කෙල්ලො පෙම් රැල්ලෙ යවන කුජ – ශුක්‍ර ග්‍රහ රැල්ල

ග්‍රහලොව සුරතලිය මනාලිය, රූමතිය, කාමරුචිරානිය සිකුරු හෙවත් ශුක්‍රයි. රතු මල්ලී ලෙසින් හැඳින්වෙන කුජ අඟහරු ලේවලට අධිපතිය. තවත් තනතුරු දරයි. කුජ, ශුක්‍ර තාරුණ්‍යයේ පසුවන ජෝඩුවකි. කාමය උසිගන්වනසුලුය. කුජ (අඟහරු) ලෝකෝත්තර පැත්ත ගැන නොසිතා මෙලොව ගැනම සිතන ග්‍රහයෙකි. කන්‍යාවට අධිපති බුධය. සිකුරු ඔහු සමඟ එක් වන්නේ නම් අධ්‍යාත්මික පැත්තට නැඹුරුවේ.

සිකුරුගේ සෞන්දර්ය පැත්ත වැඩි නිසා ඉක්මනින් පොලඹවා ගැනීමට කුජට හැකිවේ. කුජ ශුක්‍ර මේෂ, වෘෂභ, තුලා, වෘශ්චික රාශිවලටත් මකර, කටක, කන්‍යා රාශිවලත් හැර වෙනත් රැසක වූයේ නම් තරුණයකු නම් සමාජයට නොපෙනෙන සේ ස්ත්‍රීන් රැසක්ම සමඟ වයසද නොසලකා හැසිරේ.

ඉඩලද හැම විටකම කාන්තාවන් නම් තමා වෙත වශී කරගෙන චරිතය කැළැල් කරනු ඇත. ඔහු ඉතාම උපක්‍රමශීලීය.

කුජ ශුක්‍ර කන්‍යාවේ නම් හෙතෙම ස්ත්‍රී ලෝලත්වය පිළිබඳ සිහින මවන උන්මත්තකයකු වෙයි. සේවනය දුර්වල වූවන් නිතරම සිතේ කාම මැලියම ගෑවී ඇත.

කුජ ශුක්‍ර සංයෝගය ඇති සමහර පිරිමි කාමය අවුස්සාගෙන පොත්පත්කරණයට දක්ෂ වෙයි. ස්ත්‍රීන් පිළිබඳ ගෘංගාරය ඉස්මතු කරන ගැදි පැදිකරණයේ යෙදෙයි. කුජ ශුක්‍ර ශනි යෙදීමෙන් සිත් තැවුල් ඇති වී දිවිනසා ගැනීමට වරෙක පෙලඹෙයි.

ගුරු, කුජ, ශුක්‍ර යෝගය හරහා තමා කරන සියලුම වැඩ කටයුතු ඉතාම දක්ෂ ලෙස කරනු ඇත. ක්‍රියාශීලීය. නිර්මාණශීලීය. රවියෝග වුවහොත් සමාජයට නොපෙනෙන සේ සිය සිතැඟි සම්පූර්ණ කරගනු ඇත. කුජ, ශුක්‍ර, මේෂ, වෘෂභ, තුලා, වෘශ්චික, මකර, කන්‍යා, කටක රාශිවල දුසිරිත්වල යෙදීම අඩුයි. කාන්තාවන් අතර ආදරයට පත්වන මෙම යෝගය යෙදී ඇති පුරුෂයන්ට සම්පත් දේපළ වැඩියෙන් හිමි වෙයි. සමාජයේ කැපී පෙනෙන ධනවතෙක් ද වෙයි.

නමුත් මේ දෙදෙනාගෙන් කුජ, ශුක්‍ර, යමකුගේ 1 හෝ 7 වැන්නට සම්බන්ධ වූ විට විවාහය අවුල් කරනු ඇත. මකර ලග්නයට කුජ, ශුක්‍ර 7 වැන්නේ සඳුගේ රැසක සිටීමෙන් අයථා සබඳකම්වල නියැළෙයි.

මේ අයහපත් පිහිටීම නිසා මනස අවුල් වී කාමරාගීය ගින්නෙන් රත්වූ විට අනාචාරයේ හැසිරී තම ධනය මුදල් වැය කර පසුව සිත් තැවුලට පත්වන්නේය. පුරුෂයකුට කුජ, ශුක්‍ර යෝගය පිහිටා තිබීම නිසා අන් අඹුවන් කරා ගොස් තම මිල මුදල් නිකරුණේ වැය කරන තැනට පත්වෙයි. එය හරියටම කාම කොවුලාට අඹ දලුවක් වැනිය, කුජ ශුක්‍ර යෝගය.

සමහර විට මත්ද්‍රව්‍යවලටත් ගොදුරු වෙයි. ජීවිතය අසාර්ථක කරගනියි.
විවාහ වීමට අදහස් කරන වැඩි පිරිසක් කේන්ද්‍ර දෙකම ජ්‍යොතිෂවේදියකුටදී මිනිත්තු කිහිපයකින් දෙදෙනාගේම ගැළපීම් හොඳදැයි අසයි. සෘෂිවරයකුටවත් මිනිත්තු කිහිපයකින් දෙදෙනාම ගැළපේදැයි කිව හැකිද? සීමාසහිත දත්ත අනුව දෙදෙනාගේ කායික මානසික හැසිරීම් රටාව නිවැරැදිව සොයාගත හැකිද?

විවාහ දෝෂ 20ක් පමණ වෙයි. උඩින් පල්ලෙන් පොරොන්දම් ගැළපීම් ලකුණු 36 මත බලා විවාහයට තීරණය කිරීම අද සාම්ප්‍රදායික රාමුවකි.

නිවැරැදි කේන්ද්‍රයක පුද්ගල ජීවිතයේ ඇතුළත පෙනෙන ඇසක් හෙවත් කණ්ණාඩියකි.
පෙම්වතියක් හෝ පෙම්වතෙක් හරි හැටි ඇත්තම චරිතය හඳුනාගැනීමට එකම පහසුම මඟ ඔහුගේ හෝ ඇයගේ එකවරම උපක්‍රමශීලීව සිත රිද්දවීම. එවිටයි සර්ප ලක්ෂණ එළියට එන්නේ. සිය දේව ගණය වුණාට අසභ්‍ය වචනයෙන් බැන්නොත් වැඬේ හරි.

ග්‍රහයන්ට දොස් කියල වැඩක් නැහැ. විවාහයට පිරිමි අඩු එකයි තියෙන එකම ප්‍රශ්නය?
ප්‍රවීණ ජ්‍යොතිෂවේදී ටී. හෙන්රි බෙම්මුල්ල