, ගුරු බුධ, කුජ වැනි ග්‍රහයන් යෝග වී ඇත්නම් ඔවුන් බලවත්ව පිහිටයි නම් මේ අය ජීවිත කාලය පුරාම අනුකම්පාව දයාව ඇතිව කටයුතු කරන්නන් ලෙස ප්‍රකට වේ. කැපවීමෙන් වැඩ කරන උත්සාහය අත නොහරින අයකු වෙයි.

මීන ලග්න හිමියන්ගේ ලග්නාධිපති ගුරු ග්‍රහයාය. ගුරු මීන රාශියේ සිටින වෙලාවක සිකුරු එම රාශියේ උච්ච බලයෙන් සිටී නම් සුරූපී, කලාවට ප්‍රිය ඇත්තෙකි. අනුකම්පාසහගත සිතක් ඇත. අන් අයට උදව් කරන්නට පසුබට නොවේ.

මේ අනුව යම් ලෙසකට ලග්නාධිපතිට සහයෝගය දක්වන 1, 5, 9 ත්‍රිකෝණ අධිපතියන් 1, 4, 10 අධිපති ග්‍රහයන්ද උපතේ බලවත්ව ඇත්නම් ලැබෙන ප්‍රතිඵල දෙගුණ, තෙගුණ වීමට හේතු යෙදෙන බවත් පැවසෙනවා.
ජ්‍යොතිෂවේදී ජයශ්‍රී නන්දකුමාර