සතුටින් පවුල්කන පහසුම ක්‍රමය

යුග දිවියට ඇතුඵ වූ දෙදෙනෙක් ඉතාම සුන්දරව ආදරයෙන් ළෙන්ගතුකමෙන් බැඳී සිටීම එකම අපේක්ෂාවයි. යම් අරමුණක ස්ථාවරත්වයට පත්වීම යුගදිවියේ රසභාවය කුඵ ගන්වනසුලුය. අපි කේන්දරේ පත්ඉරු හරහා යුගදිවිය අතිසාර්ථකත්වයට පත්වන ජ්‍යොතිෂමය පදනම ගැන කතාබහ කරමු.

ගුරු හෝ සිකුරු භාව ස්ඵුටයේ උප අධිපතියා වීම සහ 2, 11වැන්නේ නිවේදකයා වීමත්,
7 වැන්නේ සිටින ශනි තුලා නවාංශකයේ හෝ කුම්භ නවාංශකයේ සිටීමත්,
7 වැන්නාධිපතියා උච්චවී 4 වැනි භාවයේ හෝ 10 භාවයේ සිටීමෙන් ඉතාම වාසනාවන්ත පවුල් දිවියක් ගෙවයි.

පුරුෂ කේන්දරයේ 2 වැන්නේ ශුක්‍ර සුබව සිටීම පවුල් සංස්ථාව වර්ධනය කර ගැනීමට බලයක් ලැබේ.

2 වැන්නාධිපති හා 11 වැන්නාධිපතියාත් අන්‍යෝන්‍ය ස්ථාන මාරු කරගෙන සිටීම හරහා යුගදිවිය රසවත් වෙයි.

2 වැන්නාධිපතියාද 11 වැන්නාධිපතියාද 10 වැන්නේ වීමෙන් අතිසාර්ථක යුගදිවියක් ගෙවයි.
කුජ සමඟ ශුක්‍ර යහපත්ව ඇත්නම් ඉක්මන් විවාහයක් සහිත වින්දනයේ උපරිම තෘප්තියක් ලබනු ඇත.
ලග්නයේ ගුරු හෝ සිකුරු හෝ බුධ තිදෙනාම සුබව සිටී නම් සාර්ථක යුගදිවියක් හිමිවේ.
9 වැන්නේ ගුරු, සඳු, බුධ අතිසාර්ථක යුග දිවියකට පෙර නිමිත්තකි.
10 රවි, බුධ සිට 5 වැන්නේ ගුරු සිටී නම් අඹුසැමි ප්‍රේමය, ආදරය, සෙනෙහස උතුරා යයි. රවි, බුධ 11 වැන්නේ වීමත් යුගදිවියට සාර්ථක යෙදුමකි.

ශුක්‍ර හෝ සඳු බලවත් නම් අඹුසැමි ආදරය ඇතුළතින්ම ශක්තිමත්ය. යුගදිවිය රසවත් වෙයි.
7 වැන්නේ ගුරු සිටින කේන්ද්‍ර හිමියන් පවුල් දිවිය ගැටලු ඇතත් සාර්ථකව ඉදිරියට ගෙන යයි. අධ්‍යාත්මික පැත්ත නම් අධිකයි. රස වින්දන කාම ස්පර්ශයන්ට තරමක් හෙමින් දෝලනය වෙයි.
එදා සමාජයේ තමාට වඩා අඩු වයස් කාන්තාවක් සිය බිරිය කර ගනී. ඇතැම්විට තමාට වඩා වැඩි වයස් කාන්තාවන්ට ඇලුම් කරන අයද සිටියි. ප්‍රසිද්ධ රහසකි.

7 ගුරු දුර්වල වීමද, නීචවීමත් ගුරු ශනි යෝගයත් ශනි සඳු යෝගයත් නිසා තමාට වඩා වැඩිමහල් කෙනකු සමඟ යුගදිවියට පත්වෙයි.

