ඔබේ කේන්දරයේ මැද කොටුව අයත් වන ලග්නයට හිමි ග්රහයා ලග්නාධිපති නම් වේ. ඒ අනුව මේෂ, වෘශ්චික ලග්න දෙක කුජ ග්රහයාටද, වෘෂභ සහ තුලා ලග්න දෙක සිකුරුටද, මිථුන සහ කන්යා ලග්න දෙක බුධටද, කටක ලග්නය චන්ද්රයාටද, සිංහ ලග්නය රවිටද, ධනු සහ මීන ලග්න දෙක ගුරුටද, මකර සහ කුම්භ ලග්න දෙක ශනිටද අයත් වේ. ලග්න භාවයෙන් ශාරීරික පෙනුම, දේහ විලාසය, නිරෝගිකම, චරිත ලක්ෂණ, ශරීර ශක්තිය, නුවණ, ආයුෂ, රැකියාව, අභිමානය, ශරීරයේ උඩ කොටස, හිස හා මුහුණ ලග්නයට අයත් වේ.
ලග්නාධිපති ලග්නයේම තැන්පත් වූ විට අනුන්ගෙන් ලැබෙන උදව් උපකාර ගැන නොසිතා ස්වකීය කටයුතු උසස් අන්දමින් කිරීමේ හැකියාවක් ලබයි. උත්සාහවන්තයි. උපන් තත්ත්වයට වඩා උසස් තත්ත්වයක් ඇතිකර ගනී. ආත්ම ගෞරවය ආරක්ෂා වන අන්දමට කටයුතු කරයි. ජය පරාජය දෙකටම ඔරොත්තු දෙයි. ලග්නාධිපතියා සුබ සෞම්ය ග්රහයකු නම් ඉතා හොඳ ගුණයෙන් යුත් තැන්පත් ගති පැවැතුම්ද, කෲර ග්රහයකු නම් සැඩපරුෂ තද ගති ලක්ෂණද ඇති දරුණු දේට පෙළඹෙන ජන්මියකු වීමට ඉඩ තිබේ. ලග්නාධිපති පාප ග්රහ දෘෂ්ටිවලට හසුවුවහොත් සුබ ගති වෙනස් වනු ඇත.
ලග්නාධිපති දෙවැන්නේ නම් බොහෝ සිල්වත් ධාර්මික ගති ඇතිවෙයි. ඉපැයීම් ගැන නිතරම සිතයි. නමුත් අධාර්මික නොවේ. තමන්ගේ හා තම නිවෙසේ වැඩකටයුතුවලට මුල් තැන දෙයි. කතාවට දක්ෂ වෙයි. එක දෙයකින් වැරැදුණහොත් තවත් දෙයක් ආරම්භ කරයි.
ලග්නාධිපති තුන්වැන්නේ නම් තමන්ගේ තීරණවලට අනුව කටයුතු කිරීමට පෙළඹෙන අතර තීරණ ගැනීමට බොහෝ කල්ගත වේ. සතුරන් මැඬපැවැත්වීමට හැකි වේ. ආරම්භ කළ වැඩක් අසාර්ථක වුවහොත් අධෛර්යවත් නොවී වෙනස් දෙයක් කරන්නට යොමුවන්නෙකි. බාල අවධියේ පටන්ම ඉපැයීමට උනන්දු වන්නෙකි. ඉගෙනීමට කැමැති වෙයි. සඳු, බුධ, ගුරු, ශුක්ර වැනි සුබ ග්රහයකු තුන්වැන්නේ වී නම් බාහිර අලංකාරයට පිරිසිදුකමට ප්රිය වෙයි.
ලග්නාධිපති සිවුවැන්නේ නම් මවුපියන්ට සලකන අතර මවට විශේෂ ළැදියාවක් දක්වයි. ගේදොර ඉඩකඩම් යාන වාහන පවා හිමිවීමට ඉඩ තිබේ. අනුන්ගේ සිත් නොරිදවයි. සාමයෙන් සමගියෙන් වැඩ කිරීමට වැඩි කැමැත්තක් ඇතිවෙයි. කලබල වැඩවලට අකැමැති වේ.
ලග්නාධිපති පස්වැන්නේ නම් අධ්යාපන කටයුතුවලට දක්ෂකම ඇතිවිය හැකිය. දමනය වූ සිතක් ඇතිවේ. හික්මීමෙන් කටයුතු කරයි. අනුන්ට කරදරයක් ඇති නොවන සේ කටයුතු කිරීමට වගබලා ගනී. තමන්ගේම අත්දැකීම් තුළින් අනාගතය ගැන තීරණයකට එළැඹිය හැකි ජන්මියෙකි. පස්වැන්නේ කුජ නම් දරුවන්ට අපල යෙදීමට ඉඩ තිබේ. විශේෂයෙන් පළමු පිරිමි දරුවාට මාරක අපල යෙදීමට ඉඩ තිබේ. බොහෝ විට සූදු ක්රියාවලින් දිනුම් ලැබීමට ඉඩ යෙදිය හැකිය.
