හෙළ වෙද රහස්

සුවෙන් ඉන්න හැඩට ඉන්න අපි හැමෝම වගේ කැමතියි. ඒත් අපිට එහෙම ඉන්න ටිකක් විතර ඔන්න අමාරුයි. මොකද අපි එහෙම ඉන්න හදනකොට ඔන්න පොඩි පොඩි බාධාවන් එනවා. අපිත් ඒ දේවල් ඔළුවට ඇරන් දුක් විඳිනවා. ඒත් ආයෙමත් එහෙම දුක් විඳින්න උවමනාවක් නෑ. මොකද අපි ඔබට අද පාරම්පරික අත් වෙදකම් ටිකක් කියනවා. ඒ ටික ඔබ හරියට කළොත් කියවන ඔබටත් දැන් ඉඳන්ම සුවෙන් ඉන්න පුලුවන්.
(01) දත් කැක්කුමක් ඇවිත්ද?
ලුණු වතුරට විනාකිරි ස්වල්පයක් කලවම් කර කට සෝදන්න.
(02) ඇස් දෙක දනවා වගේද?
සමන්පිච්ච මල් වතුර භාජනයකට දමා රැයක් පෙඟෙන්නට හැර එයින් වාර කිහිපයක් ඇස් සෝදන්න.
(03) ඉන්නන්ට කරන්නේ මොකක්ද?
එඬරු තෙල් හෝ විනාකිරි දින කිහිපයක් ඉන්නනගේ ගාන්න. එසේ නැත්නම් බුරුල්ල ගෙඩි පොඩිකර ඉන්නන් මත ගාන්න.
(04) විළුඹ ඉරි තළලා ගිහින්ද?
සබන් මිශ්‍ර උණු වතුරෙන් විළුඹ සෝදා ඔලිව් තෙල් ගාන්න.
(05) හිස කෙස් ගැලවෙනවද?
පොල් කිරි ස්වල්පයක් ගෙන ඊට දෙහි ගෙඩියක ඉස්ම මිශ්‍ර කර හිසකෙස්වල හොඳින් පිරිමදින්න.
(06) නියපොතු අස්සේ වණ වෙලාද?
ලුණුවරණ කොළ දිය ලුණු සමඟ කොටා නියෙහි බඳින්න.
(07) සම පැහැපත් නැද්ද?
සැවැන්දරා මුල් සහ සුදු හඳුන් දෙවර්ගය ඇල් දියෙන් අඹරා සම මතුපිට ගාන්න.
(08) දදවලින් අවුලක්ද?
ඇත්තෝර කොළ ගෙන අමුකහ සමඟ අඹරා දදයේ ගාන්න.
(09) ඉකිළි කහනවා වගේද?
උණු දියෙන් හොරි ගෙන්දගම් අඹරා ඉකිළි තුළ ගාන්න.
(10) හිස්හොරි බෝ වෙලාද?
නෙල්ලි සහ උළුහාල් පොල්කිරට දමා තම්බා හිස සෝදන්න.
(11) හිසකෙස් කළු මදිද?
වදමල් අඹරා සතියකට තුන්වරක් හිසකෙස්වල ගාන්න.
(12) හිසකෙස් යනවද?
ඔලිව් තෙල් පොල්තෙල් පහනින් රත්කර හිසකෙස්වල ගාන්න.
(13) කුරුලෑත් ප්‍රශ්නයක්ද?
කලාඳූරු අල තන කිරෙන් අඹරා ගාන්න. එසේ නැත්නම් හක්බෙලි කටු දෙහි ඇඹුලෙන් උරච්චි කරගන්න. එසේත් නැත්නම් ආහාර ගත් පසු පිටි අල්ලෙන් මූණ පිසින්න. එය එක්තරා කෙමකි.
(14) අළුහම් තිබෙනවාද?
ඇඹුල් පේර කොළ අමුකහ සමඟ කොටා එම යුෂ අළුහම් ඇති තැන්හි ගා පැයකට පසුව නාන්න.
(15) ඇස් වටේ නගන එනවද?
හීන් තුත්තිරි බඩය ඇඟිල්ලට තදකර සීරීමෙන් වෑහෙන යුෂය කතා නොකර නගනයේ ගාන්න. මෙය කෙමකි.
නලින්ද සෙනෙවිරත්න