සුබ අසුබ දිවියට ළංකරන අන්තර් දශා

මිහිපිට වසන ඕනෑම මනුෂ්‍ය සත්වයකු තම මව්කුසින් පිටතට පැමිණ සූර්යයාලෝකයට පතිත වන නියම වෙලාව ජන්ම වේලාව යනුවෙන් නම් කරනු ලබනවා. සත්ව ලෝකයට මෙහි බලවත් වැදගත්කමක් නොවූවත්, මනසින් උසස්, දියුණු මානවයා මෙම වේලාව පාදක කර ගනිමින් දිවියට අනුගත බොහෝ ඉදිරි කාරණා කටයුතු සිදුකරගනු ලබනවා. එසේම මූලික වශයෙන්ම ජ්‍යොතිෂයට අනුව උපන් දිනය, උපන් ස්ථානය. උපන් වේලාව පාදක කරගනිමින් කේන්ද්‍ර පත්‍රයක්ද සකස් කරගනු ලබන්නේ එලෙසිනි. මෙසේ උපත ලබන්නාවූ ජන්මියා උපතේදීම නියමිත වන්නාවූ මහා දශාවකටත්, දශා ශේෂයකටත් යටත් වනු ඇත. එතැන් සිට ඉදිරියට නියමිත රවි, චන්ද්‍ර, කුජ, රාහු, ගුරු ආදී වශයෙන් නිර්දේශිත මහ දශාවන් වැලඳ ගනිමින් ඉදිරියට ගමන් කරනු ලබන්නේය.

කේන්ද්‍ර පත්‍රයක් පරීක්ෂා කරනු ලබන ඕනෑම ජ්‍යොතිෂවේදියකු මෙම ගෝචරයන් ජන්මියාට පවත්නා මහ දශාවත්, අන්තර් දශාව පිළිබඳවත් ප්‍රථමයෙන් අවබෝධයක් ගනු ලබන්නේය. ප්‍රතිඵල කථනයට මෙම තත්ත්වය බොහෝ වැදගත් භාවයක් එකතු කරනු ඇත. අද දින ප්‍රථමයෙන්ම ‘මව්රට’ පුවත්පතේ කේන්දරය අතිරේකය තුළින් ඔබ වෙත පැමිණෙන මා ඔබට අප කාටත් ගෝචරයෙන් පවතිනු ලබන මහ දශාවේ අන්තර් දශාවත් පිළිබඳව මුල සිට එකින් එකට අවබෝධයක් ලබාදීමට කැමැත්තෙමි. සුබ, අසුබ මහ දශාව පාදක කර ගනිමින් ගෝචර අන්තරයේ උදාවන ප්‍රතිඵලද අනේකවිධ බව සිහියේ තබාගත යුතුය. එසේ නම් පළමුවෙන්ම අද දින අප රවි මහ දශාවට ගමන් කරමින් එහි පළමුවැන්න රවි අන්තරය පිළිබඳව මනා අවබෝධයක් ලබාගනිමු.

රවි පාපයකු වශයෙන් වෙන් කළ නොහැක. ඔහු නියත වශයෙන්ම අපක්ෂපාතී, තේජවන්ත, රජකු මෙනි. කෙනකුට ධන ධාන්‍ය, ඉඩකඩම්, තාන්න මාන්න දී උසස් කරන්නේද, දේපොළ රාජසන්තක කර නිලතලවලින් පහ කරන්නේද රජු විසිනි. රවිද එසේම වෙයි. රවිගේම මුල්ම රවි අන්තරය මාස 03 දන 18කට හිමිකම් කියනු ඇත. රවි සම්බන්ධ මුල කී බොහෝ යහපත් දේ ජන්මියාට ඇති කරනු ලබයි. දිවියට යහපත පිණිස, උසස් බව පිණිසත්, දිවියේ ආලෝකය පිණිසත් ප්‍රබල කරුණු කාරණා බලවත්ව ඇති කරන්නට සමත්වනු ඇති කාල සීමාවකි. හොඳට සිටියොත් ප්‍රධානත්වය දරන බොහෝ තනතුරුවල වැජඹෙන්නටද යෙහෙකි. විශේෂයෙන්ම දේශපාලන කටයුතුවල නියැළී යම් තාන්න මාන්න නිලතල බලාපොරොත්තු වන අයකුට රවිගේ රවි අන්තරයට යොමුවනවා නම් ඔහුට හෝ ඇයට උසස් පල නෙළාගන්නට හැකියාව මේ කාල සීමාවේ පවතිනු ඇත.

එසේම අනෙකුත් ග්‍රහ බල අසුබව, රවි දුබලව මේ කාල සීමාවේ පවතින්නේ නම් ආණ්ඩුව සමඟ හෝ උසස් නිලයන් සමඟ ගැටුම්, කලබලකාරීත්වයන් මෙන්ම කරදරවලටද මුහුණපාන්නට සිදුවනු ඇත. විවේකයද ඉතා අඩු වනු ඇත. සමහරුන්ට ගම රට අතහැර යන්නටද සිදුවන අවස්ථා නැත්තා නොවන බව සිහි තබාගත යුතුය. මෙසේ දක්වන්නට යෙදුණේ යම් ජන්මියකුට රවිගේ මහ දශාව තුළ ගෝචරයෙන් රවිගේම අන්තරයට යටත්ව පවතින්නේ නම් කුමන ආකාරයේ තත්ත්වයන් දිවියට උද්ගත වනවාද කියන්නාවූ කාරණා සමුදායයි. ඔබත් ඔබගේ කේන්ද්‍ර සටහනට අනුව මේ වන විට පවතින්නේ රවිගේ රවි අන්තරය නම් මෙවන් ප්‍රතිඵලයන්ට උරුමකම් කියනු ඇත. ඉදිරියටත් නැවත තවත් ගෝචර දශාවකින් හමුවන බලාපොරොත්තුවෙන් අදට විරාමය තබමි.
ජ්‍යොතිෂවේදී කේ.පී. ක්‍රිෂාන්ත ප්‍රියදර්ශන