අහස් සිතියමේ සනිටුහන් වී ඇති භ්රමණය වන ග්රහ තාරකාවන්ට හිරුගෙන් කාන්දු වන කිරණ ශක්ති බලවේගය කැටිකොට ගෙන කර්මානුරූපිකව මෙලොව ජනිත වන ජීවියෙකුගේ ජීව දත්ත සමූහ එක්රැස් කර ගන්නා අගනා වේලා පත්කඩය ඔහුගේ, ඇයගේ ජන්මපත්රය හෙවත් කේන්දරය වේ. හිරුගෙන් පිටවන වර්ණ ජාලය මහපොළොව මතට පතිත වීමෙන් ගස් – වැල්, තුරු ලතාවන් පෝෂණය වන අතර, සඳුගෙන් ජලමය පදාර්ථය උකහා ගනී. සියලුම සත්වයන් වැඩි කොටසක්ම ශාක පත්ර මල් හා ගෙඩි ආහාරයට ගන්නා අතර, විශේෂම ජීවියා වන්නේ මනුෂ්යයාය. ඇඹරුම් දත් ඇති මනුෂ්යයා ගෙඩි හා ශාක වර්ගවලින් සිය සිරුර ක්රියාත්මක කරන තැනට පත්වී තිබේ. උල් වූ තියුණු දත් ඇති සතුන් මාංශ භක්ෂණයට හුරු වී ඇත. මුහුදු පත්ලේ වැවී ඇති අපූර්වතම ශාක වර්ග ආහාරයට ගනිමින් මුහුදේ අති විශාල මාළුවන් සංඛ්යාවක්ම සිටින බැව් පැහැදිලිය.
මේ සියලුම ජීවී, අජීවී වස්තුන්ට ක්රියාත්මක වීමට ග්රහයන්ගේ උපකාරක ලැබෙන බැව්ද විද්යාත්මකව සොයාගෙන ඇත. ග්රහයන්ගේ ගමන් ලතාව හා රටාව අනුව මෙලොව ජනිත වූ මනුෂ්යයාට එදිනෙදා ඔවුන්ගේ වැඩකටයුතුවලට අදාළ වන යම් යම් ශක්තීන් ගොඩනැඟී තිබේ.
විශේෂයෙන්ම දරුවකු මව් කුසේ සිටින අතර, කාල පරාසය තුළදි සිරුරේ වැඩීමත් සමගම අත්ලෙහි රේඛා ජාලයක්ද සනිටුහන් වෙයි.
කුඩා දරුවා මෙලොව උපන් මොහොතේ සනිටුහන් කරන කේන්දර සටහනේ දැක්වෙන කොටු දොළොස තුළ අන්තර්ගත වී ඇත්තේ උපතේ සිටම ජීවිතය ගෙවෙන ආකාරයේ තොරතුරු රැසකි. කුඩා අවදිය, අධ්යාපනය, රැකියාව, විවාහය, ලෙඩ රෝග ව්යාධි, ධන සම්පත්, ආදායම හා වියදම් ආදී කරුණු නිරීක්ෂණය කිරීමෙන් කරුණු කාරණා වටහා ගැනීමට පහසු වෙයි.
ආයු වර්ණ, සැප බල පංච මහා සම්පත් හිමි වන්නේ කලාතුරකිනි. පෙර කරන ලද කුසලා කුසල කර්ම විපාකයන්ට අනුගතව මෙලෝ සියලු කරුණු ඉටු වෙයි. ග්රහ හැසිරීම් රටාව තුළින් පැහැදිලි වන්නේ එවැනි කරුණු සිදුවන ආකාරය ඉතාම සියුම් ආකාරයට දැනගැනීමට අවශ්ය ප්රතිපාදන ඒ තුළ ගැබ්වී ඇති අයුරිනි. සමහරු නිසි කලදී විවාහ වෙයි. ඒ සමහර අය අවිවාහකව සිටී. එන මංගල යෝජනාද අසාර්ථක වෙයි. සමහර දෙනෙකු බාල වියේදීම විවාහ වී කෙටි කලකින් දික්කසාදයට පත්වෙයි. තවත් අය කායික හා මානසික ගැටලු මැද ජීවත් වන බවද පෙනේ. හදිසි අනතුරු, විපත්වලට මුහුණ දීමටද සිදුවෙයි. මුලදී අන්ත අසරණත්වයේ සිට මැදි වියේදී ධන සම්පත් ලැබී මහා ධන කුවේරයන් බවටද පත්වන බැව් දැක්විය හැකිය. කෙනෙකු නොසිතන අන්දමට ඔහුගේ හෝ ඇයගේ ජීවිත ගොඩනැඟී තිබේ.
