අතරමග නතර නොවී ගෙයක් හදන විදිහ

ගෙයක් හදාගන්න ඕන කියන තීන්දුව අරගෙන ඊට සූදානම් වන කෙනෙක් මුලින්ම කරන්නෙ තමන් දන්න හෝ නොදන්න ජ්‍යොතිෂවේදියෙක් ළඟට ගිහින් ගෙයි වැඩ පටන්ගන්න නැකැතක් හදවා ගන්න එක. ජ්‍යොතිෂවේදියන් වැඩි කරුණු අනවශ්‍යය යැයි හිතාගෙන ඔවුන් නැකැතක් ලබා දෙනවා. ඒ නැකැතට මංගල පස් පිඩැල්ල කපලා නිවෙස ඉදිකිරීම් ආරම්භ කළත් එහෙම වැඩ පටන්ගන්න අයගෙන් බහුතරයකට ගෙයි වැඩ අවසන් කරගන්න හැකි වෙනවද කියන එකත් සැක සහිතයි. බොහෝ දුරට ගෙයි වැඩකටයුතු අවසානය දක්වා නිම කරලා සිතූ වේලාවටම එහි පදිංචියට අවස්ථාව ලැබෙන්නේ සියයට විස්සකට, තිහකට පමණයි. එසේ පිරිසකට වැඩකටයුතු අවසන්කර ගන්නට නොලැබෙද්දී පිරිසකට වැඩ අවසන් කරගන්නට ලැබෙන්නේ පෙර පිනට කිව්වත් වරදක් නැහැ. මොකද කලබලෙන් ආවට – ගියාට පැයෙන්, දෙකෙන් ගෙයක් හදන්න නැකැතක් බලවා ගැනීම එතරම් සාර්ථක නැහැ. හොඳම දේ තමයි ජ්‍යොතිෂවේදියෙක් ඊට ගැළපෙන කාලයක් ගෙන ජන්ම පත්‍ර හොඳින් පරීක්‍ෂා කර නැකැතක් ලබා දීම, බොහෝ දුරට වැඩ පටන්ගෙන වසර කිහිපයක් යනතුරුත් නිවෙසක වැඩ අවසන් කරගන්නට නොලැබුණොත් නිසැකවම එහි දෝෂ ඇති බව වටහාගත යුතුමයි. එම දෝෂ නිවෙසේ හෝ වැඩ ඇරැඹූ නැකැතේ වුවද තිබිය හැකියි.

