ජන්මියාට හොඳ වෙන්නෙ කුජට ගැළපෙන හවුල්කාරයෝ

ග්‍රහලොව සෙන්පති ලෙසින් සලකන්නෙ කුජ ග්‍රහයාය. කුජ සමඟින් සංයෝග වන විවිධ ග්‍රහයන් අනුව ලැබෙන ප්‍රතිඵල වෙනස් වෙයි. ඒ අනුව ජන්මියාට යහපතක් කරන්නත්, අයහපතක් කරන්නත් ඒ ඒ ග්‍රහ සංයෝග අනුව කුජට අසීමිත කාලයක් ලැබෙන බව ජ්‍යොතිෂයේ සඳහන් වෙයි.
කුජ-රවි සංයෝගය
කුජ – රවි සංයෝගයෙන් උපන් අය රජකුට සමානය. එවැන්නන් කිසිවකුට දෙවැනි වන්නේ නැති බවත්, දැඩි ආත්ම විශ්වාසයකින් යුතුව ඕනෑම කටයුත්තක නිරත වීමේ ශක්තිය මේ අයට ඇති බවත් පැවසෙයි. රජයේ උසස් නිලතල ලබයි. දැඩි හිතුවක්කාර අදහස් ඇත්තකුද වෙයි.
කුජ-සඳු සංයෝගය
චන්ද්‍ර මණ්ඩල යෝගය වශයෙන් හඳුන්වන මෙම සංයෝගය පුර සඳ සමග සිදු වීම නිසා සිත යහපත් ක්‍රියාවන්ට යොමු කරවයි. සමාජයේ ගෞරවය හිමිකර දෙයි. අවසඳ සමඟ සංයෝග වූ විට නින්දා, අපහාස විඳීමට හේතු ඇති කරයි.
කුජ-බුධ සංයෝගය
මෙම යෝගය ඇත්නම් තරගයේ සහ කථිකත්වයේ දක්‍ෂයෝය. කරන, කියන කටයුතුවල නිපුණයෝ වෙති. මෙම සංයෝගය අසුබ වූ විට කපටියකු බවට පත්වෙයි.
කුජ-සිකුරු සංයෝගය
මෙම යෝගය විනෝදකාමී පුද්ගලයන් බිහිකරයි. මෙමඟින් පිරිමි අය ගැහැනු කෙරෙහිද, ගැහැනු අය පිරිමි කෙරෙහිද සමීප කරවයි. මෙය දෙපක්‍ෂයටම අසුබ ගෙන දෙන අධි කාම යෝගයකි. එහෙත් සමාජයේ ජනප්‍රියතාව නොඅඩුව ලැබේ.
කුජ-ගුරු සංයෝගය
කුජ-ගුරු සංයෝගයේ යහපත් පුරවැසියකු රටට දායාද කරයි. උසස්, බුද්ධිමත්, වැඩදායී පිරිසක් බිහිකිරීමට දායක වෙන්නේ මෙම යෝගයෙනි.
කුජ-ශනි සංයෝගය
මෙම යෝගය ඇති අය තමන් කරන දෙය අවසානය දක්වා කරගෙන යන්නට සමත්කම් දක්වයි. කෘෂිකර්මාන්තය පතල් කර්මාන්තය ආදියෙන් ජයගත හැකිය. කටක රාශියේ මෙම යෝගය පිහිටීම අසුබය.
කුජ-රාහු සංයෝගය
ප්‍රවේගකාරී කටයුතු කර ජය ලබන්නට මේ අයට ශක්තිය ලැබනෙ අතර, එක්තැනක එක විදියට කාලයක් වැඩ කිරීමට අසමත් වෙයි. කෙසේ නමුත් හොඳ-නරක දෙකටම මේ අය සමත්කම් දක්වයි. නීතිය හමුවේ වරදකරුවන් වීමටද ඉඩ ඇත.
කුජ-කේතු සංයෝගය
කුජගේ ප්‍රවේගකාරී බව අඩපණ කරන ග්‍රහයෝගයකි. කපටි කෛරාටික කටයුතු කෙරේ උනන්දු වන අතර, එමඟින් නීතියෙන් දඬුවම් විඳින්නටද සිදුවිය හැකිය.
ජ්‍යොතිෂවේදී ටී. හෙන්රි බෙම්මුල්ල