අහල තිබුණට දන්නෙ නැති 22 දෙර්කාධිපති

කෙනකුට මරණය ගෙන ඒමට තරම් බලවතෙක් යැයි කියන 22 දෙර්කාණාධිපති ගැන නිතර නිතර ජ්‍යොතිෂය තුළ කියැවෙයි. කවුද මේ දෙර්කාණාධිපති. ජ්‍යොතිෂය ගැන හරියට නොදන්න කෙනකුට හිතෙන්නෙ එහෙම. එනිසා 22 දෙර්කාණාධිපති සම්බන්ධව ඔබ දැනසිටිය යුතුමයි.

ලග්න කේන්දරයකට හිමි 22 දෙර්කාණාධිපති සොයාගනු ලබන්නේ මෙලෙසයි. යම් ජන්මියකු උපත ලබන විට ලග්න කේන්දරයේ මුල් නවාංශක තුනෙන් එකක් උදාවී ඇත්නම් ඔහුගේ කේන්දරයේ 22 දෙර්කාණාධිපති වන්නේ ලග්න කේන්දරයේ 8 අධිපතියායි. එමෙන්ම යම් ජන්මියෙක් උපත ලබන විට මැද නවාංශක තුනෙන් එකක් උදාවී ඇත්නම් ඔහුගේ කේන්දරයේ 22 දෙර්කාණාධිපති වන්නේ එම ලග්නයේ 12 වැන්නාධිපතියායි. යම් ජන්මියකු උපත ලබන විට අග නවාංශක තුනෙන් එකක් උදාවී ඇත්නම් ඔහුගේ කේන්දරයෙහි 22 දෙර්කාණාධිපතියා වන්නේ එකී ලග්නයෙන් සිව් වැන්නාධිපතියායි. එසේම කේන්දරයෙහි ලග්න ස්ඵුටය සටහන් කර ඇත්නම් එම ලග්න ස්ඵුටය භාවිත කර ඉතා පහසුවෙන් 22 දෙර්කාණාධිපතියා සොයා ගන්නටද හැකියාව ඇත.

ඒ අනුව ලග්න ස්ඵුටය 0-10 අතර නම් 22 වැනි දෙර්කාණාධිපතියා වන්නේ එකී ලග්නයෙන් 8 අධිපතියාය. ලග්න ස්ඵුටය 10-20 අතර නම් 22 වැනි දෙර්කාණාධිපතියා වන්නේ එම ලග්නයෙන් 12 වැන්න අධිපතියායි. ලග්න ස්ඵුටය 20-30 අතර නම් 22 වැනි දෙර්කාණාධිපතියා වන්නේ එම ලග්නයෙන් 4 වැන්නාධිපතියායි.

මෙයට අමතරව කේන්දරයක දෙර්කාණ ලග්නය සටහන් කර ඇත්නම් එයින්ද 22 වැනි දෙර්කාණාධිපතියා සොයාගත හැකියි. කේන්දරයකට අයත් පළමු දෙර්කණ ලග්නය උත්පත්තියේදී උදාවී ඇත්නම් 22 වැනි දෙර්කාණාධිපතියා වන්නේ ලග්න කේන්දරයේ 8 වැන්නාධිපතියායි. එමෙන්ම ලග්න කේන්දරයට අයත් දෙවැනි දෙර්කාණ ලග්නය උපතේදී උදාවී ඇත්නම් 22 වැනි දෙර්කාණාධිපති වන්නේ ලග්නයෙන් 12 වැන්නාධිපතියායි. ලග්න කේන්දරයට අයත් තෙවැනි දෙර්කාණ ලග්නය උපතේදී උදාවී ඇත්නම් 22 වැනි දෙර්කාණාධිපතියා වන්නේ ලග්නයෙන් හතර වැන්නාධිපතියායි.

ඒ අනුව පැහැදිලි කරගත යුතු විශේෂ කාරණා වන්නේ මෙම 22 වැනි දෙර්කාණාධිපතියා 8 හෝ 12 වූ විට සහ එකී 8, 12 යන දෙර්කාණාධිපතියකු ලග්න කේන්දරයට 22 වැනි දෙර්කාණාධිපතියා වී පාප පීඩිත වී ඇති කල එකී 22 වැනි දෙර්කාණාධිපතියාට අයත් මහා දශාවන් හෝ අන්තර් දශාවන් ලැබූ කල ජන්මියාට තදබල අපල, විපත් ඇති කරන බවයි.

