පසුගිය දින කිහිපය පුරා ලංකාවේ සමාජ මාධ්ය පරිශීලකයන් අතර දැඩි කතාබහට ලක්වූ, එසේම බොහෝ දෙනකුගේ අතින් දැඩි විවේචනයට සහ චරිත ඝාතනයට ලක්වූ ඡායාරූප සහ වීඩියෝ පෙළක් ඔබත් දකින්නට ඇත.Sri Lanka Latest News
‘මෙන්න ලංකාවේ ප්රමුඛ පෙළේ බාලිකා පාසලක ඉංග්රීසි ටීචර්ගේ වැඩ… මැලේසියාවේ තරගයකට ගිහින් බිකිනියකින්… විදුහල්පතිනියගෙන් විනය පියවර ඉල්ලයි’ වැනි උණුසුම් සහ නොමග යවන සුළු මාතෘකා යොදමින්, ෆේස්බුක්, ටික්ටොක් සහ යූටියුබ් හරහා මෙම පුවත ලැව්ගින්නක් සේ පැතිර ගියේය. නමුත්, Fact-Check පරික්ෂාවලදී හෙළිවූ සැබෑ සත්යය කුමක්ද?
ඇය ලංකාවේ ගුරුවරියක්ද? කොහෙත්ම නැත. අදාළ ඡායාරූපවල සිටින යුවතිය ශ්රී ලංකාවේ පදිංචිකාරිනියක්වත්, මෙරට පාසලක ඉංග්රීසි උගන්වන ගුරුවරියක්වත් නොවේ. ඇය ලතින් ඇමෙරිකානු රටක් වන ගුවාතමාලාවේ පදිංචි ජෙයිමි ස්ටෙෆනි හර්නැන්ඩෙස් රෙයිනා නමැති 25 හැවිරිදි තරුණියකි. ඇය Universidad Rafael Landivar හි සමාජ වැඩ (Social Work) පිළිබඳ තාක්ෂණික උපාධිධාරිනියකි.
තරගය පැවැත්වුණේ මැලේසියාවේද? නැත. මෙය මැලේසියාවේ පැවැති ජාත්යන්තර තරගයක් නොවේ. මෙය 2026 ජූලි 11 වැනි දින ගුවාතමාලාවේ Alta Verapaz පළාතේ Coban නගර සභාව මගින් සංවිධාන කරන ලද Nuestra Belleza Monja Blanca 2026-2027 2026-2027 ප්රාදේශීය රූ රැජින තරගයයි.
මෙම තරගයේ නගර සභා 17ක් නියෝජනය කරමින් ඉදිරිපත් වූ තරගකාරියන් 15 දෙනා අතුරින් අවසන් වටයට තේරීපත්වුණු මෙම තරගකාරියගේ පිහිනුම් ඇඳුම් (Swimwear) වටයේ ඡායාරූප මෙලෙස ලංකාවේ සංවේදී පුවත් මවාපාමින් Likes/Views ලබාගන්නා පිටු විසින් අවභාවිත කර තිබුණි.
මෙම ව්යාජ පුවත හරහා සමාජයේ අතිශය වැදගත් මාතෘකාවක් කරළියට පැමිණියේය. ඒ ‘ගුරුවරියකට හෝ වෙනත් වෘත්තිකයෙකුට තරගයකදී බිකිනියක් ඇඳීම අකැපද?’ යන්නයි.
පාසලක් හෝ පන්ති කාමරයක් තුළ සාරිය හෝ සුදුසු වෘත්තීය ඇඳුම ඇඳීම ගුරුවරියකගේ වගකීමයි. නමුත් පාසලෙන් පිටත, කායවර්ධන,මෝස්තර නිරූපණය හෝ පිහිනුම් වැනි තරගයකට ඉදිරිපත් වන විට, ඒ ඒ ක්ෂේත්රයට අදාළ නිල ඇඳුම ඇඳීම එම තරගාවලියේ ප්රමිතිය සහ නීතියයි.
වෘත්තිය කුමක් වුවත්, තමන්ගේ පෞද්ගලික කාලය තුළ නීත්යානුකූල ක්රීඩාවක නිරත වීමට ඕනෑම අයෙකුට අයිතියක් ඇත. ඇඳුම මත පමණක් පදනම් වී කෙනකුගේ චරිතය හෝ වෘත්තීය ගෞරවය මැනීම අතීතකාමී සමාජ අගතීන්ගේ ලක්ෂණයකි.
මෙම සිදුවීමෙන් නැවත වරක් තහවුරු වූයේ අපේ සමාජ මාධ්ය භාවිතය කෙතරම් පරිණත නැතිද යන්නයි.
ඡායාරූපයක් දුටු සැණින් ඒ පිළිබඳ Google Reverse Image Search එකක් දමා හෝ සත්යාපනය කරගැනීමට තරම් තාක්ෂණික දැනුමක් හෝ ඉවසීමක් අපේ බහුතරයකට නැත. සත්ය තොරතුරු සෙවීම පසෙකලා, ‘සංස්කෘතිය’ පෙරට දමාගනිමින් නොදන්නා කාන්තාවකට කුණුහරුපයෙන් බැණවැදීමට සහ චරිත ඝාතනය කිරීමට බොහෝ දෙනෙක් කැමැතිය.
අද රටේ පවතින අධ්යාපනයේ සැබෑ ප්රශ්න ගැටලු ගැන කතාකිරීමට වඩා අන් අයගේ පෞද්ගලික ජීවිතයට එබිකම් කිරීමට සමාජය දක්වන රුචිකත්වය මෙයින් පෙන්නුම් කෙරේ.
අවසාන වශයෙන්… අන්තර්ජාලයේ දකින ඕනෑම බොරුවක් ඇත්ත කියා අදහාගන්නා, තොරතුරු සොයා නොබලන සමාජයකින් බිහිවන්නේ රැවටීමට ලක්වෙන ජනතාවකි. සමාජ මාධ්යවල දකින සෑම දෙයක්ම ෂෙයාර් කිරීමට හෝ ඒ මත පදනම්ව කෙනෙකුට අපහාස කිරීමට පෙර, එහි ඇත්ත නැත්ත සොයාබලන බුද්ධිමත් පරිශීලකයන් බවට පත්වීම අප සියල්ලන්ගේම වගකීමකි.
Thilini Warushawithana