ලග්නාධිපති හත්වැන්නේ නම් උපායශීලීව සතුරන් මැඬලීමට හැකි වෙයි. නිරෝගී වේ. සුරතල් සතුන්ට කැමැති වේ. පවුලේ අනෙක් අයට වඩා තත්ත්වයක් ඇතිව ජීවත් වීමට උත්සාහ ගනී.
ලග්නාධිපති හත්වැන්නේ නම් තමාගේ භාර්යාවට අගුණ යෙදීමට ඉඩ තිබේ. විවාහ ජීවිතය කරදර සහිතව ගතවීමට ඉඩ වැඩිය. කුජ හෝ ශනි හත්වැන්නේ තැන්පත් නම් අපල යෙදීමට බල වැඩිය. සමහර විට පුරුෂ වීර්යය හීනවිය හැකිය. බොහෝ විට සහකරුගේ හෝ සහකාරියගේ බස්වලට අනුව කටයුතු කිරීමට පෙළඹිය හැකිය.
ලග්නාධිපති අටවැන්නේ නම් ශරීරය ලෙඩ සහිත විය හැකිය. තිබෙන තත්ත්වය සඟවා කතාකරන අයෙකි. කපටි නුවණක් සහිත වේ. සූදුවට ප්රිය කරයි. පවට බිය නැතිවේ. නඩුහබවලට පැටලීමට ඉඩ තිබේ.තමන්ගේ බිරියට විරුද්ධකම් කරන්නකු විය හැකිය. ගෙදර සාමය අඩුවිය හැකි. සමහර විට ආයුෂ හීන විමට ඉඩ තිබේ. ගුණවත් අය සමග අමනාපකම් ඇතිකර ගනී.
ලග්නාධිපති නවවැන්නේ නම් ඉගෙනීමට කැමැතිය. භාර්යාවට දරුවන්ට හිතවත් වේ. මවුපිය ගුරුවරාදීන්ට, පූජ්ය පක්ෂයට වැඩිහිටියන්ට ගෞරවයෙන් යුක්ත වේ. දුරදක්නා නුවණක් ඇති කලබල නැති නිහතමානී, කාගේත් ගරු සරුවට ලක්වන සිලවත් කෙනෙකු වෙයි. රටේ පිළිගත් කෙනකු මෙන්ම සමහර විට ජනනායකයකු වීමට හේතු වාසනා ලබයි. ලග්නාධිපති නවවැන්නේ සිටින විට ලග්නයට යෝගකාරක ග්රහයා කේන්දර ත්රිකෝණයක සිටී නම් රටෙන්ම බුහුමන් ලබන පඬිරුවනක් විය හැකිය. යහපත් ඇවතුම් පැවතුම් නිසා කාගේත් සිත් දිනාගනී.
ලග්නාධිපති දහවැන්නේ නම් සමාජයෙන් ගුරු නම්බු ලැබිය හැකිය. මවුපියන්ටද ඥාතීන්ටද සලකන ගුණවතෙකි. වැදගත් ස්ථිර රැකියාවක් ලබයි. වීර්යවන්ත හා කාර්යක්ෂම වේ. ගේදොර ඉඩකඩම් ඇති අයකු වේ. කාලය අපතේ නොහැර කාලයෙන් උපරිම වැඩ ගන්නා කෙනෙකි. දහවැන්න කුජට උච්ච හෝ ස්වක්ෂේත්ර රාශියක් නම් යුදමය කටයුතුවලට දක්ෂකම් ඇති වේ. සිකුරු නම් කලා අංශයට සංගීතයට ප්රිය වේ. බොහෝ විට එවැනි දෙයක් රැකියාව විය හැකිය. සඳු නම් ව්යාපාරවලට සුබ වේ. ශනි නම් අව්වැසි දේශගුණික තත්ත්වය හෝ කෑම බීම ගැන හෝ නොබලා වැඩකරයි. ගුරු හෝ බුධ නම් උගත්කමින් නුවණ මෙහෙයවා කරන දෙයක් රැකියාව වෙයි.
ලග්නාධිපති එකොළෙස්වැන්නේ නම් ස්වකීය පවුලට ගෙදරට හිතවත් වේ. ධනවතකු වේ. යහපත් උසස් විවාහයක් සිදුවේ. ඇසුරු කරන කාගේත් හොඳ පැත්ත දකින නරක පැත්ත අතහැර දමන කෙනෙකි. හොඳ පිළිගැනීමක් ඇති ජීවිතයකි.
ලග්නාධිපති දොළොස්වැන්නේ නම් සූදුවට හා මත්වතුරට පෙළඹීමට ඉඩ තිබේ. නඩුහබවලට පැටලීමට ඉඩ තිබේ. චරිතයද හොඳ නැත. හොර හිත ඇත්තෙකි. නාස්තියට නැඹුරු වීම වැඩිය. සමහර විට බාල වයසේදීම උපන් ගමෙන් පිට වීමට ඉඩ තිබේ. කෙසේ වුවද අවුරුදු විස්සට පෙර කාලය යහපත් නොවේ. ලග්නාධිපතියා දොළොස්වැන්නට සුබපල උදා කරනවා අඩුය.
ප්රවීණ ජ්යොතිෂවේදී ටී. බණ්ඩාර අනුරාධපුරය