කෙසේ නමුත් 4 වැන්නාධිපති 22 වැනි දෙර්කාණාධිපති වශයෙන් සෑම ලග්නයකටම අසුබපල උදාකරන්නේ නැත. 4 වැන්නාධිපති 22 වැනි දෙර්කාණාධිපතියා වශයෙන් අසුබ පල උදාකරන්නේ කටක, කන්‍යා, වෘශ්චික, මකර, මීන යන ලග්නවලට පමණි. එයින් කටක ලග්නයේ අවසන් දෙර්කාණයේ උපත ලැබූ කල, 22 වැනි දෙර්කාණාධිපතියා වන්නේ එම ලග්නයෙන් සිවුවැන්නාධිපති වන සිකුරුය. සිකුරු, කටක ලග්නාධිපති සඳුට සතුරු ග්‍රහයකු වීමත්, බාධක, සාමය වන 11 වැන්න වූ වෘෂභ රාශියෙහි අධිපති වීමත් යන කරුණු මත සිකුරු, කටක ලග්නයට 22 වැනි දෙර්කාණාධිපතියා වී අසුබව පිහිටි කළ අසුබ පල ලබාදෙයි.

කන්‍යා ලග්න කේන්දරයෙහි තෙවැනි දෙර්කාණයෙන් උපත ලබා ඇති විට 4 වැන්නාධිපති ගුරු ග්‍රහයා 22 වැනි දෙර්කාණාධිපතියා වන්නේය. එම ගුරු කන්‍යා ලග්න කේන්දරයක කේන්ද්‍රස්ථාන දෙකකට හිමිකම් කියන නිසා බාධක ග්‍රහයා බැවිනුත්, ලග්නාධිපති බුධට සතුරු වීම නිසාත් ගුරු, කන්‍යා ලග්න කේන්දරවල 22 වැනි දෙර්කාණාධිපති වී අසුබව පිහිටි කල ගුරුට අයත් මහා දසා සහ අතුරු දසාව ලැබූ ජන්මියාට අපල ගෙනදෙනු ඇත. වෘශ්චික ලග්නයෙහි අවසන් දෙර්කාණයෙන් ජන්මය ලැබූ අයකුගේ 22 වැනි දෙර්කාණාධිපතියා වන්නේ එකී ලග්නයෙන් 4 වැන්නාධිපතියා වන සෙනසුරුය. සෙනසුරු එම කේන්දරයේ යම් භාවයක පාප පීඩිතව ඇති කල සෙනසුරු ග්‍රහයාට අයත් මහ දශා අතුරු දශාවලදී අපල ගෙනදෙයි.

මකර ලග්නයෙහි අවසන් දෙර්කාණයෙන් උපත ලබා ඇති විට 22 වැනි දෙර්කාණාධිපති වන්නේ මකර ලග්නයේ සිවුවැන්නාධිපති අඟහරුය. අඟහරු, මකර ලග්නාධිපති සෙනසුරුට සතුරු මෙන්ම 11 වැන්නාධිපති වෙමින් මකර ලග්න කේන්දරයට බාධක ග්‍රහයාද වන්නේය. එනිසා 22 වැනි දෙර්කාණාධිපති අඟහරු ලග්න කේන්දරයේ යම් භාවයක පාපපීඩිතව ඇත්නම් අඟහරුට අයත් මහ දශා සහ අතුරු දශාවල අයහපත් පල ලබා දෙන්නේය.

මීන ලග්නයෙහි අවසන් දෙර්කාණයෙන් උපත ලබා ඇති අයකුගේ 22 වැනි දෙර්කාණාධිපති ග්‍රහයා වන්නේ බුධය. බුධ ලග්නාධිපති ගුරුට සතුරු ග්‍රහයෙකි. එමෙන්ම කේන්ද්‍රස්ථාන දෙකකට හිමිකම කියන ග්‍රහයකු නිසාත් මීන කේන්දර හිමියාට බාධක ග්‍රහයා වන්නේය.
එනිසා බුධ, මීන ලග්න කේන්දරයක පාප පීඩිතව ඇත්නම් බුධගේ මහ දශා, අතුරු දශාවලදී දැඩි අසුබපල උදාකරයි.

මේ අනුව ඔබට ඒ ඒ ලග්නවලට 22 වැනි දෙර්කාණාධිපතිගේ ඇති බලපෑම් හඳුනාගත හැකිය. කෙසේ නමුත් 22 වැනි දෙර්කාණාධිපති සම්බන්ධව තීන්දු, තීරණ ගැනීමට ඒ පිළිබඳව වඩාත් හොඳින් පැහැදිලිව අධ්‍යයනය කළයුතුය. එසේ නොවුණහොත් සියයට සියයක් සාර්ථක පලාපල කථනයක් නොලැබෙන්නට ඉඩ ඇත.
ජයශ්‍රී නන්ද කුමාර