පහ සහ පහ අධිපතිගෙන් දරුවෙක්

දෙදෙනකු විවාහයට පෙර පොරොන්දම් ගැළපීමේදී විවිධ කාරණා ගැන සොයාබලා ගැළපීම
තීරණය කළද විවාහයකදී දරු පල පොරොන්දම් පරීක්‍ෂාවෙන් පැවැසීම එතරම් සාර්ථකද යන්න යම් මතවාදයකට තුඩු දී ඇති ප්‍රශ්නයක් බවට පත්ව තිබේ. මන්ද කිරි වෘක්‍ෂ හර වෘක්‍ෂ වශයෙන් කොටස් කරමින් කිරි වෘක්‍ෂ කේන්දර හිමියන්ට දරුපල ඇති බවට කියා කේන්දර ගැළපුවත් එවන් ගැළපුම් ඇති අනන්තවත් අඹු-සැමියන් දරුවන් නොමැතිව සිටියි. එසේම දරුපල නැතැයි කියන හර වෘක්‍ෂ හිමි අය දරුවන් ලබා සතුටින් සිටිනු දැකිය හැකිය. මේ තත්ත්වය මත ඉහත පොරොන්දම බොරුවක් වී ඇත්ද යන්න කෙනකුට සිතෙන්නට වැඩි ඉඩක් පවතී. එනිසා දෙදෙනකුගේ දරුපල පිළිබඳව වඩාත් හොඳින් අවධානය යොමු කිරීමට නම් බැලිය යුත්තේ දෙදෙනාගේම ජන්ම පත්‍රවල 5 වැන්න හා 5 වැන්න අධිපතියා ගැනය. එසේම පුත්‍ර කාරක ගුරුගේ තත්ත්වයන් ගුරු ග්‍රහයා තැන්පත්ව ඇති භාවය යනාදියත් පරීක්‍ෂාවෙන් වඩාත් සාර්ථක විසඳුමක් සොයා ගැනීමට පහසු වනු ඇත.

ජන්ම පත්‍රවල 5 වැන්න අධිපතියා නීච වීම 5 වැන්න පාප ග්‍රහයන්ගෙන් යුක්ත වීම 5 වැන්න අධිපතියා 6, 8, 12 වැනි රාශියක ස්ථාන ගතවීමත් දරු පල අඩු කරන්නට හේතු වෙයි. 5 වැන්න මෙන්ම 5 වැන්න අධිපතියා පීඩාවට පත්වීමත් 22 දෙර්කාණාධිපතිගේ දෘෂ්ටියට ලක්වීමත් හේතු කොටගෙන දරුපල ලැබීමට විශාල ලෙස බලපාන බව ජ්‍යොතිෂයේ සඳහන් වෙයි. ලග්නයේ පමණක් නොව නවාංශකයේද 5 වැන්න පීඩාවට පත්වීම හෝ පාප ග්‍රහයන් සමඟ යෝග වීම හෝ පාප ග්‍රහයන්ගේ දෘෂ්ටියට ලක්වීම දරුපල නොලැබීමට හේතු පාදක බිහිකරනු ලබයි. 5 වැන්නේ කුජ වැනි පාප ග්‍රහයෙක් සඳු සමඟ යෝග වීමෙන්ද, රාහු, ශනි, කේතු වැනි පාප ග්‍රහයන් තැන්පත් වීමද දරුපල සඳහා ප්‍රබලව බලපෑම් කරයි.

