මාරක අපලවලට මගපාදන කුරුස පාදම

උදාරි ගුරු මවුපිය යුවළකගේ එකම දියණියයි. උසස් පෙළට විෂයන් හැදෑරීමේදී ඇය විදෙස් භාෂාවන් තෝරාගත් නිසා එමඟින් විශ්වවිද්‍යාල අධ්‍යාපනය ලැබීමට ඇයට හැකි විය. එපමණකින් නොනැවතී විදෙස් භාෂා පිළිබඳ වැඩිදුරටත් අධ්‍යාපනය ලැබීමට තරුණ වයසේදීම විදෙස් ගතවූවාය. අනතුරුව උදාරි මෙරටට පැමිණ ගුරුවරියක ලෙස සේවය කරමින් තමන්ගේම කියා අධ්‍යාපන ආයතනයක්ද, ආරම්භ කළාය. දිනෙන් දින ඇයගේ අධ්‍යාපන ආයතනය දියුණුවට පත්වෙමින් තිබිණි. තම රැකියා කටයුතුවල පහසුව උදෙසා තම අධ්‍යාපන ආයතනයට ආසන්න ප්‍රදේශයකින් නවීනතම නිවෙසක් මිලදී ගත්තාය.
ඇයට විදෙස්ගතව සිටින කාලවකවානුවේ අස්ථි ආශ්‍රිතව පැවැති රෝගාබාධ තත්ත්වයක් හෝ ආතරයිටීස් වැනි රෝග තත්ත්වයක් ඇති බව මුල්වරට හඳුනාගෙන තිබිණි. උදාරි පසුව නිවෙස මිලදී ගෙන එහි පදිංචිව වසර 2ක් පමණ ගතවන විට ඇයගේ පෙර පැවැති රෝගී තත්ත්වය උත්සන්න වී ඇයව ඔත්පළ වූවාය. ප්‍රතිකාර සඳහා වරින් වර රෝහල්ගත වීම නිසා සාර්ථකත්වයේ තිබූ අධ්‍යාපන ආයතනයද කඩාවැටිණි.
ඇයට ඉතිරි වූයේ රෝද පුටුවකින් එහා මෙහා යෑම පමණි. වාස්තු පරීක්‍ෂා කිරීමට හේතු වූයේ එයයි. මෙවන් ව්‍යසනයක් ඇති කිරීමට හේතු පාදක වූ වාස්තු දෝෂ සහ ඒවාට යෙදූ පිළියම් මෙසේය.
මංගල බිත්තියට සම්බන්ධ වූ කුරුස පාදම
නිවෙසක මංගල බිත්තිය යනු අත්තිවාරමේ හරි මැදින් යොදනු ලබන ප්‍රධාන බිත්තියයි. අත්තිවාරමක ගොඩනඟන මංගල බිත්තිය දැමීමේදී අත්තිවාරමේ දික් අතට ඉදිරියේ සිට පසුපස දක්වා කෙළින් සැකසීමට වගබලා ගත යුතුය. මංගල බිත්තිය සෑමවිටම නිවෙසක ගෘහ මූලිකයාගේ පිටකොඳු නාරටිය නියෝජනය කරයි. උදාරිගේ නිවෙසේ ඔවුන් නොදැනුවත්වම මංගල බිත්තිය හා සම්බන්ධ වී කුරුස පාදමක් වැටී තිබිණි. එනම් කුරුසයක (+) ආකාරයට අත්තිවාරම් කොටස් සැකසීමයි. කුරුස පාදමක් වැටීම ගෘහමූලිකයාට මාරක ගෙනදෙන ප්‍රබල වාස්තු දෝෂයකි.
මංගල බිත්තිය හා සම්බන්ධ වී කුරුස පාදම වැටී තිබූ බැවින් ඇයගේ රෝගී තත්ත්වය බරපතළ විය. කුරුස පාදම අත්තිවාරමෙන් ගලවා ඉවත් කිරීමට උපදෙස් දුණි.
ප්‍රධාන දොර ඉදිරිපිට වැටුණු වැසිකිළි වළ
මෙම නිවෙසේ වැසිකිළි වළ පිහිටා තිබුණේ ප්‍රධාන දොර ඉදිරිපිටට වැටෙන පරිදිය. නමුත් ගෙවත්ත අලංකාර ලෙස සකස් කොට තිබුණේ වැසිකිළි වළ බාහිර පරිසරයට නොපෙනෙන ලෙසයි.
නිවෙසක ප්‍රධාන දොර ගෘහමූලිකයාගේ හිස නියෝජනය කරයි. විශේෂයෙන් ප්‍රධාන දොර ඉදිරිපිට වැසිකිළි වළක් පිහිටි විට ගෘහමූලිකයාගේ ස්නායු පද්ධතිය, සුෂුම්නාව සහ අස්ථි ආශ්‍රිතව ආබාධ ඇති වී ඔත්පළ වීම් සිදුවෙයි. වැසිකිළි වළ ගලවා සුද්ද කර පස් පිරවිය. එමඟින් එම දෝෂය භංග විය.
ශකට භූමිය
ශකට යනු කරත්තයට කියන තවත් නමකි. කරත්තයක හැඩ ඇති භූමිය ශකට භූමියකි. මෙවැනි ඉඩම්වල වාසය කිරීමෙන් මාරක අපල, රෝගාබාධ, බංකොලොත් බවට පත්වීම, ආර්ථිකය පිරිහීම, රැකියා අහිමිව යෑම, දුක්පීඩාවන්ට මුහුණ දීමට සිදුවෙයි. විසමබාහු භූමියට සමාන පිහිටීමකි. ශකට හැඩය ඉවත් කිරීමට පහසුම විදිය නම් ඉඩමේ එක කොටසක් ඍජු කෝණාශ්‍රාකාර හැඩයක් වනසේ මායිම් ගසා වෙන් කිරීමයි. නැතහොත් ඇද මායිමක් වෙන් කිරීමෙන් දෝෂය ඉවත් කළේය.
මේ වන විට සැත්කමකට මුහුණ දී උදාරි අත්වාරු මාර්ගයෙන් ගමන් කරමින්, දෙපයින් තනිව නැඟිට සිටීමට බලාපොරොත්තුව සිටී. එමෙන්ම ඇයගේ ඉගැන්වීම් කටයුතුද ඇය නැවැත ආරම්භ කොට ඇත. ඇති වූ රෝග සියයට සියයක් සුවපත් භාවයට පැමිණ විය නොහැකි වුවද එය මර්දනය කළ හැකිය.
ජ්‍යොතිෂවේදී අමාලි අගස්පතිරණ