සිහිනයක් දැක්කොත් බයවෙලා, දහදිය දාගෙන, කෑගහලා නැඟිටින්නද කැමැති. නැතිනම් දකින සිහිනය තව තව රසවිඳිමින් නිදියන්නද කැමැති. සිහිනය සුන්දර වුණත්, භයංකර වුණත් පලාපලය අප හිතනවාට වඩා බොහෝ වෙනස්. ලස්සන හීනයක පලාපලය අසුබ අනාවැකියක් වෙන්න පුළුවන් වගේ භයංකාර සිහිනයක පලාපල වාසනාවන්ත ලකුණක් වෙන්න පුළුවන්. ඒ කොහොම වුණත් ජ්යොතිෂයේ සිහින පලාපල විෂය අනුව නම් හැම සිහිනයකම පලාපලයක් තියෙනවා. අප නොසිතුවාට ඒ පලාපල හොඳ නරක ආදී වශයෙන් අපේ ජීවිතයට බලපෑම් කරනවා. එම නිසා සිහින පලාපල නිවැරැදිව දැනගෙන සිටීමෙන් අනාගතයේ සුබ – අසුබ සඳහා සූදානම් වෙන්න පුළුවන්.
මාළුන්ට බත් දමනවා සහ ඒ අතරවාරයේදී මාළුවකු අත සපා කනවා වැනි සිහිනයක් දැකීමෙන් ඔබට හිමිව තිබූ තනතුරක් ඉදිරි දිනකදී අහිමි වන බව හඟවයි.
තම ඉඩම පුරා ඇපල් සහ මිදි වැවී තිබෙනවා දුටුවොත් කීර්ති, ප්රශංසා හිමිවන බවට ලකුණකි.
ගඟක් අසල ගිනි මැලයක් ගසන වැද්දන් වැනි පිරිසක් සිහිනෙන් දුටුවොත් දිගු කලක් තිබූ ඔබේ මිතුරුදමක් බිඳවැටී යනවා ඇත.
මියගිය අයකුගෙන් කිරි ඉල්ලනවා සිහිනෙන් දැකීම පවුලේ සාමාජිකයකු දැඩි සේ රෝගී වී අසාධ්ය තත්ත්වයට පත්වන බවට නිමිත්තකි.
කියතකින් ගලක් දෙපළු කරන මිනිසුන් පිරිසක් සිහිනෙන් දැකීම සෙනසුරුගේ අපලයට ගොදුරු වූ බව හඟවන්නකි.
මුහුදේ පිහිනන විට ගල්පරයක හැපෙනවා සිහිනෙන් දකීනම් තදබල වංචාවකට හසුවීමට ගොස් බේරීමට හැකි වන බවට පෙරනිමිත්තකි.
කැලෑවට ගිය ඉඩමක් තවත් පිරිසක් සමඟ එළිපෙහෙළි කරනවා දුටුවොත් සෙනසුරු අපලය ඇති කාලයකි. සැප සම්පත් අඩුවෙයි.
ගෙදර හැම බිත්තියකම සිදුරක් තිබෙනවා දැකීම විශාල අගහිඟකමකට මුහුණදීමට හේතුවකි.
මුළුතැන්ගෙයි ඇති සියලු මැටි බඳුන් බිඳී තිබෙනවා දුටුවොත් එම නිවෙසට තදබල යක්ෂ දෝෂයක් ඇති වීමට ඉඩ ඇත.
ගෙමිදුලේ අලංකාර ලෙස වගාකර තිබූ ගොටුකොළ ගවයන් කනවා දුටුවොත් තෑගිබෝග හිමිවෙයි.
පිටිකොටන අවස්ථාවක වංගෙඩිය දෙකට පැළීයනවා සිහිනෙන් දුටුවොත් සැමියාට හෝ බිරියට මාරක අපලයකි.
ගේ ඉදිරිපිට පාට පාට නූල් අදින කාන්තාවන් පිරිසක් දකීනම් ආදර බැඳීමක් ඇතිවන බවට ඉඟියකි.
පිරිසක් ගස්වල ගිනිපන්දම ගැටගසනවා සිහිනෙන් දකීනම් සොර සතුරු කරදරයකට ලක්වෙන ලකුණකි.
ජ්යොතිෂවේදී අනුර ඒකනායක
