ලෝක ටෙනිස් කුසලානය ලෙස හැඳින්වෙන 2026 ඩේවිස් කුසලාන ආසියා ඕෂනියා කලාපීය iv කාණ්ඩයේ (Davis Cup Asia/Oceania Group IV 2026) තරඟාවලිය 2026 ජූලි 20 වැනිදා සිට 25 වැනිදා දක්වා ශ්රී ලංකා ටෙනිස් සංගම් ක්රීඩා පිටියේදී පැවැත්වේ. ජාත්යන්තර ටෙනිස් සම්මේලනයේ මගපෙන්වීම යටතේ පැවැත්වෙන මෙම තරඟාවලිය ලොවපුරා සිටින පිරිමි ටෙනිස් ක්රීඩකයන් සඳහා වන ප්රධානතම කණ්ඩායම් තරඟාවලියයි.
කොළඹ දී පැවැත්වෙන මෙම ඉසව්ව සඳහා රටවල් හතක් (7) සහභාගී වේ. ඒ ඉරාකය, උතුරු මරියානා දූපත්, කටාර් රාජ්යය, තුර්ක්මෙනිස්තානය, කිර්ගිස්තානය, කුවේට් රාජ්යය සහ සත්කාරක ශ්රී ලංකාවයි.
මෙම තරඟාවලිය සඳහා වන ශ්රී ලංකා කණ්ඩායම තාරුණ්යයේ සහ අත්දැකීම් වල සංකලනයකින් සමන්විත වන අතර අර්න පෙරේරා, තෙහාන් විජේමාන්න, ගනුක ප්රනාන්දු සහ සහා කපිලසේන යන ක්රීඩකයන් ඊට ඇතුළත් වේ. මිනෙත් නවරත්න අතිරේක ක්රීඩකයා ලෙස නම්කර ඇත. ශ්රී ලංකා කණ්ඩායමේ පුහුණුකරු ලෙස පළපුරුදු පුහුණුකරුවකුවන සංඛ අතුකෝරළ මහතා කටයුතු කරන අතර ලක්ෂ්මන් විජේරත්න මහතා භෞතචිකිත්සක සම්බාහක ලෙස කටයුතු කරයි. ශ්රී ලංකා කණ්ඩායමේ කළමනාකරු වන්නේ රක්මාල් කුරේ මහතාය.
මෙම කණ්ඩායම් හත කාණ්ඩ දෙකකට බෙදනු ඇත. එක කාණ්ඩයකට කණ්ඩායම් තුනක් (3) සහ අනෙක් කාණ්ඩයට කණ්ඩායම් හතරක් (4) ඇතුළත් වේ. මූලික වටයේ තරග රවුන්ඩ් රොබින් (Round Robin) ක්රමයට පැවැත්වෙන අතර කාණ්ඩ දෙකේ පෙරමුණ ගන්නා කණ්ඩායම් දෙක අන්තර් කාණ්ඩ හරස් තරග සඳහා සුදුසුකම් ලබයි. මෙම හරස් තරග වලින් ජයගන්නා කණ්ඩායම් දෙක මෙම ඉසව්වේදී උසස් කරනු ලැබේ. කාණ්ඩ දෙකෙහි තුන්වන ස්ථාන ලබාගන්නා කණ්ඩායම් දෙක පහළ කාණ්ඩයට ඇදවැටීම වැළැක්වීමේ තරගයකට මුහුණදිය යුතුයි. කණ්ඩායම් හතරකින් සමන්විත කාණ්ඩයේ හතරවන ස්ථානය ලබාගන්නා කණ්ඩායම අනිවාර්යයෙන් ලබන වසරේ තරගාවලියට පහත වැටෙනු ඇත. ඒ අනුව කණ්ඩායම් දෙකක් ඉහළ කාණ්ඩයට සුදුසුකම් ලබන අතර කණ්ඩායම් දෙකක් පහළ කාණ්ඩයට ඇද වැටේ.
ජූලි 20 සහ 21 යන දින සියලුම කණ්ඩායම්වල නිල පුහුණුදින වන අතර තරග ජූලි 22 සිට 25 දක්වා පැවැත්වේ. කණ්ඩායම් නායකයන්ගේ රැස්වීම සහ තරග ශ්රේණිගත කිරීම් ජූලි 21 වැනිදා පෙරවරු 10.00 ට ශ්රී ලංකා ටෙනිස් සංගමයේ දී පැවැත්වෙන අතර තරගාවලියේ සමාරම්භක උත්සවය ජූලි 22 වනදා පෙරවරු 9.30 ට පැවැත්වීමට නියමිතය.
