සෙලාන් බැංකුව චෙක්පත් නිෂ්කාශන සේවා කාලය දීර්ඝ කරයි

සෙලාන් බැංකුව ශ්‍රී ලංකාවේ ප්‍රථම වරට චෙක්පත් නිෂ්කාශන සේවා කාලය දීර්ඝ කිරීමට පියවර ගෙන තිබේ. එම නිසා දැන් ගනුදෙනුකරුවන්ට දවසේ මෙතෙක් පැවති සීමාවෙන් පසුව පවා චෙක්පත් තැන්පත් කිරීමට අවස්ථාව ලැබෙන අතර එම චෙක්පත්වල මුදල් පසු දිනයේදීම අදාළ ගිණුම්වලට බැරවනු ඇත.
ගනුදෙනුකරුවන්ගේ අවශ්‍යතා නිවැරැදිව හඳුනාගෙන එම අවශ්‍යතාවන්ට නිසි විසඳුම් ලබාදීම සඳහා සෙලාන් බැංකුව ගන්නා නිරන්තර උත්සාහයේ තවත් ප්‍රතිඵලයක් ලෙස මෙය හැඳින්විය හැකි වේ. ආරම්භයේදී මෙය ගාල්ල, මහනුවර, කිරිබත්ගොඩ, කුරුණෑගල, මාතර, නුගේගොඩ, පානදුර, පිටකොටුව, වෙන්නප්පුව, වැල්ලවත්ත සහ මිලේනියම් යන ශාඛාවල ක්‍රියාත්මක වනු ඇති අතර ඉදිරියේදී එය තවදුරටත් ව්‍යාප්ත කිරීමට සැලසුම් කර ඇත.
මේ පිළිබඳ අදහස් දක්වමින් සෙලාන් බැංකුවේ නියෝජ්‍ය සාමාන්‍යාධිකාරී (මෙහෙයුම්) මලික් වික්‍රමනායක මහතා මෙසේ පැවසීය. “වර්තමානයේ ආර්ථික රටාවේ වේගය දෙස බලන විට අපට ‘පහසුව’ යන සාධකය කෙතරම් වැදගත්ද යන්න පැහැදිලියි. සාමාන්‍යයෙන් මෙරට වාණිජ බැංකුවල චෙක්පත් නිෂ්කාශන සේවා කාලය සතියේ දිනවල පස්වරු 3න් අවසන් වනවා. පස්වරු 3.00 පසුවූ විට ගනුදෙනුකරුවන්ට සිදුවන්නේ චෙක්පත පසුදිනයේ බැරකර, මුදල් ලැබීමට ඊට පසුදා වනතුරු බලාසිටීමටයි. නිවාඩු දින සහ සති අන්තයන් පැමිණි විට මෙම ක්‍රියාවලිය තවත් ප්‍රමාද වනවා. මෙය විශේෂයෙන්ම චෙක්පත් මගින් නිතර ගනුදෙනු සිදුකරන කුඩා හා මධ්‍යම පරිමාණ ව්‍යාපාරවල මුදල් ප්‍රවාහයට විශාල බලපෑමක් ඇතිකරන තත්ත්වයක්. එහෙත් සෙලාන් බැංකුව හඳුන්වා දෙන මේ නව සේවාව නිසා ගනුදෙනුකරුවන්ට දැන් සතියේ දිනවල අදාළ සෙලාන් බැංකු ශාඛාවලදී පස්වරු 4.00ත් පස්වරු 6.00ත් අතර කාලය තුළදීද චෙක්පත් බැරකිරීමට අවස්ථාව ලැබෙනවා. මේ සඳහා අයකෙරෙන්නේ නාමික ගාස්තුවක් පමණයි.”
සුහද හදක් ඇති බැංකුව ලෙස සෙලාන් බැංකුව සෑම විටම ගනුදෙනුකරුවන් තෘප්තිමත් වන සුවිශේෂී සහ ඉහළ ප්‍රමිතියෙන් යුත් සේවාවක් ලබාදීමට ඇපකැප වී සිටියි. සෙලාන් බැංකුවේ සේවාවන් පිළිබඳ වැඩි විස්තර සඳහා ඔබගේ ශාඛාවේ කළමනාකරු හෝ සම්බන්ධතා නිලධාරී අමතන්න.