තාමත් රැකියාවක් හොයනවාද…

පරාශරය, වරහමිහිර, සාරාවලිය ආදී ජ්‍යොතිෂ ග්‍රන්ථවලින් ප්‍රකාශිත අන්දමට ලග්නයේ සඳු ග්‍රහයාගෙන් හා රවිගෙන් 10 වැන්න අධිපතියා සිටි නවාංශකාධිපතියාට අනුව රැකියාව පිළිබඳ තීරණය කිරීමට උපදෙස් දී ඇති අතර, 10 වැන්නේ සිටි ග්‍රහයන්ගේ තත්ත්වයද දෘෂ්ටි හා සංයෝගාදියද මේ සම්බන්ධයෙන් බෙහෙවින් බලපැවැත්වෙන බව පෙනේ. රැකියාව පිළිබඳ මූලික වශයෙන්ම කරුණු සෙවීමේදී විශේෂයෙන්ම අවධානය යොමු කළ යුත්තේ 10 වැන්නාධිපතියාගේ ෂඩ් වර්ගය ගැනයි. මින් ශුභ වර්ග වැඩි තරමට මෙන්ම ග්‍රහයන්ගෙන් නියෝජනය වන ක්ෂේත්‍රයන් කෙරෙහි රැකියාව සම්බන්ධව ඉතා දෘඪ අන්දමින් සම්බන්ධතාවක් ඇති කෙරෙන බව කේන්දර පරීක්ෂණයේදී පෙනීයයි. දහය අධිපති ග්‍රහයා සිටින නවාංශකාධිපති ග්‍රහයා අනුවද රැකියාවේ ස්වභාවය නිගමනය කළ හැකිව තිබේ. දහය අධිපතියා රවිගේ නවාංශකය නම් රාජ්‍ය අංශයේ උසස් නිලතල හෙබවීමේ ජන්ම වාසනාව ඇති කෙරේ.

10 අධිපතියා සඳුගේ නවාංශකයේ නම් ද්‍රව වර්ග අලෙවි කිරීම, ආපනශාලා පවත්වාගෙන යෑම ආදී ක්ෂේත්‍රයන් රැකියා කටයුතු වශයෙන් යොදාගැනීමෙන් ජන්ම වාසනා බලය ඉස්මතු කෙරේ.

දහය අධිපතියා කුජගේ නවාංශකය නම් වෛද්‍ය අංශය, ඉන්ජිනේරු අංශය ආදී ක්ෂේත්‍රයන් පිළිබඳ බලපෑම ඇතිකිරීමට ඉවහල් වනු ඇත. දහය අධිපතියා බුධ ග්‍රහයාද හිමි නවාංශකය නම් ශාස්ත්‍රීය කටයුතු, පොත්පත්, මුද්‍රණ, අධ්‍යාපනික කටයුතු ආදියට නැඹුරු වීමට හේතු වනු ඇත.

දහය අධිපතියා ගුරුගේ නවාංශකයක නම් පාලක තනතුරු, කථිකාචාර්ය වැනි තනතුරු හෙබවීමට හා රජයේ කොන්ත්‍රාත් පිළිබඳ බලපැවැත්මක් ඇතිකිරීමට ඉහවල් වනු ඇත.

දහය අධිපතියා සිකුරු ග්‍රහයාට හිමි නවාංශකයක නම් කලාත්මක භාණ්ඩ ආදිය අලෙවි කිරීමෙන් හා මහා පරිමාණයෙන් කෙරෙන වාණිජ්‍ය කටයුතුවලින්ද දියුණුවක් ලැබීමට ඉවහල් වනු ඇත.

දහය අධිපතියා ශනි හෙවත් සෙනසුරු ග්‍රහයාගේ නවාංශකයක තැන්පත්ව ඇතොත් කම්කරු පාලනය, වැවිලි කර්මාන්ත කටයුතු, පිරිවෙන් පාලනය වැනි අංශවල නිරත වීමෙන් දියුණුවක් ලැබීමට ඉඩ ඇත.

දහවැන්නේ ග්‍රහයන් සිටීම අනුව රැකියාවේ ස්වභාවය මෙසේය

රවි ග්‍රහයා බලවත්ව 10 වැන්නේ ශුභ දෘෂ්ටි ලබා ඇතොත් රජයේ පරිපාලන ක්ෂේත්‍රයේ උසස් මට්ටමේ රැකියාවක් ලැබීමට හේතු වේ.

සඳු ග්‍රහයා 10 වැන්නේ නම් කය නොවෙහෙසා කරනු ලබන මෘදු තත්ත්වයේ රැකියාවක් කිරීමට සුදුස්සෙක් වෙයි. ලිපි ලේඛන ආශ්‍රිත කටයුතු ප්‍රධාන වෙයි.
කුජ ග්‍රහයා 10 වැන්නේ බලවත්ව සිටීනම් හමුදා ක්ෂේත්‍රය, ඉන්ජිනේරු වැනි අංශ පිළිබඳ බලපෑමක් ඇතිකෙරේ.

බුධ ග්‍රහයා 10 වැන්නේ ශුභ දෘෂ්ටි ලැබ ඇතොත්, ලිපිකරු වැනි වෘත්තීන් පිළිබඳ හා ශාස්ත්‍රීය සේවාවන්වල නියැළීමට ඉඩ ඇත. ගුරු හෙවත් බ්‍රහස්පති ග්‍රහයා 10 වැන්නේ නම් වාණිජ අංශ, බැංකු කටයුතු, ගණකාධිකාරී, නීති වෘත්තිය ආදී ක්ෂේත්‍රයන්ට නැඹුරු කෙරේ.

සිකුරු ග්‍රහයා 10 වැන්නෙහි නම් චිත්‍ර කලාව ආදී ක්ෂේත්‍රයන්හි රැකියාවන්ට සම්බන්ධ වෙයි.

ගායක ගායිකාවන් වීමටද කදිම පිහිටීමකි. චිත්‍රපට සංස්ථාව ආදී ආයතනවල රැකියා ලැබීමටද ඉඩ ඇත. ශනි ග්‍රහයා 10 වැන්නේ බලවත් වීම නිසා කාර්මික ක්ෂේත්‍රය පිළිබඳ වෘත්තීන්හි යෙදීමට ඉඩ ඇත. රාජ්‍ය කාර්මික, ඉන්ජිනේරු සංස්ථාව වැනි ආයතන විශේෂයි.

රාහු 10 වැන්නේ නම් පොළොව ආශ්‍රිත කැණීම් කටයුතු ප්‍රධාන වෙයි. පුරාවිද්‍යා දෙපාර්තමේන්තුව වැනි රාජ්‍ය ආයතන විශේෂයි.

කේතු 10 වැන්නේ නම් හවුල් කටයුතුවල යෙදීමෙන් හා අන්‍යයන්ගේ ආධාර උපකාර ලැබීමෙන්ද දියුණු තත්ත්වයක් උදාකර ගැනීමට හැකි වේ. පොත්පත් ප්‍රකාශන කටයුතුද යෝග්‍ය වනු ඇත.

ප්‍රවීණ ජ්‍යොතිර්වේදී සාම විනිසුරු ජේ. උපාලි ද සොයිසා 0776052098