ඔබ ජ්යොතිෂවේදියකු ළඟට ඔබගේ කේන්දරය රැගෙන යන්නේ ඇයි? ඔබ ජ්යොතිෂවේදියකුගේ සේවය බලාපොරොත්තු වන්නේ ඇයි?
මේ ලියන මොහොතේ මට ඇසෙන්නේ දොළොස්වැන්නේ රාහු සිටින දරුවකුගේ කේන්දරයක් විද්යුත් නාලිකාවක් ඔස්සේ විශ්ලේෂණය කෙරෙන අයුරුය. එම දරුවාට 2016 සිට රාහු මහ දශාව ගතවෙයි. විද්යුත් නාලිකාවේ එම කේන්දරය විශ්ලේෂණය කළ ජ්යොතිෂවේදියා දුන් පිළියමක් වූයේ වැටකේ පැළයක් සිටුවා එම දරුවා ලවා එම පැළයට සාත්තු සප්පායම් කරවීමය. එම දරුවාගේ උපන් වේලාවට අනුව කේන්දරය සෑදූවිට පැහැදිලිවම පෙනෙන කරුණක් වන්නේ එම දරුවාගේ අධ්යාපනයට රාහු බරපතළ ලෙස හරස්කපන බවය. නිවැරැදිවම කියනවා නම් අ.පො.ස. සාමාන්ය පෙළින් එහාට තම අධ්යාපනය කරගෙන යෑමට රාහු එම දරුවාට කිසිදු ඉඩක් නොදේ. එය කේන්දරයේ පැහැදිලිවම තිබේ. එසේ වූ රාහු ගෙදරම ගෙනත් තියාගන්නා ලෙස එම ජ්යොතිෂවේදියා දෙන උපදේශය නිවැරැදිද? ඒ ගැන ඔබගේ අදහස කුමක්ද? ඔබ එම උපදේශය අනුමත කරනවාද?
අපල දුරුකිරීමේ නිවැරැදි ක්රමවේදය වසර ගණනාවක් පුරාම මා වරින් වර රටට ඉදිරිපත් කර තිබෙන නමුත් තවමත් ඒ පිළිබඳ නිසි අවබෝධයක් බොහෝ ජ්යොතිෂවේදීන් සතුව නොමැති වීම කනගාටුවට කරුණකි. අපල නිවාරණය සඳහා අනුගමය කළ හැකි ක්රමවේදයන් රාශියක් තිබේ. ග්රහයන් නියෝජනය කෙරෙන විවිධ සංකේතයන් හා ද්රව්ය හරඹ කිරීමෙන් ග්රහ බලපෑම් සමතුලනය කරන ක්රමවේදය අප රටේ බොහෝ ජ්යොතිෂවේදීන් අනුගමනය කරන ක්රමයයි. නමුත් ඒ කිසිවකුට ඔවුන් අපල නිවාරණය සඳහා ජ්යොතිෂයේ භාවිත කෙරෙන එම ක්රමවේදයේ සූක්ෂ්ම මූලධර්මයන් පිළිබඳ නිවැරැදි අවබෝධයක් නැති බව පැහැදිලිය. ප්රවීණ යැයි සැලකෙන අති බහුතරයක්ම පාහේ එසේ අවබෝධයක් නැති ගොන්නට අයත් වීම අප රටේ ජ්යොතිෂයේ දරුණුම ඛේදවාචකයයි. එම ප්රකාශය සාහසික නමුත් එය මා කරන්නේ දැඩි වගකීමෙනි. අප රටේ බොහෝ ජ්යොතිෂවේදීන් මාස කිහිපයක ජ්යොතිෂ පාඨමාලාවකින් පසු තම ජ්යොතිෂ ව්යාපාරය ආරම්භ කළ පසු ජ්යොතිෂය අධ්යයනය කිරීම නවත්වයි. නමුත් එසේ මාස කිහිපයකදී ලබන දැනුම ඔස්සේ අනුන්ගේ දෛවය විසඳීමට යෑම සාපරාධී අපරාධයක් බව කිව යුතු නොවේ. එසේම ගුරුවරු පවසන සියලු දේම කිසිදු වගවිභාගයකින් තොරව, විමසුමකින් තොරව පිළිගැනීමද නුවණට හුරු කරුණක් නොවේ.
යම් යම් අවස්ථාවල විවිධ මාධ්ය ඔස්සේ ග්රහ අපල පිළිබඳ ඔබව මුළාවට පත්වෙන අදහස් දැක්වෙන අතර, පහතින් මා දක්වන්නේ එවන් කාරණා තර්කානුකූලව ඔබට අවබෝධ කරගත හැකි තොරතුරු කිහිපයකි.
ඔබට සෙනසුරුගේ අපලයක් ඇති අවස්ථාවකදී වැඩි වශයෙන් නිල් පැහැයට හුරු ඇඳුම් ඇඳීමට යමෙක් උපදෙස් දීම සාපරාධී ක්රියාවකි. එය කිසිසේත්ම සුබඵල දෙන ක්රියාවක් නොව සෙනසුරුගේ ග්රහණයේ ඔබව තව තවත් හසුකරවන උගුලක් පමණි. ඒ නිල් පැහැය සෙනසුරුව නියෝජනය කරමින් සෙනසුරුව තව තවත් බලවත් කරන බැවිනි. එබැවින් නිල් පැහැති මල් පූජාකිරීම සෙනසුරුගේ අපලයක් ඇති අවස්ථාවකදී කළ හැකි සාර්ථක ප්රතිකර්මයකි. එහෙත් එයද හැම දෙනාටම සුදුසු වන්නක් නොවේ. එම නිල් මල් පූජා කළ යුතුද නැතිනම් වෙනත් කුමක් හෝ කළ යුතුද යන්න ඔබේ කේන්දරය අනුව වෙනමම සොයාබැලිය යුතු වෙයි.
