“කලර්” සහ “නිමි” යන චිත්රපට දෙක හරහා දේශීය සිනමා ක්ෂේත්රයට නව රසයක් එක් කළ තිරපිටපත් රචක හා අධ්යක්ෂ ඉසුරු වීරසිංහ මුදලි, මෙම වසරේදී තවත් විශේෂ නිර්මාණයක් ප්රේක්ෂක ඔබට තිළිණ කිරීමට සූදානම් වී ඇත. ඒ “කොකෝ-තෙත හදවතක කතාවක්” නම් චිත්රපටයයි. සාම්ප්රදායික කතා තේමාවලින් ඉවතට ගොස්, වෙනස්ම ආකාරයේ හැඟීම් රැගත් මෙම නිර්මාණය, ලංකාවේ ප්රථම වරට වීදි සතුන් වෙනුවෙන් නිපදවූ සිනමා කෘතියක් ලෙසත් විශේෂත්වයක් දරයි. මනුෂ්යත්වය සහ දයාව එකිනෙකට බැඳුණු අලුත් කතාවක් ලෙස “කොකෝ” ප්රේක්ෂක හදවත් තෙත් කිරීමට සූදානම් වෙයි. ඔහුගේ නවතම නිර්මාණය “කොකෝ” පිළිබඳව ඔහු මව්රට හාට් අපට අදහස් දැක්වූයේ මෙසේය .Sri Lanka Latest News
ඉසුරු, ඔබට තියෙන්නේ වෙනස් ඇහැක් නේද?
ලෝකය පුරා විවිධාකාරයේ සිනමා නිර්මාණ බිහිවෙමින් පවතින අතර, ලංකාවේ බොහෝ කාලයක් චිත්රපට නිර්මාණය වී තිබුණේ සම්ප්රදායික සමාජ ගැටලු හා ප්රේම සබඳතා වැනි තේමාවන් වටායි. එහෙත් 2023 සිට 2025 දක්වා වූ කාල පරාසයේදී, වෙනස් සහ නවීන තේමාවන් ආශ්රිතව නිර්මාණය වූ චිත්රපට හේතුවෙන් ලාංකීය සිනමාව ක්රමයෙන් ස්වර්ණමය යුගයක් කරා වර්ධනය වන්නට වුණා .
ඒ කාලයේ මම මගේ යාළුවා ශිවංක විතානගේ සමග කලම්බෝ මූවීස් කියලා ෆිල්ම් කම්පැනි එකක් පටන් ගන්නවා. එයින් අපිට ඕනි වුණා ප්රේක්ෂක ආකර්ෂණය තියෙන වෙනස් ආකාරයේ චිත්රපට නිර්මාණයන් කරන්න.
මොකක්ද එතකොට මේ හදවත් තෙත් කරන්න යනවා කියන්නේ ?
මේ මගේ තෙවන නිර්මාණය. මෙය නිපදවූයේ වීදි සතුන් වෙනුවෙන්. ලංකා ඉතිහාසයේ පළමු වරට තමයි මෙහෙම නිර්මාණයක් කරන්නේ. චිත්රපටයේ නම “කොකෝ”. මේක ව්යාපෘතියක් විදිහට වසර පහකට කලින් සිට නිර්මාණය වූවක්. 2025 දී තමයි රූගත කිරීම් ආරම්භ කළේ. මෙහි තිරපිටපත කළේ මම සහ මෙය වසර පහක ප්රතිඵලයක්. මේ චිත්රපටයේ ඇක්ට් කරන බලු පැටියව අපි පාරේ ඉඳන් තමයි අරගෙන ආවේ. නානාප්රකාර කණ්ඩායම් මේ නිර්මාණයට සම්බන්ධ වුණා. සාමාන්ය චිත්රපටයකට වඩා මෙය වෙනස්. මිනිස්සුන්ට වඩා සතුන් එක්ක මේ නිර්මාණය කරන්න වීම නිසා මෙය සැලසුම් කරන්න තිබුණා .
