2020 ජනවාරි මස 24 වැනි සිකුරාදා පෙරවරු 09.56ට මකර රාශියට ඇතුළු වන සෙනසුරු ග්රහයා 2022 මැයි මස 01 වැනිදා දක්වා මකර රාශිය හරහා ගමන් ගනී. අනෙකුත් ග්රහයන් මෙන් නොව මිනිස් ජීවිතයට කරදර, බාධක, ලෙඩ-දුක් තත්ත්වයෙන් පහළ වැටීම අතින් සෙනසුරුට හිමි වන්නේ විශේෂ ස්ථානයකි. සෙනසුරු ග්රහයාට එක රාශියක් පසුකර ගමන් ගැනීමට සාමාන්යයෙන් වසර 2 1/2ක් පමණ ගත වෙයි. මෙසේ ගමන් කිරීම හේතු කොට ගෙන ඒ ඒ ලග්නයට අනුවත්, ජන්ම පත්රයේ සඳු සිටිනා ස්ථානයට අනුවත්, ඒරාෂ්ටක අපල නිර්මාණය වෙයි. කේන්දරයක ලග්න භාවය, ඊට කලින් භාවය (12 වැන්න) සහ ඊට පසු භාවය හරහා සෙනසුරු ගමන් ගන්නා වසර 7 1/2 කට ආසන්න කාලයක් ලග්න ඒරාෂ්ටකයයි. ලග්න භාවයෙන් 8 වැන්න හරහා සෙනසුරු ගමන් ගැනීමේ වසර 2 1/2කට ආසන්න කාලය, ලග්න අෂ්ටම ඒරාෂ්ටකයයි.
2020 ජනවාරි 24 වැනි දින සෙනසුරු ග්රහයා මකර රාශියට ඇතුළු වීමත් සමඟ මකර ලග්න හිමියන්ට මෙතෙක් පැවැති ඒරාෂ්ටක අපල තත්ත්වය බලවත් වෙයි. මකර ලග්න හිමියන්ට සෙනසුරු අපලයේ උපරිම අවස්ථාව බලපාන්නේ සෙනසුරු ග්රහයා තමන්ගේ ලග්න ස්ඵුටය මතින් ගමන් කරන විටය. සෙනසුරු ලග්න ස්ඵුටය මතින් ගමන් කරන අවස්ථාවේදී මකර ලග්න හිමියන් විශේෂයෙන් ප්රවේශම් විය යුතුය.
ලග්න ස්ඵුටය ලෙස හඳුන්වන්නේ කෙනකු උපදින අවස්ථාවේ ඔහුට හිමි ලග්නයේ, අංශක 30න් කිනම් අංශක කලා ගණනක්, නැඟෙනහිර ක්ෂිතිජයෙන් මතුවී තිබුණාද යන්නයි. සමහර ජන්ම පත්රවල මෙම අංශක කලා ගණන සටහන් කර තිබුණද එසේ නොමැති ජන්ම පත්රද හමුවෙයි. එවැනි අවස්ථාවලදී ලග්න ස්ඵුටය ආසන්න වශයෙන් නවාංශකය පදනම් කරගෙන සොයාගත හැකි ක්රමයක් තිබේ. මකර රාශිය තුළ නවාංශක බෙදී යන්නේ මෙසේය.
* 00′ – 03’20’ මකර නවාංශකය
* 03’20’ – 06’40’ කුම්භ නවාංශකය
* 06’40’ – 10’00’ මීන නවාංශකය
* 10’00’ – 13’20’ මේෂ නවාංශකය
* 13’20’ – 16’40’ වෘෂභ නවාංශකය
* 16’40’ – 20’00’ මිථුන නවාංශකය
* 20’00’ – 23’20’ කටක නවාංශකය
* 23’20’ – 26’40’ සිංහ නවාංශකය
* 26’40’ – 30’00’ කන්යා නවාංශකය
ඔබ මකර ලග්නයෙන් ඉපදී මකර නවාංශකයද ඇතිව ඉපදී ඇත්නම් සෙනසුරු මකර රාශියේ අංශක 00 හෝ අංශක 01 කලා 20ත් අතර සෙනසුරු ගමන් කරන කාලය තුළදී විශේෂයෙන් ප්රවේශම් විය යුතුය. එසේම ඔබ ඉපදී ඇත්තේ මකර ලග්නයේ කුම්භ නවාංශකයෙන් නම් සෙනසුරු ග්රහයා මකර රාශියෙහි අංශක 03 කලා 20ත්, අංශක 06 කලා 40ත් අතර ගමන් කරන කාල සීමාවෙහි විශේෂයෙන්ම ප්රවේශම් විය යුතුය.
තවද 2020 ජනවාරි 24 සිදුවන මෙම සෙනසුරු මාරුව මිථුන ලග්න හිමියන්ටද ඍජුවම බලපානු ඇත. එයට හේතුව මිථුන ලග්න හිමියන්ගේ 8 වැනි රාශිය වන්නේ, මකර රාශියයි. ලග්නයෙන් 8 වැන්නේ සෙනසුරුගේ ගමන් කිරීම නිසා ඇති වන ලග්න අෂ්ටම ඒරාෂ්ටකයට මිථුන ලග්න හිමියන්ට මුහුණ දීමට සිදුවෙයි.
මීට අමතරව ජන්ම පත්රයේ මකර රාශිය තුළ සඳු තැන්පත්ව සිටින කේන්දර හිමියන්ටද මෙම ග්රහ මාරුව ඉතාමත් දැඩි ලෙස බලපාන බව සඳහන් කළ යුතුයි. උපතේදී මකර රාශිය තුළ සඳු ගමන් කරමින් සිටි අංශක ගණන මතින් සෙනසුරුගේ ගමන සිදුවන දිනවලදී ඔවුන් ඉතාමත් ප්රවේශම් විය යුතුයි.
එමෙන්ම උපතේදී මිථුන රාශියේ සඳු තැන්පත්ව සිටි කේන්දර හිමියන්ට මෙම ග්රහ මාරුවත් සමඟම ජන්ම අෂ්ටම ඒරාෂ්ටකය බලපානු ඇත. මෙවැනි ඒරාෂ්ටක අපලයක් ඉදිරියේදී තමන්ට ඇතිවන බව දැනගත් විට ඒ සඳහා අවශ්ය පිළිවෙත් ඉටුකර සියලු දුසිරිත්වලින් ඈත්ව, පින්දහම් කරමින් ජීවත් වීමෙන් බොහෝ දුරට එම අපල මඟහරවා ගතහැකි බව ප්රත්යක්ෂ වී තිබේ. සෙනසුරුගෙන් ඇති වන අපලවලට පිළිවෙත් වශයෙන් ජ්යොතිෂ විද්යාවේදී පහත පිළිවෙත් අනුගමනය කළ හැකිය.
- විෂ්ණු දෙවියන්ට පූජා තබා පිහිට පැතීම.
- කාක නිල් මැණික් ගලක් යෙදූ යකඩ මිශ්ර ලෝහයෙන් තැනූ මුදුවක් පැලඳීම.
- නුග ගසකට සාත්තු කිරීම, ගස ස්පර්ශ කිරීම.
- සෙනසුරාදා උදේට ගිතෙල් මිශ්ර කිරිබත් කපුටන්ට දීම.
ජ්යොතිෂ විද්යා විශාරද අගලවත්තේ චන්දන වීරක්කොඩි
