නවලෝක රෝහල් සමූහය ශ්‍රී ලංකා නීතිඥ සංගමය සමගින් සහයෝගීතාවකට

ශ්‍රී ලංකා පුද්ගලික රෝහල් ක්ෂේත්‍රයේ පුරෝගාමී නාමය වන නවලෝක රෝහල් සමූහය ශ්‍රී ලංකා නීතිඥ සංගමය සමගින් පසුගියදා ගිවිසුමකට එළැඹෙමින් එම සංගමයේ සාමාජික නීති වෘත්තිකයින් සඳහා නවලෝක රෝහල් සමූහය මගින් පිරිනමනු ලබන ජාත්‍යන්තර මට්ටමේ රෝහල් සේවා සඳහා ප්‍රවේශ වීමේ අවස්ථාව ලබාදෙන ලදී.

ජූලි 26 වැනි දින ශ්‍රී ලංකා නීතිඥ සංගම් පරිශ්‍රයේදී නවලෝක රෝහල් සමූහය සහ ශ්‍රී ලංකා නීතිඥ සංගමය විසින් මෙම ගිවිසුමට එළැඹිණි. කෝවිඩ් වෛරසය පැතිරීම පාලනය කිරීම සඳහා සෞඛ්‍ය අමාත්‍යංශය නිර්දේශ කර ඇති සෞඛ්‍ය මාර්ගෝපදේශ සහ සමාජ දුරස්ථභාවය පවත්වා ගනිමින් මෙම අවස්ථාව සංවිධානය කෙරිණි. මෙම සහයෝගීතාව යටතේ ශ්‍රී ලංකා නීතිඥ සංගම් සාමාජිකයන් වෙත විශේෂිත ප්ලැටිනම් සාමාජික කාඩ්පතක් හිමි වන අතර මෙම කාඩ්පත භාවිත කරමින් එම සාමාජිකයන්ට නවලෝක රෝහල මගින් ලබාදෙන වෛද්‍ය සහ රෝහල් සේවා වෙත ප්‍රවේශය වීමට හැකියාව ලැබේ. මෙම පහසුකම් අතර ශල්‍යකර්ම සඳහා වට්ටම් හිමිවීම, රෝහල් කාමර වෙන් කරවා ගැනීම, බාහිර රෝගී චැනලින් සේවා, වෛද්‍ය රසායනාගාර සේවා, දන්ත වෛද්‍ය සේවා, රෝහල් මගින් පවත්වාගෙන යනු ලබන කෝවිඩ් අතරමැදි ප්‍රතිකාර මධ්‍යස්ථාන වෙත ප්‍රවේශ වීමේ පහසුව, සුවතා පරීක්ෂණ පැකේජ, මෙන්ම නවලෝක විශේෂඥ රෝහල් සේවා මධ්‍යස්ථානය මගින් ලබා දෙන සේවා සහ ගිලන් රථ සේවාවන් ද වේ.