තරගාවලිය සඳහා Wilson Us Open පන්දු භාවිතා කරන අතර ශ්රී ලංකාවේ විල්සන් ක්රීඩා භාණ්ඩ වල නිල හවුල්කරු වන ට්රයිඩන්ට් ඩිස්ට්රිබියුටර්ස් (Trident Distributors) ආයතනය නිල පන්දු සැපයුම්කරු ලෙස එක්වේ. මීට අමතරව එහි කළමනාකාර අධ්යක්ෂ යසර් ෆාරුක් මහතාගේ මගපෙන්වීම යටතේ ට්රයිඩන්ට් ස්පෝර්ට්ස් (Trident Sports) ආයතනය ශ්රී ලංකා කණ්ඩායමේ නිල ඇඳුම් හවුල්කරු ලෙසද කටයුතු කරයි.
සියලුම කණ්ඩායම් සිනමන් ලේක්සයිඩ් (Cinnamon Lakeside) හෝටලයේ නවාතැන් ගන්නා අතර ඔවුන් මෙම තරගාවලියේ නිල ආගන්තුක සත්කාර හවුල්කරු වේ. ශ්රී ලංකාවේ රැඳී සිටින කාලය තුළ කණ්ඩායම් වලට සුවපහසු නවාතැන් පහසුකම් සැලසීම සඳහා හෝටලයේ සාමාන්ය අධිකාරී (General Manager) දුෂ්යන්ත තිත්තවැල්ල මහතා උපරිම අයුරින් කටයුතු සූදානම් කර ඇත.
සීමාසහිත පෙරේරා ඇන්ඩ් සන්ස් බේකර්ස් සමාගම නිල ආහාරපාන හවුල්කරු ලෙස කටයුතු කරන අතර තරගාවලිය පුරා ක්රීඩකයන්ගේ පෝෂණ අවශ්යතා සපුරාලීමේ වගකීම ඔවුන් සතු වේ.
තරගාවලි අධ්යක්ෂවරයා ලෙස දිනිත් පතිරාජ මහතා කටයුතු කරන අතර එස්. තේවභේසන් මහතා ඔහුගේ සහකාර ලෙස කටයුතු කරයි. චීන ජාතික වැන් ෂියැන්ලින් (Wan Xianling) මහතා ප්රධාන විනිසුරු ලෙස කටයුතු කරන අතර ධාරක එල්ලාවල මහතා ඔහුගේ නියෝජිතයා වේ. තරගාවලිය සඳහා ප්රධාන විනිසුරුවරුන් හයදෙනෙකු (6) පත්කර ඇති අතර ඔවුන්ගෙන් දෙදෙනෙකු වන අංජන ද සිල්වා සහ චමෝද් රූපස්සර යන මහත්වරුන් ශ්රී ලාංකිකයෝ වෙති. ජෙයචන්ද්රන් සාරංගන් විනිසුරුවරුන්ගේ ප්රධානියා ලෙස කටයුතු කරන අතර අධීශ පරණගම, ප්රගීත් පොල්ගම්පොළ , පසිඳු සම්පත්, යුමිර කුරුප්පු, රන්දික කැකුලන්දර සහ විහඟ නෙත්මිණ යන මහත්වරු තරගාවලියේ කාර්යමණ්ඩලය නියෝජනය කරති. නිපුනි මහේෂිකා මහත්මිය තරගාවලියේ සුරක්ෂිතතා නිලධාරිනිය සහ UNO නිලධාරිනිය ලෙස කටයුතු කරයි.
ශ්රී ලංකා ටෙනිස් සංගමයේ සභාපති ඉක්බාල් බින් අයිසැක් මහතා සහ එහි මහ ලේකම් ප්රදීප් ගුණසේකර මහතා මෙම තරගාවලිය සාර්ථක කර ගැනීම සඳහා අවශ්ය සියලු කටයුතු සම්බන්ධයෙන් උපදෙස් දෙමින් ඒ පිළිබඳ සොයා බලා කටයුතු කරමින් සිටිති.
ප්රියන්ත හෙට්ටිගේ
