ක්‍රිස්බ්‍රෝ ‘ප්‍රජා අරුණ’ සමාජ සත්කාරයෙන් සමාගමේ සේවකයින්ට නව නිවාස

ශ්‍රී ලංකාවේ විශාලතම කුකුළු මස් නිෂ්පාදන සමාගම වන ක්‍රිස්බ්‍රෝ සමූහය තුළ නිවාස නොමැති සේවකයන් 6 දෙනකු සඳහා නව නිවාස ඉදිකරදී දැනට පවතින නිවාස 24ක් මුළුමනින්ම පිළිසකර කර ඔවුන් වෙත භාරදී ඇත. ක්‍රිස්බ්‍රෝ සමූහය විසින් ක්‍රියාත්මක කරන ‘ප්‍රජා අරුණ’ සමාජ සත්කාරක වැඩසටහන හරහා මෙම ව්‍යාපෘතිය දියත්කරන ලදී. ක්‍රිස්බ්‍රෝ සමූහය සිදුකරනු ලබන ප්‍රධාන සමාජ සත්කාරක වැඩසටහන් 6 අතරට ගැනෙන ‘ප්‍රජා අරුණ’ තුළින් ක්‍රිස්බ්‍රෝ සේවක සේවිකාවන්ගේ ජීවන තත්ත්වය ඉහළ නංවාලීමට අවශ්‍ය කරුණු කෙරෙහි අවධානය යොමු කෙරේ. මේ දක්වා ‘ප්‍රජා අරුණ’ වැඩසටහන මගින් නව නිවාස 34ක් සහ පහසුකම් නොමැති නිවාස 84ක් පූර්ණ නිවාස ලෙස පිළිසකර කර ඇත.

ක්‍රිස්බ්‍රෝ ‘ප්‍රජා අරුණ’ වැඩසටහන සඳහා වන මූල්‍ය ප්‍රතිපාදන ක්‍රිස්බ්‍රෝ සුබසාධන සංගමය විසින් ලබාදෙන අතර මේ යටතේ ප්‍රතිලාභ හිමිකර ගැනීම සඳහා මේ සඳහා සුදුසුකම් ලබන සේවක සේවිකාවන් අයැදුම්පත් යොමු කළ යුතුවේ. ඉන් අනතුරුව එම සේවකයාගේ සේවා කාලසීමාව, කාර්යසාධනය, ජීවන තත්ත්වය සහ වර්තමානයේ පදිංචිව සිටින ස්ථානය යන නිර්ණායකයන් සැලකිල්ලට ලක් කොට අදාළ ව්‍යාපෘතිය සඳහා අවසන් අනුමැතිය ලබාදෙයි.

මුළුමනින්ම දේශීය ව්‍යාපාර සමූහයක් ලෙස ලංකාවේ ආර්ථිකයට හා ආහාර සුරක්ෂිතතාවට ප්‍රමුඛ දායකත්වයක් දක්වන ක්‍රිස්බ්‍රෝ සමූහය සිය මූලික ප්‍රජා සත්කාරක ප්‍රවේශයන් 6 ඔස්සේ ග්‍රාමීය ආර්ථිකය සවිබල ගන්වමින් දිළිඳු බව තුරන් කිරීම සඳහා සිය දායකත්වය අඛණ්ඩව ලබාදෙමින් සිටී.