දුව බඳින්න කළින් මවගේ හිස බලන්න…

විවාහය යන කාරණාව මේ වන විට ඉතා උග්‍ර අතට හැරුණු මහා සංකීර්ණ ගැටලුවක් බවට පත්වෙමින් කායික හා මානසිකමය පීඩනයක ගොදුරක් බවට හැරී ඇති බව පැහැදිලිය. මුද්‍රිත හා විද්‍යුත් මාධ්‍ය හරහා මංගල යෝජනා ප්‍රදර්ශනය කෙරේ. ඒවා උපුටාගෙන පරිගණක ඇසුරෙන් පොරොන්දම් බලා සුදුසුකම් තිබෙන නිසා විවාහ වී ඉතා කෙටි කලකින් දික්කසාදයට යන අන්දම මේ වන විට එක්තරා රැල්ලකි.

විවාහ වන නිසාම විවාහ වන අයද මේ අතර සිටී. ගෑනු වැඩියි. පිරිමි අඩුයි යන්නද එක්තරා සමාජ ප්‍රශ්නයකි. අනාගතයේදී පිරිමි ආනයනය කරන්නට සිදුවන්නට පුළුවන.

වද විඳින බිරියන්ද මේ අතර වේ. විවාහ වී මාස කිහිපයක් ගතවන විට සැමියා දෙකොන විලක්කුව බැඳගනී. බිරියට නොදෙන වදයක් නැත. එක්තරා තරුණ බිරියකගේ මුළු සිරුරම සිගරට් ගින්නෙන් පුච්චා තිබිණි. හේතුව සැමියා හිංසා කාම රෝගයෙන් පෙළීමය. අද විවාහ ජීවිත ගැන සිතන විට අඬ අඬා පැණි කන තැනට පත්වී තිබේ. පොරොන්දම් ගැළපීම් ඉතා සුබ තත්ත්වයට පත්වී විවාහ වී ඉතා කෙටි කලකින් අඹුසැමි අරගල අරඹයි. ගේ ඇතුළේ යුද්ධයක් වගේය. අත මිට මුදල් ගැවසෙන අය අතර මේ ගැටලුව ඉතා වැඩිය. ආර්ථික අතින් දුර්වල අය ඉවසාගෙන සිටින්නේ කරන්න දෙයක් නැති නිසාය.

ඒ කොයි හැටි වෙතත් විවාහක ජෝඩුවකගේ හදවතට තට්ටු කර ඇසුවොත් කියාවි. උඩට හුස්මක් අරන් පහළට දමන්න ප්‍රමාද වේවි. ඒ තරමටම ප්‍රශ්නය උඩුදුවලාය.
‘අපි පොරොන්දම් බලා හොඳයි කිව්ව නිසා බැන්දා. ඒත් අද අපි දෙන්න අතරේ ආරවුල් ඉවරයක් නෑ. මටත් හොඳටම ගහනවා. මගේ ළමයටත් ගහනවා. බැඳලා අපි දෙන්නා හිටියෙ හරියටම මාස 5යි. පස්සෙ දැනගත්තේ එයාගෙ හැටි. වෙන සිද්ධි පත්තරේක ලියන්න බෑ. මත්පැන් ගෙනත් මට බොන්න කියනවා. මං බොන්නෙ නැති නිසා මට හොඳටම ගහනවා. එයා විකෘති පැත්තෙ කෙනෙක් බව දන්නෙ පස්සේ…’ මේ එක් බිරියකගේ අත්දැකීමකි. මේ අතර බිරින්දෑවරුන් නොමඟ ගිහිල්ලා. සමහරු නිල් චිත්‍රපට නැරඹීමට වහල් වෙලා.

මේ අන්දමට වත්මන් යුගදිවි ගැන විපරම් කර බලන විට හිතන්න බැරි අන්දමට විවාහ ජීවිත විනාශ වෙලා. ජ්‍යොතිෂ පැත්තෙත් නිරීක්ෂණය කර බැලූ විට උඩින් පල්ලෙන් කේන්දර බලා විවාහ වෙලා තියෙන්නේ නොගැළපෙන දෙන්නෙක්. දැළි පිහියෙන් කිරි කනවා වගේ වැඩක් කරලා තියෙන්නේ.

මෙච්චර නම් දියුණු ජ්‍යොතිෂ විද්‍යාවක් තිබෙන මේ කාල පරාසය තුළ ඒවා ගැන නොතකා විවාහවී දෙන්නා දෙපැත්තට යන රටාවක් ඇතිවෙලා. කේන්දරය කියන්නේ ජීවිතයේ ඇතුළු පැත්ත හරි හැටි පෙන්වන ක්‍රමවේදයක්.

විවාහයට පාතබන දෙන්නාගේම නිවැරැදි කේන්දර දෙක නිවැරැදිව බැලූ විට දෙන්නට දෙන්නගේ කායික මානසික ගැළපීම් යහපත්ද යන්න තේරුම් ගැනීමට හැකි වේ. කායික ගැළපීම් නොමැති නම් කෙසේද සාර්ථක විවාහයක් ගතකරන්නේ? මේ පිළිබඳ අපට විවෘතව කතා කරන්න බැරි අපේ තියෙන සංස්කෘතිකමය පිරුවටය නිසායි. බොහෝ දෙනෙක් අමාරුවේ වැටෙන්නේද මේ කාරණාව නිසයි.

පැරැණි අය මේවා ගැන කිව්වාද යන්න සමහරු අසාවි. පැරැණි අම්මලා දුවට අතිශයින්ම රහසිගතව දියණියට විවාහයේ ඇතුළේ පැත්තේ හැසිරීම නිදි යහන ගැන හොඳින්ම උගන්වා ඇත. පැරැණි කතාවක් තියෙනවා ‘දුව සහේට ගන්නවා නම් දුවගෙ අම්මගෙ ඔළුව දිහා බලන්න’ කියලා. අද අම්මලත් එකයි, දුවලත් එකයි.

ප්‍රවීණ ජ්‍යොතිෂවේදී, දේශබන්දු ටී හෙන්රි බෙම්මුල්ල