තායිවානයේ නව ජනාධිපතිවරයා ලෙස විලියම් ලායි ඊවේ (20) දිවුරුම් දෙනු ලැබුවා.
වෘත්තියෙන් වෛද්‍යවරයෙකු වන ඔහු තායිවානයේ ජනාධිපතිවරයා ලෙස තේරී පත්වුණේ, ඉකුත් ජනවාරි මාසයේ පැවැති ජනාධිපතිවරණයෙන් අතිවිශිෂ්ඨ ජයක් ලැබීමෙන් අනතුරුවයි.
ඒ අනුව අද ජාතිය අමතා සිදු කළ කතාවේදී විලියම් ලායි චීනයට ද දැනුම් දීමක් සිදු කළා.
ඔහු එහි දී චීනයෙන් ඉල්ලා සිටියේ සිය රටට තර්ජනය කිරීම නවතා එහි ප්‍රජාතන්ත්‍රවාදයේ පැවැත්ම පිළිගන්නා ලෙසයි.
ගැටුම වෙනුවට සංවාදයක් ඇති කරන ලෙස ද ඔහු චීනයෙන් ඉල්ලා තිබෙනවා.
තායිවානය තමන්ගේ යැයි කියමින් සිටින චීනයේ තර්ජන හමුවේ තායිවානය කිසි විටෙකත් පසුබට නොවන බව ද ඔහු එහි දී පැවසුවා.
කෙසේවෙතත් නව ජනාධිපතිවරයාගේ පදවි ප්‍රාප්තිය සම්බන්ධයෙන් චීනය ද සිය ප්‍රතිචාරය දක්වා තිබෙනවා.
චීනය පවසන්නේ එය තායිවානයේ ස්වාධීනත්වයේ මාරාන්තික අවසානයක් බවයි.
hirunews