යම් කෙනෙක් ගෙයක් හදන්නට බලාපොරොත්තු වෙනවා නම් ඔයාගේ හෝ ඇයගේ උත්පත්ති කේන්දරයේ 4 වැන්න පිළිබඳව වැඩි අවධානයක් යොමු කළ යුතුයි. 4 වැන්න අධිපති ඉතා හොඳ තත්ත්වයෙන් සිටිය යුතු අතර, එයට 22 දෙර්කාණාධිපති බාධක ග්‍රහයා හෝ වෙනත් පාප ග්‍රහ බලපෑම් අවම තත්ත්වයේ ඇත්නම් නිවාස කටයුතු ඉක්මනින් කරගත හැකිය. එසේම මහ දශා, අතුරු දශා ගැනද සැලකිලිමත් වීම වැදගත් වන බැවින් අසුබ දශාවක යෙදෙන නැකැත්වල වැඩ ආරම්භය කිසිසේත්ම සුදුසු නැත. එසේම ගෝචර ග්‍රහ තත්ත්වය අනුව 4 වැන්නට බලවත් ග්‍රහයකු ත්‍රිකෝණවෙන කාලයද නිවාස වැඩ සඳහා හොඳින්ම ගැළපෙයි. තවද අෂ්ටක වර්ග කේන්දර පරීක්‍ෂාවට අනුව 4 වැන්නාධිපති බලවත් රාශියක ගෝචර වන අවස්ථාවක් වේ නම් එම කාලයද නිවාස කටයුතු ඉතාමත් ඉක්මනින් කරගත හැකි හොඳ කාලයකි. එසේම සඳු ඉතා බලවත් තත්ත්වයේ පසුවන ජන්මීන්ටත් නිවාස කටයුතු සඵලකර ගැනීමේ බලයක් තිබේ.
මේ තත්ත්ව කේන්දර පරීක්‍ෂාවෙන් හඳුනා ගැනීමට ජ්‍යොතිෂවේදියා දක්‍ෂ විය යුතුය. එසේම යම් අයකුගේ ග්‍රහ තත්ත්වය දුර්වල නම් ඒ අයට ඉක්මනින් නිවෙසක අවශ්‍යතාවක් ඇත්නම් ඔවුන්ගේ කුසල් වර්ධනය කරගැනීමට අවශ්‍ය කෙරෙන වත්පිළිවෙත් ඇත. ඒ සඳහා සුදුසු දෙවිවරුන් වෙත භාරවිය යුතුය. ඉන්පසු නැකැත් යෙදෙන දිනයට පෙර දින පූජාවක් ලබාදිය හැකිනම් වඩාත් සුදුසු වෙයි. ඒත් එසේ කිරීමට අපහසුතා ඇත්නම් ඊට සුදුසු පලතුරු පූජාවකින් පසු අට කොන පහන් දල්වා භූමියට අරක්ගත් දෙවි දේවතාවුන්ට පින් ලබා දී පින් අවශ්‍ය මළගිය ප්‍රාණකාරයන් එහි අරක්ගෙන ඇත්නම් ඔවුන්ටද පින් ලබාදී ඉන්පසුව අටකොන පරීක්‍ෂා කර නිවාස වැඩ ඇරැඹීමෙන් සාර්ථක ප්‍රතිඵල අත්කර ගැනීමට පහසුවනු ඇත.

බොහෝ දෙනෙක් නිවාස වැඩ ආරම්භයේදී කරන වැරැදිද ඇත. ඒ අතර වෙළෙඳසලේ ඇති ප්‍රමිතියෙන් තොර මුල්ගල් රැගෙන තැන්පත් කිරීමත් එක වරදකි. එසේ නොකර එය නිවෙසේ තනාගෙන පිරිත්කර ගන්නට හැකිනම් සැකයකින් තොරව නිසි පල අපේක්‍ෂා කළ හැකිය. ඊළඟ ප්‍රධාන කාරණය නිවෙසේ සැලැස්ම පෙදරේරු මහතාට ලබා දීමට ප්‍රථම එහි සියලු අංග වාස්තුවේදියා ලවා පරීක්‍ෂා කරවා ගෙන දෝෂ නැති වගට ස්ථිර කරගැනීම වැදගත් වෙයි. ඇතැම් අය පෙදරේරු මහතාගෙන් වාස්තු රහස් අපේක්‍ෂා කළද ඔහු එම තොරතුරු හරියාකාරව නොදන්නෙක් නම් අවසානයේ අපහසුවට පත්වෙන්නෙ නිවාස හිමියාමය.

ඉක්මනින් සහ පහසුවෙන් නිවෙසක් ඉදිකර ගැනීමට සිතන අය තේරුම් ගතයුතු ප්‍රධානම කරුණ වන්නේ ඊට වසරකට පමණ පෙර සිය ජ්‍යොතිෂවේදියා හමුවී විස්තර කතාකොට කේන්දර පරීක්‍ෂා කරවාගෙන සුදුසු දින වකවානු අසා දැනගෙන කලින් සූදානම ඉතාමත් වැදගත් බවයි. එසේ කිරීමෙන් නිවාස සිහින සැබෑකර ගැනීමට කිසිවකුටත් අපහසු වත්මන් නැත.
ජ්‍යොතිෂවේදී ටී. බණ්ඩාර