රඟපානවා තරම් සතුටක් තවත් නැහැ…
‘අග්නි පියාපත්’ තුළින් තමයි මාව ගොඩදෙනෙක් දැනහඳුන ගත්තේ…
බියගම ප්රදේශයෙන් අවුරුදු කුමරියක ලෙසට අභිෂේක ලබමින් 2021 ‘දෙරණ අවුරුදු කුමරිය’ අවසන් දසදෙනාට තේරීපත් වෙමින්ද ‘හිරු ඇවිදින්’ ටෙලිනාට්ය තුළින් රංගන වරම් හිමිකර ගනිමින්, නව පරපුරේ තරු ගොන්නට එකතු වුණු ඇය නයනි රාමනායක නව පරපුරේ දක්ෂ රංගන ශිල්පිනියක් වී හමාරයි. ඉතින් මේ ආපු ගමනේදී නයනි නිරූපණය කළ චරිත සියල්ල ගැන කා අතරත් කතාබහට ලක්වෙලා. ඒ ගැන කතා කරන්න අපි ඇයව සම්බන්ධ කරගත්තා…
නයනි ඉතින් කොහොමද මේ දවස්වල කලාකටයුතු සමග ඔබ ගෙවන ජීවිතය?
‘ධරණි’ ටෙලිනාට්යයේ ‘සුලෝචනා’ ලෙසට රඟපානවා. ඒ වගේම තිළිණ බොරලැස්ස අධ්යක්ෂණය කරන අලුත්ම ටෙලිනාට්යයේ රූගත කිරීම් සඳහා සම්බන්ධ වෙනවා. එයට අමතරව රවින්ද්ර විජේරත්නගේ ‘කටු රෝදය’ ටෙලිනාට්යයේ රොඞ්නි වර්ණකුලසූරියගේ ‘පෙම්වතිය’ ලෙසට රඟපානවා.
නයනිගේ ගම් පළාත කොහෙද?
මම බියගම ප්රදේශයේ.
එතකොට පාසල..?
කිරිබත්ගොඩ විහාරමාහාදේවි බාලිකා විද්යාලය.
පවුලේ අය ගැන මතක් කළොත්?
මගේ තාත්තා විශ්රාමික පොලිස් නිලධාරියෙක්. අම්මා පාසල් ගුරුවරියක්. මගේ අයියා වෛiවරයෙක්. ඔහු දැනට යාපනයේ රෝහලේ සේවය කරනවා.
ඉතින් ඇයි ඔබ කලාව තෝරාගත්තේ?
පොඩි කාලේ ඉඳලා මගේ තිබුණු එකම ආශාව පොලිස් නිලධාරියෙක් වෙන්න තමයි. තාත්තා නතර කරපු ගමන ඉදිරියට ගෙනියන්න රට වෙනුවෙන් සේවය කරන්න. ඒත් මගේ උස මදි නිසා මාව තෝරාගත්තේ නැහැ. තවමත් මගේ ඒ ආශාව තියෙනවා. අවස්ථාව ලැබුණොත් රට වෙනුවෙන් සේවය කරන්න මම අනිවාර්යයෙන්ම යනවා.
ඉතින් දිගටම මේ කලාව කරගෙන යන්න අදහසක් නැද්ද?
දැන්නම් ගොඩාක් කැමැතියි. රඟපානවා තරම් සතුටක් තවත් නැහැ. මොකද මොන වෘත්තියක සේවය කළත් මේ ලැබෙන සතුට, ආදරය වෙන දේවල්වලින් ගන්න බැහැ. පාන්දර දෙගොඩහරියේ ෂූටින් යන්න පවා සිදුවෙනවා. නමුත් නිර්මාණය විකාශය වෙනකොට ලැබෙන සතුට අප්රමාණයි.
ඒ කියන්නේ හදවතින්ම කලාවට බැඳිලා?
අනිවාර්යයෙන් දැන් රඟපෑම මගේ ජීවිතයේ කොටසක් වෙලා තියෙන්නේ. මම හුස්ම ගන්නේ මේ ලැබෙන ප්රේක්ෂක ප්රතිචාරත් එක්ක. එතකොට මට දැනෙනවා මම ජීවත් වෙනවා කියලා සතුටක්.
ඔබ නිරූපණය කළ ‘ආශා’ චරිතය ගැන කතා කළොත්?
‘අග්නි පියාපත්’ ටෙලිනාට්ය තුළින් තමයි මාව ගොඩදෙනෙක් දැනහඳුන ගත්තේ. නැවැත ‘අග්නි පියාපත්’ ටෙලිනාට්ය විකාශය වෙනවා. ‘ආශා’ කියන්නේ දුප්පත්, අහිංසක චරිතයක්. ඒ චරිතයට තවමත් හොඳ ප්රතිචාර මට ලැබෙනවා. මම මෙයට පෙර එවැනි චරිතයක් කරල නැති නිසා ගොඩාක් ආශාවෙන් තමයි කළේ.
‘කටු රෝදය’ සමග ඔබේ රංගනය වෙනස්ම පැත්තකට යොමුවන බව ආරංචියි?
ඔව්… මම කොමඩි චරිතයක් කරන්නේ. ඒ වගේම ඒ ටෙලිනාට්යයේ ප්රවීණ ශිල්පීන් රැසක් සමග කරටකර මම රඟපානවා. ඔවුන්ගෙන් ලැබුණු සහාය මට ගොඩාක් වටිනවා. ඉදිරියේදී ‘කටු රෝදය’ සමග මගේ රඟපෑම දැකගන්න පුළුවන්.
‘හිරු’ත් සමග මේ ආපු ගමන ගැන මොකද හිතෙන්නේ?
චාමර සමරවික්රම සර් හරහා තමයි මට ජයප්රකාශ් සිවගුරුනාදන් සර්ව දැනහඳුන ගන්න ලැබුණේ. ‘හිරු ඇවිදින්’ ටෙලිනාට්යයේ තමයි මම මුලින්ම රඟපෑවේ. ඉතින් ගොඩාක් සතුටුයි. ඉතාමත් කෙටි කාලයක් තුළ මේ වගේ තැනක් මට හිමිවුණු එක ගැන.
නව පුරපුරේ රංගන ශිල්පි චානුක ප්රබුද්ධට ඔය තරම් කැමැති ඇයි?
ඔහුගේ රඟපෑමට මම ගොඩාක් කැමැතියි. ‘සකු’ ටෙලිනාට්ය මම ආශාවෙන් බැලුවා. ඉතින් ඔහුගේ පෙම්වතිය සමග මට රඟපාන්න නිර්මාණයක අවස්ථාවක් ලැබෙනකම් මම ආශාවෙන් ඉන්නවා.
නයනිගේ පෙම්වතා එතරම් කැමැති නැහැ නේද රඟපානවට?
එහෙම අකැමැති වෙන්න මට පෙම්වතෙක් නැහැ තවම.
ඉදිරියේදී ආදරය කරන්න කෙනෙක් ලැබුණොත්?
මෙහෙමයි… මාව තේරුම් අරගෙන මගේ ගමනට උදවු කරන කෙනෙක් මට ආදරය කරන්න ලැබෙයි කියලා මම විශ්වාස කරනවා. කවදහරි කසාද බැඳලා රඟපාන්න එපා කිවුවොත් ඉතින් මම කලාවෙන් සමුගනී. නැත්නම් ඉතින් ජීවිත කාලයම මේ ක්ෂේත්රයේම රැඳෙන්න තමයි බලාපොරොත්තුව.
-වසන්ත විතාරණගේ
