මෙම නිවෙසේ වත්මන් ගෘහ මූලිකයා නිවෙස මිලදීගෙන වසර 2ක් පමණ යනතුරු සාර්ථකව සිය ව්යාපාර කටයුතු කරගෙන ගියේය. එහෙත් ක්රමයෙන් ව්යාපාරය පිරිහීමට ලක්වීමද දැඩි මානසික පීඩා මෙන්ම පවුලේ සමගියට බාධා වන සිදුවීම්ද ඇතිවීම නිසා වාස්තු පරීක්ෂා කිරීමට පෙළඹිණි.
වත්මන් හිමිකරු පැවැසූ පරිදි නිවෙසේ පෙර හිමිකාරිය තම කිසිදු දරුවකුගේ සහාය නොමැතිව ඇගේ ව්යාපාරය ඉහළට ගොඩනඟාගෙන තිබිණි. පසුව තම දෙවැනි පුතුත් සමග එක්ව නිවෙස ගොඩනගා ව්යාපාරිකවද සාර්ථකව දිවි ගෙවන්නට හැකි වූයේ වසර 5ක් පමණි.
පසුව නොසිතූ පරිදි පුත්රයා මව සමග අමනාප වීමක් හේතුවෙන් ව්යාපාර බිඳවැටීම ආරම්භ විය. අනතුරුව ව්යාපාර බිඳවැටීම නිසා මෙම නිවෙසෙ විකුණා දමා තිබිණි.
නිවෙසේ කොටසින් කොටස පරීක්ෂා කිරීමේදී මෙවන් තත්ත්වයක් උද්ගත වීමට හේතු වූ වාස්තු දෝෂ සොයාගත හැකි වූ අතර ඒවාට යෙදූ පිළියම් මෙසේය.
ප්රධාන දොර කෙළින් පඩිපෙළ පිහිටා තිබීම
වාස්තු පුරුෂයාගේ හිස නියෝජනය කරන්නා වූ ප්රධාන දොර මූලික වශයෙන් ගෘහ මූලිකයාගේ ධන වාසනාව මෙන්ම ඔහුගේ ඉදිරි ගමනද තීරණය කරයි. නිවෙසක බ්රහ්ම පාදය මෙන්ම ප්රධාන දොරද පීඩා නොවන පරිදි නිදහස්ව හා නිරවුල්ව පැවැතිය යුතුය. ප්රධාන ද්වාරය හරි කෙළින් දෙදෙනකු මුහුණට මුහුණ බලා සිටින්නා සේ පියගැට පෙළ ආරම්භ වන ස්ථානය නොතිබිය යුතුය. එනම් යම්කිසි පුද්ගලයකු පඩිපෙළ බැස පැමිණෙන්නේ කෙළින්ම ප්රධාන දොර ඉදිරිපිටටයි. ප්රධාන දොර කෙළින් පඩිපෙළ පිහිටා තිබීම දැඩි මානසික පීඩා මෙන්ම ගෘහ මූලිකයාගේ ඉදිරි ගමන ඇනහිටීම, ආර්ථික ස්ථාවරත්වය බිඳවැටීම මොනයම් දෙයක් කරන්න උත්සාහ කළද ඒවාට දැඩි සේ බාධා එල්ලවීම සිදුවෙයි. පඩිපෙළ වෙනස් කළ නොහැකි බැවින් ප්රධාන දොර ධන පාදයකට වෙනස් කර එම දෝෂය ඉවත් කළේය.
නිවෙස තුළ වූ වැසිකිළි වළ
මෙම නිවෙසේ මුල් කාලීනව වැසිකිළි වළ පිහිටා තිබුණේ ගරාජය තුළය. පසුකාලීනව නිවෙසට තව කොටස් එක් කිරීමෙන් මෙම වැසිකිළි වළ නිවෙස තුළට එක්විය. එම හේතුව නිසා නිවැසියන්ට කායික හා මානසික පිරිහීම් හටගැනිණි. ශරීරයේ අප්රාණික ස්වභාවය නිතර පැවැතිණි. උදරය ආශ්රිත රෝගාබාධ නිතර නිතර ඇතිවිය. මානසික පීඩාවලින් මිදීමට කිසිම විටෙක හැකි නොවීය. මේ හේතුවල ප්රතිඵලය වශයෙන් අවසානයේ පවුලේ පිරිහීම ඇතිවිය. පිළියම් ලෙස වැසිකිළි වළ සම්පූර්ණයෙන්ම ඉවත් කර නිවෙසේ පිටත මිදුලේ සකස් කළේය.
තනි පල වහලය
වහලයේ තනි පලය ඉතා දෝෂ සහිත වෙයි. මානසික අවපීඩනයට රුකුල් දෙන ප්රබල හේතුවකි. වහලයේ පල ඉරට්ටේ විය යුතුය. එය වාස්තු සිද්ධාන්තයකි. මෙම නිවෙසේ තනි පල වහලයකින් හා ඉතිරි කොටස් ස්ලැබ්වලින් ආවරණය විය. තනි පලය ඉවත් කර ඉතිරි කොටසට ස්ලැබ් දමා එම දෝෂය භංග කළේය.
මෙම සියලු වෙනස්කම්වලින් පසුව දැනට වත්මන් හිමිකරු ව්යාපාර දියුණු කරගෙන දරුවන් සමග සන්තෝෂයෙන් කටයුතු කරමින් දිවි ගෙවන්නේය.
වාස්තුවිද්යා, ජ්යොතිෂවේදී අමාලි අගස්පතිරණ