ඔබේ කේන්දරයේ සඳු ග්රහයා අපල කරන්නෙක් නම් සඳුගේ නියෝජනය වන සුදු පැහැති ඇඳුම් වැඩි වශයෙන් ඇඳීම එම අපල තව තවත් තීව්ර කරවයි. එසේම සඳුගෙන් අපල තිබෙන විට සඳුගේ නියෝජනය වන මුතු ඇටය හා රිදී ලෝහයද එම අපලය ඇතිකරලීම සඳහා සඳුට තව තවත් ශක්තිය ලබාදෙයි.
ඔබේ කේන්දරයේ අඟහරු ග්රහයා තදබල ලෙස ඔබට අපල ඇතිකරන තත්ත්වයේ හිඳී නම් ඔහුගේ නියෝජනය වන රතු පැහැය ඇති ඇඳුම් පැලඳුම්වලට මුල්තැන දීමෙන් සිදුවන්නේ අඟහරුගේ ග්රහණයට ඔබ තව තවත් නතුවීමය. එසේම රතු මැණික් පැලඳීමෙන් සිදුවන්නේද අඟහරුගේ බලය තව තවත් වැඩිකිරීමය. ඔබ අඟහරුගෙන් අපල තිබෙන අයෙක් නම් රතු මැණික් පැලඳීම යනු එම අපලයෙන් ඔබව පීඩාවට පත්කිරීම සඳහා අඟහරුට ඔබම සහාය වීමකි. රත් පැහැති මල් වර්ග හා වෙනත් දේ පූජා කිරීම අඟහරුගේ අපල ඇති විට කළ හැකි නමුත් පූජා කරනවාද නැතිනම් එම දේවල්වලට වෙනත් කුමක් හෝ කරනවාද යන්න ඔබේ කේන්දරය බලා තීරණය කළ යුතු කාරණාවකි.
ඔබේ කේන්දරයේ අපල ඇතිකරන ග්රහයන්ගේ ගොඩට බුධ ග්රහයාද ඇතුළත් නම් කොළ පැහැති ඇඳුම් පැලඳුම්වලින් දුරින් දුරු වී සිටීම ඔබට ගුණදායකය. එසේම පච්ච මැණික් ගල් වැනි බුධගේ තදබල නියෝජනයන්ගෙන්ද හැකිතාක් ඈත් වී සිටිය යුතු වෙයි.
සිකුරු ග්රහයා ඔබේ කේන්දරයේ තැන්පත් වී සිටින්නේ ඔබට අපල ගෙනදෙන ආකාරයෙන් නම් සිකුරුගේ නියෝජනය වන සුදු පැහැ ඇඳුම් ඇඳීම අවම කළයුතු වෙයි. එසේම ඔබේ කේන්දරයේ සිකුරු ග්රහයා අයහපත් නම් දියමන්ති හෝ සුදු නිල් පැලඳීමෙන් වන්නේ ඔබ ඔබවම විනාශ කරගැනීමකි.
ගුරු ග්රහයා ඔබේ කේන්දරයේ අපල ඇති කරන්නකුගේ තත්ත්වයට පත්ව සිටී නම් ඔහුගේ නියෝජනය වන කහ හෝ රන්වන් වර්ණයන්ගෙන් ඔබ හැකිතාක් දුරුවී සිටිය යුතු වෙයි. එසේම ගුරුගේ නියෝජනයන් වන පුෂ්පරාග හෝ රන් ලෝහයද ගුරුගේ බලපෑම තව තවත් බලවත් කරන බැවින් ඔබේ කේන්දරයේ ගුරු අපල කරන්නෙක් නම් එම මැණික් හෝ ලෝහ පැලඳීමෙන් ඔබ කරන්නේ ගුරුට තම අපලය ඔබ මත පැටවීමට තව තවත් අනුබල ලබා දීමයි.
ඉහත මා සඳහන් කළ කරුණු අවබෝධ කර ගැනීමට ඔබට හැකි නම් ග්රහ අපල නිවාරණයට අනුගමනය කළ යුතු සරල මූලධර්මය ඔබට පහසුවෙන්ම අවබෝධ කරගත හැකි වනු ඇත. මා ඔබව නිතරම උනන්දු කරවන්නේ ජ්යොතිෂය සම්බන්ධ ඔබට අසන්නට, දකින්නට ලැබෙන කරුණු කාරණා හැමවිටම තර්කානුකූලව සිතා බලා අවබෝධ කරගැනීමට උත්සාහ කිරීමටය. එසේ වන විට වැරදි තොරතුරුවලින් ඔබව මුළා කිරීම අපහසු වනු ඇත. ඔබට අපල කරන ග්රහයා හැකි හැම උත්සාහයක්ම දරන්නේ ඔබව එම අපලයේ කොටුකර තබාගැනීමටය. ඔබට අපල කරන සිකුරු ග්රහයා ජ්යොතිෂවේදිනියකගේ වේෂයෙන් පැමිණ ඔබට සුදු ඇඳුම් අඳින ලෙසට, දියමන්ති හෝ සුදු නිල් පලඳින ලෙසට උපදෙස් දෙනු ඇත. ඒ ඔබව තම අපලයේ සිරකර තැබීමටය. එය අවබෝධ කරගන්න
ජ්යොතිෂවේදී ජනක බණ්ඩාර නවරත්න