ඔබේ විවාහයට මොනවා වෙයිද?

ක්‍රමයෙන් මිනිසාගේ සාමාජීය හා සංස්කෘතිකමය සමීප සබඳතාවකට සෞන්දර්යමත් රිද්ම රටාවක් ගොඩනැගිණි. එයට විවාහය මහත් රුකුලක් විය. කායික ආශ්වාදයේ අවසන් ප්‍රතිඵලයට අනුගතව දාරක සම්පත් ලැබීමේ මහා වාසනාව පෑදිණි. විවාහය ගැන ගැඹුරින් නිරීක්ෂණය කරන විටදී එකම පවුලකට අයත් සහෝදර සහෝදරියන් අතර කිසියම් ශාරීරික සහසම්බන්ධයක් ඇති නොවූ බවට සාක්ෂි ඇත. එයට මූලාශ්‍රය වන්නේ ඔවුන්ට ජානමය උරුමයන් තුළ හැදියාවක් ලැබී තිබෙන නිසාය.

කලාතුරකින් සහෝදරියන් සමග එක්වීමට අපේක්ෂිත අන්දමට සිදුවූ බවක් නම් පැහැදිලිය. පසුකාලීනව ඉඩිපස් සංකීර්ණය හරහා මානසික ආතතිය මුදාහැරීමක් ලෙසත් පලිගැනීමේ ආශාව මුල් කොටගෙන පියා මරා මව අයිති කරගැනීමේ ආශාව මුල්කොට ගෙන පියා මරා මව අයිති කරගත් බැව් දැක්විය හැකිය. බුදුරජාණන්වහන්සේ දේශනා කළ පරිදි සූත්‍රවල දක්වා ඇත්තේ සර්පයකුට ආදරය කළත් හුදෙකලාව ජීවත් වන මැහැල්ලක් පවා සිටින තැනකට කිනම් වයසක පසුවන පුරුෂයකු ඇය හමුවීමට නොයා යුතු බවකි. විශේෂයෙන්ම භික්ෂුවකට විනය නීතියෙන්ම එය තහනම් වේ.

අපි කතාබහ කරන්නේ වත්මන් විවාහය ගැනයි. මහා භාරතීය බමුණු මත පරිදි අප රටට දායාද කරන ලද එක්තරා විවාහ ක්‍රමයක් අද වන තෙක්ම අප අනුගමනය කරන්නෙමු.

ලොව වැඩිම පිරිසක් ජ්‍යොතිෂයට ගරු කරති. ඒ හරහා සිය දෛනික ජීවිතයේ වැඩකටයුතුවලට සුබ නැකැත් අනුගමනය කරන බව පැහැදිලිය. දරුවකුගේ උපතේ සිටම මියයන තෙක්ම ජ්‍යොතිෂමය කරුණු පාදක කරගනී. බ්‍රහ්ම විවාහය, දේව විවාහය, අසුර විවාහය, ප්‍රජාපතී විවාහය, ගාන්ධර්ව විවාහය සහ ප්‍රේත විවාහය වැනි විවාහ ක්‍රම අටකි. මේ කුමන විවාහයක වුවත් ඇතුළාන්ත අපේක්ෂාව ලිංගිකමය තෘප්තියයි. කායික හා මානසික ගනුදෙනුව ඒ හරහා සිදුවේ.

කවුරුන් කෙසේ පැවැසුවත් විවාහයේ මූලිකම මනෝවිද්‍යාත්මක සංසිද්ධිය කායික එක්වීමයි. එයට දෙදෙනාගේම ගැළපීම් සමතුලිතතාවක් තිබීම අනිවාර්ය වේ.

දෙදෙනකු සිතන පතන අදහස්වල විවිධාකාර රූපසටහන් ඇත්තේය. අපේ රටේ පොරොන්දම් බලන අතර ඇතැම් අපරදිග රටවල රුධිරය පරීක්ෂාවට බඳුන් කෙරේ. එය ලිංගිකමය එක්වීමකට නොව උපදින දරුවන්ගේ ශරීර සෞඛ්‍යමය කරුණුවලට ඍජුවම බලපාන බැව් විද්‍යාත්මකව ඔප්පු වී ඇති නිසාය.

පොතපතේ සඳහන් පරිදි පොරොන්දම් ගැළපීමේදී විවාහ දෝෂ 20ම අතහැර දමා සාර්ථක යුගදිවියක් ගතකිරීමට ග්‍රහ හැසිරීම් රටාව නිරීක්ෂණයට මුල් තැන දීමද අනිවාර්ය වන්නේය. හුදෙක්ම බමුණු මතිමතාන්තර අද අපේ පාරම්පරිකව ගලා එන පොරොන්දම් සීහුම්වලට දැඩි ලෙස යාකර තිබෙන බැව් ඇත්තකි.

මේ වන විට ජ්‍යොතිෂ විද්‍යාව අන් කවර දෙයකටත් වඩා ශ්‍රී ලාංකීය බෞද්ධ පිරිස් අතර කිඳාබැස ඇති බව මනාව පැහැදිලි වන්නේය. බොහෝ ඇසූපිරූ තැන් ඇති බව ජ්‍යොතිෂවේදියකුට තිබිය යුතුමය. අද නැත්තේත් ඒකමය. කේන්දර සිය ගණනක් මංගල යෝජනාවකට මුද්‍රිත හෝ විද්‍යුත් තැපෑල මාර්ගයෙන් ලැබුණු විටදී ඒවා පරීක්ෂා කිරීමට ජ්‍යොතිෂවේදියාට සේවාදායකයා දෙන්නේ පැය කාලක් හෝ භාගයකි. මිනිත්තු කිහිපයකින් ජ්‍යොතිෂමය කරුණු නිවැරැදිව ගැඹුරින් පරීක්ෂා කර බැලීමට නම් ඒ ජ්‍යොතිෂවේදියා ඍෂිවරයකු විය යුතුය?

කෙසේ හෝ විවාහයට තීරණ ලහි ලහියේම ගෙන විවාහ වී වසරකින් මාස ගණනකින් හෝ සතියකින් දික්කසාදයට යොමුවේ. අද වන විට මුදල් පසුපස පිම්මේ දුවන තැනට පත්වී ඇත. තවද දික්කසාදය යන වදන හරිද? මෙය කෙටි කසාදයක් නොවේද? වචන හරඹයක් පමණි. දහඅට ලක්ෂයකට වඩා අවිවාහක තරුණියන් සිටී. වයස 30 ගතවූ අයද මේ සංඛ්‍යාවට අයත් වේ.

හතර අතින්ම ඇසෙන කතාබස් අනුව මේ වන විට විවාහය අසාර්ථකත්වයට පත්වන එක්තරා රැල්ලකි. අඟල් තුනක දිවකින් අඩි හයක කෙනකු මරාදැමිය හැකි තැනට පත්වෙමින් සිටින අතර දුරකතන හඬ හා ඇසට පෙනෙන සංස්කරණය කරන ලද සේයාරූ නිසාද තරුණ තරුණියන්ගේ මනස අතිධාවන මහා කාමාග්නියට ගොදුරුවී සිටින බව නම් ප්‍රසිද්ධතම රහසකි.

ප්‍රවීණ ජ්‍යොතිෂවේදී දේශබන්දු ටී.හෙන්රි බෙම්මුල්ල