ඔබ නවකයින්ට අවස්ථාව දෙන කෙනෙක්?
ඔව්. මේ නිර්මාණය ඇතුළේ නම ගිය තාක්ෂණික කණ්ඩායමක් වැඩ කළේ නැහැ. මෙහි වැඩ කළේ “සොයන්නෝ” කියලා අලුතින් සිනමාවට එක්වන සිනමාවට ඇල්මක් දක්වන සිනමාව සම්බන්ධ විශ්ව විද්යාලවල හැදෑරීම් කරන විද්යාර්ථයන් සහ සිනමාව කලාව සොයා යන කණ්ඩායමක් තමයි රංගන කටයුතු හැර තාක්ෂණික හා අනෙකුත් සියලුම දේ සිදු කරන්නේ.
ඔබ හිතුවා මේ නිර්මාණයෙන් මිනිස්සු හිතෙන විදිහ වෙනස් කරවන්න?
මමත් මගේ කණ්ඩායමත් පාරේ ඉන්න සතුන්, සොබාදහම, ගහකොළ ගැන සංවේදී පිරිසක්. අපි ගමන් යද්දී හෝ ෂූට්වලට යද්දී පාරවල්වල බොහෝ දුක් විඳින සතුන් දකින්න ලැබෙනවා. ඒත් ඒ හැම එකකටම විසඳුම් දෙන හැකියාව අපිට නෑ. ඒකට අවශ්ය ඉඩකඩ, කාලය, සම්පත් නැති නිසා. ඒ නිසා අපි හිතුවේ මිනිස්සු හිතන විදිහ වෙනස් කරන්න ඕනේ කියලා. ඒකට හොඳම මාධ්යයක් විදිහට කලාව තෝරගත්තා.
ඔබට මේ නිර්මාණය කරන එක අභියෝගයක් වුණාද?
රූගත කිරීම්වලදී ෆේල් වීම් තිබුණා. දවස් 2-3ක් පමණක් ඩෝග් ටේරනර් කෙනෙකුගේ සහාය ලැබුණා. ඒ හැරුණු කොට දවස් 35ක ෂෙඩ්යුල් එක පුරාවට ‘කොකෝ’ හැසිරවූයේ මමත් මගේ කණ්ඩායමත්. අවුරුදු ගණනක් පුහුණු කරපු සතෙක් නෙමෙයි මේ. ඒ නිසා ඒක විශේෂ අත්දැකීමක් වුණා.
එතකොට ඉසුරු, මේ සිනමාපටයේ අරමුණ?
මේ කතාව සතුන් ගැන විතරක් නෙමෙයි මනුෂ්යත්වය ගැනත් කියවෙනවා. අද සමාජයේ අපි කොතැනද ඉන්නේ කියලා හිතන්න වුණු අවස්ථා තිබුණා. කුඩා කාලයේ තියෙන සහකම්පනය අපි ලොකු වෙද්දී අහිමි වෙනවා. ඒක වෙනස් වෙන්න ඕනේ. ඒක තමයි මේ චිත්රපටය තුළින් අපි කියන්න හදන්නේ. සතුන් ගැන දයාබර හැඟීමක් ඇති කිරීම, පාරට ගෙනත් දාන සංස්කෘතිය වෙනස් කිරීම, වන්ද්යකරණය ගැන තියෙන වැරදි මත වෙනස් කිරීම, මේවාත් අපේ අරමුණු අතර තියෙනවා.
ආලෝකාගෙයි මේ නිර්මාණයයි අතර සම්බන්ධය මොකක්ද? ඔබ ආලෝකාව භාවිතා කරලා ඔබේ ෆිල්ම් එක මාකර්ට් කරගත්තා නේද?
