ඉතා බිහිසුණු අන්දමින් පැතිරීයන කොවිඩ්-19 වසංගත මර්දනය කිරීමට ක්රියාත්මක කෙරෙන නිරෝධායන නීතිරීති උල්ලංඝනය කරන්නකු සති තුනක කාලයක් රැඳවුම් භාරයේ තබන බවට නියෝගයක් චීනයේ සිජියෑං පාලනාධිකාරිය නිකුත් කර තිබේ.
මේ මාසය ආරම්භයේ සිට කොවිඩ් වසංගතය ඉතා දරුණු ආකාරයෙන් ව්යාප්ත වන බැව් මාධ්ය කියයි.
චීනයට මේ අනතුර පිළිබඳ පූර්ව අවවාදාත්මක ආරංචිය පැමිණියේ ආසන්න රට වන තිබ්බත (ටිබෙට්)යෙනි. ඒ, එරට අගනුවර වන “ලාෂා” පුරය දින තුනකට අගුළුලෑම නිසාය.
සියෑං පළාතෙන් පසුගිය සිකුරාදා පමණක් රෝග ලක්ෂණ නොපෙන්වන කොවිඩ් රෝගීන් 410ක් හඳුනාගනු ලැබ තිබේ. මේ අනුව එම පළාතේ සමස්ත කොවිඩ් ආසාදිතයන් ප්රමාණය 1,727කි. එම ප්රදේශයේ ලැන්ගාර් නමැති නගරයේ නිලධාරියකු මාධ්යයට ප්රකාශ කළේ තමාට “යෙන්ගියාවත්” නමැති ගමේ පවුල් දහයක් අධීක්ෂණයට පවරා ඇති බවයි. සෑම නගරයකම අණ නොතකා වීදිබට ප්රදේශවාසීහු සිටිත් දැයි පරීක්ෂා කරනු ලැබීමට සංචාරක මුර සේවයක් යොදවා ඇති බවද ඔහු කීවේය. එසේ නීතියට පටහැනිව නගරයේ හැසිරෙන්නකු වී නම් කිසිදු සමාවක් නැතිව උන්දැට අනිවාර්යයෙන්ම සති තුනක් “ආණ්ඩුවේ බෝඩිමේ” ලගින්නට සිදුවෙන බව හෙතෙම කීවේය. කොවිඩ් වෛරසය මර්දනයට අප විසින් හඳුන්වාදෙනු ලැබූ නිරෝධායන උපදෙස් මාලාව නොතකා මහ මඟ සැරිසරන්නන් වේ නම් එවන් පිරිස අත්අඩංගුවට ගෙන එම නිරෝධායන පාඨමාලාව පිළිබඳ යළිත් පුහුණුවක්දීම සඳහා දින පහළොවත් විස්සත් අතර කාලයක් රැඳවුම්භාර ගතකරන බවට සමස්ත ප්රදේශවාසීන්ම දැනුවත් කළ බව ඔහු පැවැසුවේය. ගම්මානයේ කාන්තා කමිටුවේ නායිකාව පැවැසුවේ ගෘහස්ථව වෙසෙන සෑම කෙනකුටම අවශ්ය ඖෂධ ඔවුන් වෙසෙන නිවෙස් වෙතම යැවූ බවය. “අප විසින් බෙදාදෙනු ලෑබූ ඖෂධය ක්රීම් වර්ගයක්. ඒවා ලෙඩේට හොඳ බව විතරයි අපටත් කීවෙ. ඊට වැඩිමනත් විස්තරයක් අප දන්නෙෑ” කාන්තා කොමිටි නායිකාව විස්තර කළාය. සියලු ආසාදිතයන් රඳවා තැබීම සඳහා උරුම්කි, (උළුමුකී) ගවුජා (යිංඉං) අක්සු (අකේසු) කුමුල් (හාමි) කොචෙක් (ටෙචෑං) සහ බෝතලා (බෝලෙ) යන නගරවල නිරෝධායන කඳවුරු ස්ථාපනය කර ඇති බව චීන රාජ්ය මාධ්ය පසුගිය සතියට පෙරාතුව නිවේදනය කෙළේය. මෙවර කොවිඩ් වෛරසය චීන සංචාරකයන් විසින් “ගන්සු” පළාතෙන් ගෙනෙනු ලැබ ඇති බවට විශ්වාස කෙරෙන බව ද පළමු වෛරස් ආසාදන ව්යාප්තිය ඌචාගන්ජන් පළාතේ “ගවුජා” ගම්මානයෙන් ඇරඹි බවද ප්රජා නිලධාරියෙක් පැවැසුවේය. අගුළු වැටීම නිසා තමන්ගේ දෛනික කටයුතු හෝ කරගත නොහැකි වී ඇති බව සිංජිඈං පළාතේ බොහෝ දෙනෙක් මාධ්යයට පැවැසූහ. තමන්ට තම ගොවිපොළවලට යා නොහැකි බව ගොවියෝ කීහ. මාළු සහ මස් වැනි ආහාර ද්රව්ය තබාගැනීම විශාල ගැටලුවක් බව ව්යාපාරිකයෝ විස්තර කළහ.
චන්ද්රසේන මාරසිංහ
