ක්‍රිස්බ්‍රෝ බීජ වී නිෂ්පාදනයට දායක වෙමින් දේශීය සහල් නිෂ්පාදනය සවිබල ගන්වයි

ශ්‍රී ලාංකීය ආහාර සුරක්ෂිතතාව පිළිබඳව ඉහළ අවධානයක් යොමු කරන මෙරට ප්‍රමුඛතම කුකුළු මස් නිෂ්පාදන සමාගම වන ක්‍රිස්බ්‍රෝ බීජ වී (බිත්තර වී) නිෂ්පාදනයට දායක වෙමින් දේශීය සහල් නිෂ්පාදන ධාරිතාව වර්ධනය කිරීම සඳහා සිය දායකත්වය ලබාදී ඇත. අක්කර 1000කට ආසන්න වපසරියකින් යුතු කන්තලේ සූරියපුර ප්‍රදේශයේ පවත්වාගෙන යන ක්‍රිස්බ්‍රෝ බීජ වී නිෂ්පාදන ගොවිපළ මගින් මෙම ජාතික මෙහෙවර ඉටුකෙරේ. මේ සඳහා වන නවීනතම පර්යේෂණාගාරයක් සහ තාක්ෂණික පහසුකම් ක්‍රිස්බ්‍රෝ කන්තලේ සූරියපුර ගොවිපළෙහි ස්ථාපනය කර ඇත.

දැනට මෙම ගොවිපළෙ හි BG352, BG358, BG366, BG367, BG300 යන වී වර්ග නිෂ්පාදනය කෙරේ. මුළුමනින්ම පරිසරහිතකාමී ආකෘතියකට අනුව ක්‍රියාත්මක වන ක්‍රිස්බ්‍රෝ සූරියපුර බීජ වී නිෂ්පාදන ගොවිපළ තුළ පස සහ ජල සංරක්ෂණය සඳහා දැඩි අවධානය යොමු කරමින් අවශ්‍ය ක්‍රියාමාර්ග ගෙන ඇත. මෙම ගොවිපළ සඳහා දැවැන්ත ආයෝජනයක් ක්‍රිස්බ්‍රෝ සමාගම සිදුකර තිබේ. ක්‍රිස්බ්‍රෝ මේ වන විට සහල් සහ බඩ ඉරිඟු වගාව සඳහා මහා පරිමාණයෙන් යොමු වී ඇති අතර මහියංගනය, මොනරාගල සහ අනුරාධපුර දිස්ත්‍රික්කයේ ගොවි පවුල් 10,000කට අධික පිරිසකට මින් සෘජු ප්‍රතිලාභ අත් කර දෙනු ලබයි. 30 වසරක යුද්ධයෙන් සෘජුව බැට කෑ ජනතාවක් ජීවත් වන කන්තලේ සූරියපුර ගම්මානය ක්‍රිස්බ්‍රෝ ආයෝජනයන් සමගින් ආර්ථික හා සමාජීය වශයෙන් විශාල දියුණුවක් අත් කර ගැනීමට සමත් වී ඇත. ශ්‍රී ලංකාව සහලින් ස්වයංපෝෂිත නමුත් බීජ වී සඳහා දැරිය යුතු අධික මිල හේතුවෙන් බොහොමයක් ගොවිමහතුන් වී වගාවෙන් ඉවත්ව වෙනත් ගොඩ භෝග වගාව සඳහා යොමුවීමේ ප්‍රවණතාවක් දක්නට ඇත. මේ තත්ත්වය අවබෝධ කර ගත් ක්‍රිස්බ්‍රෝ බීජ වී නිෂ්පාදනයට එක් වෙමින් ගොවි ජනතාවට සහන මිලට බීජ ලබා දීමට කටයුතු කර ඇත.