සමහරවිට වැඩිමහල් දෙගොඩ හරිවියේ කාන්තාවන්ගේ ඇසුර ප්‍රිය කරයි.
ජන්ම ලග්නය කටක හෝ මකරය වී 7, 8 හෝ 1, 2 තැනක ශනි සමඟ සිකුරු යෝග වී සිටීමෙන් ස්ත්‍රීන්ගේ වයස ගැන නොසලකා එකතු වීමට අධික ආසා ඇති වෙයි.

7 වැන්නාධිපති උච්ච වී 4 වැනි තැන හෝ 10 වැන්නේ දී පුර සඳුගේ තුන්කොන් දෘෂ්ටිය ලැබීමෙන් විවාහය අති සාර්ථක තත්ත්වයට පත්වෙයි.

7 වැන්නේ පාපී පෙනීම් නැතිව බලවත් ගුරු නිසා දායාද ලැබෙයි. සුබ සඳු සමඟ ගුරු නම් විවාහයේ පරම සතුට ලබයි. දෙදෙනාාට දෙදෙනාම ප්‍රියතාවයක් ඇත්තේය.

අවසඳු 2 වැන්නේ ගුරු 7 වීමෙන් (වෘෂභ රාශියේ) විවාහය ප්‍රමාද වූවත් සාර්ථකත්වයෙන් පවත්වා ගෙන යෑමට හැකිවෙයි.

සඳු කුජ සහ ශුක්‍ර ප්‍රබලව ඇත්නම් (යෝගවී)
ඉක්මන් යුගදිවියකට පත්වෙයි. දෙදෙනා අතර අනලස් ආදරය පවතී.
සඳු කිවි(ශුක්‍ර) සංයෝගව කුජ ගුරුගේ දෘෂ්ටිය ලැබීමෙන් අඹු සැමි ජීවිතය අතිසාර්ථකත්වයට පත්වෙයි. ස්ත්‍රියකගේ ලග්නයේ සඳු(පුර) සිටීම යුගදිවියට අතිසාර්ථක වන්නේය.
එක කේන්දරයක ශනි කුජ වැනි පාපියකු 7 වැන්නේ සිටී නම් ගුරු ශුක්‍ර සුබවීම ඇති කේන්දරයක් ගැළපීම ඉතා සුබයි.

කුජ 7 වැන්නේ සිටින කාන්තාව පිරිමින්ගේ කාම රුචිය අධික කරන්නීය. ශනි 7 සිටින පිරිමියකුට එවැනි කාන්තාවක් ගැළපෙයි.

රවි කුජ රාහු 7 වැන්නේ වීමෙන් වෙනත් සබඳතා ඇති කර ගන්නීය. ඇයට පිරිමි ආකර්ෂණය අධික වෙයි. කේන්දරයක 8 වැන්න ගැනද බැලිය යුතු වෙයි. එතැන ලිංගිකමය සබඳතා ඇති තැනක් නිසා විවාහකාරක ශුක්‍ර සහ හෝමෝන්කාරක කුජ ගැනද බැලිය යුතුවෙයි.
මෙම ග්‍රහ හැසිරීම් රටාවට අනුගතව බැලීමේදී පළමුව පොරොන්දම් ලකුණු 36ට පමණක් තැනක් දීම නිසා විවාහයක් සාර්ථකව ගෙන යෑමට නොහැකි බැව් ස්ථිරවම පවසමු.

අද සිදුවන්නේ පොරොන්දම් 20 පමණක් බලා ගැළපීම් ඇත්නම් විවාහ වී කෙටි කලකින් දික්කසාද වීමයි.

මෙම ලිපිය කියවන ඔබ විවාහ අපේක්ෂකයෙක් නම් පොරොන්දම්වලින් පමණක් විවාහයට එකවරම තීරණ ගැනීම ගැන බුද්ධිමත්ව සිතන්න.
දික්කසාද මෙවැනි විවාහ අදවන විට ක්‍රමයෙන් වැඩි වන්නට පටන් ගෙන තිබේ.
ප්‍රවීණ ජ්‍යොතිෂවේදී ටී. හෙන්රි බෙම්මුල්ල