එස්-ලෝන් ලංකාවේ වඩාත්ම ආදරය දිනූ ගොඩනැගිලි ද්‍රව්‍ය සන්නාමය වෙයි

ශ්‍රී ලංකාවේ ජල කළමනාකරණ විසඳුම් සම්බන්ධ ප්‍රමුඛයා වන, කැපිටල් මහරාජා සමූහයට අයත් එස්-ලෝන් ලංකා (පුද්.) සමාගම, ගොඩනැගිලි ද්‍රව්‍ය කාණ්ඩය යටතේ 2021 වසරේ ශ්‍රී ලංකාවේ වඩාත්ම ආදරය දිනූ සන්නාමය බවට පත්ව තිබේ. බ්‍රෑන්ඩ්ස් ෆයිනෑන්ස් (Brands Finance) මගින් වාර්ෂිකව සිදුකරනු ලබන සමීක්ෂණයකට අනුව මෙම ඇගයීම සිදුකරනු ලැබුවේ ශ්‍රී ලංකාවේ ප්‍රමුඛතම ව්‍යාපාරික සඟරාවක් වන LMD මගිනි.

“ගොඩනැගිලි ද්‍රව්‍ය අංශයේ වඩාත්ම ආදරය දිනූ සන්නාමය ලෙස පිළිගැනීමට ලක්වීමට හැකිවීම අපට ගෞරවයක්. පරම්පරා තුනක ශ්‍රී ලාංකිකයන් විසින් එස්-ලෝන් වෙත දක්වන ලද ආදරය හා ළැදියාව මෙබඳු සම්මාන මගින් යළි යළිත් තහවුරු වෙනවා. නිෂ්පාදනයක් වුවත් සේවාවක් වුවත්, අපගේ පාරිභෝගිකයන්ට හොඳම දේ ලබාදීමට අප සෑම විටම සූදානම්.” කැපිටල් මහරාජා සමූහයේ සමූහ අධ්‍යක්ෂ එස්. සී. වීරසේකර මහතා පැවැසීය.

“අප සෑම විටම අන්‍යොන්‍ය සහයෝගය හා කෘතඥතාව සම්බන්ධයෙන් විශ්වාසය තබනවා. ‘තුරු කැපකරු’ වන වගා ව්‍යාපෘතිය, ආගමික ස්ථාන වැඩිදියුණු කිරීම ඉලක්ක කරගත් ‘ගමයි පන්සලයි’ ව්‍යාපෘතිය, සහ තරුණ පරපුර පරිසරය කෙරෙහි දක්වන ආකල්ප වැඩිදියුණු කිරීම අරමුණු කරගත් ‘දියසර ශිෂ්‍ය කවය’ වැනි වැඩසටහන්, සමාජය වෙත යුතුකම් ඉටුකිරීම සඳහා අප ක්‍රියාත්මක කළ ප්‍රජා සත්කාරයන් අතරට ඇතුළත්. එමෙන්ම ග්‍රාමීය ප්‍රදේශවල ජනතාවගේ පානීය ජල සම්පාදන අවශ්‍යතා සපුරාලීම සඳහාද අප නිතර දායක වෙනවා.” ඒ මහතා වැඩිදුරටත් පැවැසීය.