එක එක වෙළෙඳ දැන්වීම් තියෙනවා ප්රවීණයන්, ප්රසිද්ධියට පත් අය යොදාගෙන කරන. මේ නිර්මාණය ගැන ප්රචාරණයේදී ලෝකයේ ඉන්න සෙලිබි්රටි විදිහට මෑත කාලයේ ප්රසිද්ධියට පත් ඉන්දියාවේ වීදි සතෙක් වූ ආලෝකා ලෝක සාම පාගමනක යන අතර ලංකාවට පැමිණෙනවා. ඒ පැමිණීම අපිට වාසනාවක් වුණා. ලෝක සාම පාගමනක් එක්ක ආපු ඒ වීදි සතාට ලැබුණු ආදරය දැක්කම, අපේ රටේ අනෙක් වීදි සතුන්ටත් ඒ වගේම සෙනෙහස ලැබෙන්න ඕනේ කියලා අපි හිතුවා. ඒ නිසාම “කොකෝ” සහ “ආලෝකා” අතර තිබුණ සමානත්වය, දෙදෙනාම වීදි සතුන් වීම භාවිතා කරලා මේ නිර්මාණයේ පණිවුඩය සමාජගත කරන්න අපි උත්සාහ කළා.
ඔබ මේ චිත්රපටය සඳහා එකතු කරගත් චරිත ගැන මතක් කරමු…
මෙහි ප්රධාන චරිතය කොකෝ. ඒ චරිතයේ වයස් අවස්ථා තුනක් වෙනුවෙන් සතුන් තුන්දෙනෙක් යොදාගෙන තිබෙනවා. සනුති ගයන්ගා කියන කුඩා දියණිය රඟපාන ප්රධාන චරිතය වටා කතාව ගෙතෙන්නේ. සුසිලා කෝට්ටගේ, සෙනලි ෆොන්සේකා, අමිත්ත වීරසිංහ, ලෝචනා, නිම්මි වගේ ප්රවීණ සහ නවක රංගන ශිල්පීන් මෙයට එක්වෙනවා. චරිත ගණන අඩුය. නමුත් කතාව ගැඹුරුයි.
චිත්රපටය මේ වසරේදී තිරගත කරනවාද?
මෙම චිත්රපටය මේ වසර අවසන් වීමට පෙර තිරගත කිරීමට අපි බලාපොරොත්තු වෙනවා. ඒකට අමතරව ජුනි-ජූලි අතර විදේශ ප්රදර්ශන සඳහාත් සැලසුම් කරමින් ඉන්නවා.
ඔබට මේ සඳහා උදවු කළ පිරිසක් ඇති ?
මෙම චිත්රපටයේ තිරපිටපත, කතාව හා අධ්යක්ෂණය කරන්නේ මම. මට අමතරව අධ්යක්ෂණයෙන් අපේ ‘සොයන්නෝ’ කණ්ඩායමේ සශිකා වතුදුර සම්බන්ධ වෙනවා. ඊට අමතරව මේ චිත්රපටය ඇතුළේ හයියක් වු කණ්ඩායමක් ඉන්නවා. ශිවංක විතානාරච්චි තමයි මෙහි නිෂ්පාදකයා ලෙස පසුබිමේ සිට කටයුතු කරන්නේ. කණ්ඩායම වැටෙන්න නොදී ඔසවා තබා ඉන්නේ ඔහුයි. මේ විෂය සම්බන්ධව ලංකාවේ සිටින ලොකුම ව්යාපෘති කණ්ඩායම “බව් බව්” අපට විශේෂඥ දැනුම හා ඒ අදාළ පහසුකම්, අසීමිත උදවු උපකාර රැසක් මේ වෙනුවෙන් සිදු කරනවා. බව් බව් කණ්ඩායමේ ගිහාන්, පෙට් ටෝක්හි අශාන්, අපට ප්රචාරණ කටයුතු සඳහා අනුග්රාහකත්වය ලබා දෙන ටි්රලියම් ඇනිමල් කෙයාර් ආයතනය, ප්රොඩක්ෂන් එකේ සියලු බර අදින සුබෝදී තත්සරණී , සොයන්නෝ කණ්ඩායමටත් මේ අවස්ථාවේදී ස්තූති කළ යුතුයි.
ස්ටෙෆනි කොතලාවල
