තවමත් විවාහයක් හරිගියේ නැද්ද

එදා මෙදාතුර කාලයේ බහුතරයක් දෙනා තරුණ වියට එළැඹෙත්ම නිතැතින්ම ඔවුන්ගේ සිහින අතර ප්‍රධාන කාරණයක් බවට පත්වන්නේ විවාහයකි. එක් පැත්තකින් විවාහයක් යනු සමාජයේ පැවැත්ම තීරණය කරන කාරණාවක් බවටද පත්ව තිබේ. තවත් පැත්තකින් තරුණ වියත් සමගින් ඇතිවන කායික සහ මානසික අවශ්‍යතාවල එක් පැතිකඩක් ලෙසද විවාහය හඳුන්වා දිය හැකිය. එසේම විවාහය සිදුවන ක්‍රමවේදද බොහෝමයක් වෙයි.

මේ සඳහා අතීතයේ නම් වැඩිහිටි පාර්ශ්ව අතර සිදුවන අදහස් හුවමාරුවකින් පසු කෙරෙන යෝජනාවකින් දෙදෙනකු අතර විවාහයට මුල් පියවර තැබෙයි. එහෙත් එම තත්ත්වය දින දින වෙනස් වෙමින් කාලයත් සමග එයට විවිධ ක්‍රමවේද සැකසී ඇත. ඒ අතරින් ප්‍රේම සබඳතා විවාහ සහ මංගල යෝජනා හරහා කෙරෙන විවාහාත්, නවීන තාක්ෂණික මාධ්‍ය ඔස්සේ සිදුකෙරෙන යෝජනා හරහා කෙරෙන විවාහයන් ඉතා ප්‍රසිද්ධ කාරණා බවට පත්ව ඇත.

මේ කුමන ආකාරයකට විවාහයට මඟ පෑදුණද ඇතැම් පිරිස්වලට ඉතා පහසුවෙන් සාර්ථක විවාහයකට මඟ පෑදුණද, තවත් පිරිසකගේ විවාහයට ඇති අවස්ථා නොසිතූ ආකාරයට මඟහැරෙන අයුරුත්, ඇතැම් අයගේ විවාහයන් විවිධ කාරණා නිසා දිගින් දිගටම ප්‍රමාද වන අයුරුත් දක්නට ලැබෙනවා.

කෙලෙසක විවාහය ප්‍රමාද වුවද ඒ සියල්ල සිදුවන්නේ ග්‍රහ අපල නිසා හෝ තමන් ගෙන ආ පින් පව් අනුව බව වටහා ගන්නෝද අනන්තවත් වෙති. ඇතැම් විට පෙර භවයන්හි සිය සැමියන්ට ගරු නොකළ, නොසලකා හැරි, අපවාද කළ කාන්තාවන්ටත්, එලෙස සිය බිරින්දෑවරුන්ට නින්දා අපහාස කළ සැමියන්ටත් මේ භවයේ විවාහයක් සඳහා අවස්ථාව නොලැබෙන බවටත් විශ්වාසයක් ඇත.

මෙවැනි තත්ත්වයන්ට මුහුණ දුන් අය ඒ ඒ අයගේ විවාහ ප්‍රමාදයට බලපාන හේතු කාරණා සොයාගෙන, ඊට පිළියම් යොදන අතරේ කළ හැකි පුද පූජාද වෙයි. ඒ අනුව තමන්ට හැකි අයුරින් පහසු ස්ථානයක පිහිටි බෝධියක් අසලට ගොස් මල් පහන් පුදා තමාගෙන් සිදුවී ඇති පෙර වැරැදි ඇත්නම් ඒවාට සමාව අයැද වවාහය ඉක්මන් වීමට වාසනාව ලැබේවායි පැතීමද යහපත් ප්‍රතිඵල දෙන ක්‍රියාවකි. මෙය දින හතක් එක දිගට කළ හැකි නම් වඩාත් යහපත් වෙයි.

එසේම තරුණයකු තරුණියක අතර ඇතිවන සියලු ආදර සබඳතා විවාහයකින් කෙළවර නොවන අතර, අතීතයේ මෙන් යහපත් තරුණ තරුණියන්ම එකට හමුවන බවක්ද පෙනෙන්නට නැත. එනිසාම මේ කාලයේ විවාහයක් සඳහා සුදුසු සහකරුවකු සහකාරියක සෙවීම තරමක් අපහසු විය හැකිය.

මේ තත්ත්වය කොතරම් වර්ධනයවී ඇද්ද යන්න පවසන්නේ නම්, තවම හොඳ හෝ නරක සහකරුවකු සහකාරියක හමුවීමද පෙර පින පව අනුව යැයි සිතා සිත හදාගන්නා අයද වෙති. එය කොතරම් දුරට සත්‍ය වුවද තමාට වඩාත් ගැළපෙන සහකරුවකු හෝ සහකාරියක ලබාගන්නට හැකි වත්පිළිවෙත් පිරීම යහපත් වෙයි.

ඒ අනුව ඉන්දියාව වැනි රටවල ඉතා ප්‍රසිද්ධ සහ ප්‍රතිඵලදායක පූජාවක් මෙලෙස ඉදිරිපත් කරමි. මේ පූජාව කළ හැක්කේ අනංගයා වෙනුවෙනි. ඒ සඳහා ගැළපෙන අයුරින් මණ්ඩපයක් තනා, එහි අනංගයාගේ රූපයක් තබා, එළඟිතෙල් පහනක් දල්වා රතු මලින් මණ්ඩපය සරසන්න. ඉන් පසු දිනකට 108 වර බැගින් දින 40ක් ස්තෝත්‍ර ගායනා කර, තමාට ගැළපෙන කෙනකු සිතින් සිතා ප්‍රාර්ථනා කරගත යුතුය. එමගින් වඩාත් හොඳින් ගැළපෙන සහකරුවකු, සහකාරියක ලැබෙන බව බොහෝ දෙනා අත්දැකීමෙන් විශ්වාස කරති.

එසේ ස්තෝත්‍ර පවත්වන අතරේ පැන් කළයක් තබා, එය රත් මල් ගසකට ඉස ප්‍රාර්ථනා කිරීමද යහපත් ක්‍රියාවකි.

ස්තෝත්‍රය
ඕම් නමෝ භවතේ
කාමදේවායේ යස්‍ය යස්‍ය
ද්‍රිෂ්යෝ භවාමි
පශ්‍යාති තම් තම් මොහ්‍යතුස්වාහා

ඕම් කාම දේවාය විද්මහේ
පුෂ්ප භානාය ධීමහී
තන්තෝ අනංගඃ
ප්‍රචෝදයාත්

ජ්‍යොතිෂවේදී එච්. පුංචි බණ්ඩාර
කුරුණෑගල