එසේම කුජ ග්‍රහයා 5 වැන්නේදී ලැබෙන දරුවන්ට ප්‍රබල අපල ඇති කරන්නකු බවටත් හඳුනාගෙන තිබේ. එහිදී විශේෂයෙන්ම පිරිමි දරුවන්ට අපල, කරදර සිදුකරන බවටත් ජ්‍යොතිෂයේ සඳහන් වෙයි. එසේම එම දරුවන් අකීකරු වීමට හෝ රෝගී වීමට ඉඩකඩ වැඩි බවත් පැවසෙයි.
යම් ලෙසකට පුත්‍ර කාරක ගුරු, කටක රාශිය උච්ච වීමත්, 5 වැන්නේ සඳු, බුධ, සිකුරු වැනි සුබ ග්‍රහයන් තැන්පත් වීමත් ගුරුගේ දෘෂ්ටියට එක්වීමත් නිසාත් දරුපල ඇති කිරීමට හේතු පාදක වෙයි. එසේම 5 වැන්න අධිපති 1, 4, 7 කේන්ද්‍රස්ථානයක හෝ 5, 9 ත්‍රිකෝණස්ථානයක සිටීමත් 5 අධිපති සුබ ග්‍රහයකුගේ නැකැත වීමත් දරුපල ලබාදෙන සුබ ග්‍රහ පිහිටීමකි.

එසේම යම් යුවළකට දරුපල ලබා දීමට පුත්‍රකාරක ගුරුගේ මහ දසා, අතුරු දසා මෙන්ම සඳුගේ මහ දසා, අතුරු දසා කාලයක්ද ඉතාමත් සුබ බවයි පැවසෙන්නේ. 5 වැන්නාධිපතියා සුබ ග්‍රහයකු වී එම ග්‍රහයාගේ මහ දසා කාලය හෝ අතුරු දසා කාලය දරුපල ලබා දීමට ප්‍රධාන හේතුවකි.
මෙවැනි කාරණා රාශියක් දරුපල කෙරේ බලපානු ලබන අතර, මෙම ලැබීම් සියල්ල සමඟ ඒ ඒ අයගේ පෙර කුසල් තත්ත්වයන්ගේ බලපෑම දරුවන් සඳහා ඉමහත් දායකත්වයක් යොදන බව පැහැදිලි වන අතර, ගුණවත්, පින්වත් දරුවන් ලැබීමටත්, එය දරුවන්ගෙන් පුද සත්කාර ගරු සැලකිලි ලබන්නට පෙර පින ඉවහල් වන බවත් සත්‍යයකි.

යම් කෙනකුගේ ජන්ම පත්‍රවල දරුපල සාර්ථකව පෙන්නුම් කළත් විවිධ හේතු නිසා විවාහය ප්‍රමාද වීමෙන් සරු කාලය මඟහැරී යා හැකිය. එවිට කොතරම් හොඳින් දරුපල පෙන්නුම් කළත් එම පලය ලැබීමට අවශ්‍ය සරු බවක් නොමැති කමින් දරුවන් ලැබීම මඟහැරී යා හැකිය. එසේම සහකරුවන්ගේ විවිධ හේතු නිසාත් දරුපල මඟහැරෙන බව හඳුනාගෙන තිබේ. ඒ අතර මත්පැන්, ප්‍රධාන සාධකයක් වී ඇත. අනෙක් අතට විවිධ ශල්‍යකර්ම හේතුවෙන්ද කේන්දරයේ පෙන්වා ඇති දරුපල අහිමි වීම සිදුවිය හැකිය. එසේම ජන්ම පත්‍රයේ දරුපල නොපෙන්වා ඇතත්, දැහැමිව දිවි ගෙවීමෙන් සහ විවිධ වූ නවීන වෛi විiාත්මක ක්‍රමවේදයන් ඇසුරින් දරුපල ලබාගන්නවුන් අනන්තවත් සිටිනු දැකිය හැකිය. මේ තත්ත්වය ඉතා කල්පනාකාරීව අවබෝධ කරගත යුතු තත්ත්වයකි.

මේ සියලු තත්ත්වයන් ඉතා කල්පනාකාරීව අධ්‍යයනය කළ යුතුය. දෙදෙනකුගේ දරුපල පිළිබඳව අවධානය යොමු කිරීමේදී 5 වැන්න හා 5 වැන්නාධිපති ගැන නිරන්තරයෙන් අවධානය යොමු කළ යුතුමය. විවාහයකට කේන්දර පරීක්‍ෂාවේදී මෙය ඉතා කල්පනාකාරීව බැලිය යුතු සාධකයක් ලෙසත් පෙන්වා දිය හැකිය.
ප්‍රවීණ ජ්‍යොතිෂවේදී ජයශ්‍රී නන්ද කුමාර