කොතෙක් උත්සාහ කළත් එක තැනම සිටින තැනම සිටින අයද ඇත. නොසිතූ අන්දමට සම්පත් ලැබී වාසනාවන්ත ජීවිත ගෙවන අයද අප අතර වෙයි. මේ සියල්ලටම හේතුව පෙර කරන ලද යම් යම් කර්මයන්හි විපාක අත්විඳීමට සිදුවීමද, නැත්නම් අප විසින් අක්රමවත්ව ජීවන රටාව ගෙන යෑමේ ප්රතිඵලයක්ද යන්නද එක්තරා ගැටලුවකි.
ජ්යොතිෂ විiාත්මකව නිරීක්ෂණය කිරීමේදීද සියල්ල වහවහා වෙනස් වීමට සොබාදහමේ නීතියකි. ග්රහ හැසිරීම් රටාව මත ජීවිතයේ බොහෝ වෙනස්කම්වලට මුහුණ පෑමට සිදුවෙයි. ඒවා වෙනස් කරන්නට අපි සිතන්නේ නම්, එයද එක්තරා ප්රහේලිකාවක් විය හැකිය. අද වැනි දවසක ලොවම වෙළාගත් මේ මහා වසංගතයට මුහුණ දීමට සියලුම ලෝ දෙස්සන්ට සිදුවී ඇත. සමහර විට ඉතාම ප්රබලතම ග්රහ හැසිරීමක් මේ වන විට සිය කේන්දරයේ පිහිටා ඇතත් එය වහා වෙනස් වන තැනට ක්ෂණිකවම පත්වී ඇති බැව් පැහැදිලි කරුණකි. වෙදකම ගුප්ත විiාත්මකව එන යන්ත්ර – මන්ත්ර, ගුරුකම්, ශාන්තිකර්ම අද පූජාවන් පිළිවෙත් හා සෙත්කවි කියැවීම කෙම් ක්රම වැනි ශාස්ත්රීය ක්රමවේදයන් හරහා කායික හා මානසික සුවයක් සෑම විටම අපේක්ෂා කිරීම මිනිස් ගතියකි. වැස්ස නැවැත්වීමට අපහසු නිසා කුඩයක් ඉහලාගෙන යෑමක් වැනි ප්රතිකර්ම තුළින් මානසික සහනයක් ලැබේ. ජීවිතයේ සිදුවන සියලුම දේවලට කිසියම් වස්තු බීජයක් ගැබ් වී තිබේ. අපි ඒවා තෙවැනි ඇසින් නිරීක්ෂණය කර කළයුතු පිළියම් ඉතාමත්ම නිවැරැදිව අකුරටම කළ යුතු වෙයි. උඩින් පැලැස්තර දමනවාට වඩා මුලිනුපුටා දැමීමෙන් සාර්ථක ප්රතිඵල ලබා ගැනීමට හැකිවනු ඇත.
මේ ලිපිය කියවන ඔබේ කිසියම් මානසික ගැටලු ප්රශ්නවලින් තෙරපී ඇත්නම් ඒ ගැන ඇතුළතින් මනාව තෙවැනි ඇසින් විපරම් කර තීරණයකට බැසීම නුවණට හුරු වෙයි. අපට අවශ්ය වන්නේ මනස මෙහෙයවා විශ්වශක්තිය සමග මනෝමය ගනුදෙනුවක් කිරීමය.
ක්රමවත්ව තෙවැනි ඇසින් මනසින් නිසි කළමනාකාරීත්වයකින් යුතුව අප ක්රියා කරන්නේ නම් ජීවිතය ජයගත හැකිය. එයට අපි මග පාදාගන්නට යත්න දරමු. අපට ඒක කළ හැකි වෙයි. අවශ්ය වන්නේ නියම මගට පිවිසීමයි. ජීවිතය පරාද නොවී ජයගනිමු. ශනි – රාහු සහ කුජගේ, අඟහරුගේ දෝෂයන්ට බිය වී ජීවිතයම කලකිරි ක්රියා කරන්නට යෑමෙන් වන්නේ තව තවත් ප්රපාතයට ජීවිතය අඩාළ කර ගැනීමකි.
ප්රවීණ ජ්යොතිෂවේදී දේශබන්දු ටී. හෙන්රි බෙම්මුල්ල