යෝග අතරින් ජන්ම පත්රයක ඉතා කලාතුරකින් යෙදෙන සිංහාසන යෝගයට හිමිවන්නේ සුවිශේෂ ස්ථානයකි. සිංහාසන යෝගය නිර්මලව පිහිටි කල නිසැකවම ඉහළ ප්රතිඵල දෙනවා සේම යම් දුර්වලතාවකින් පිහිටියද යම් පමණ හෝ ප්රතිඵල අනිවාර්යයෙන්ම ගෙනදෙන බැවිනි.
දුර ඈත අතීතයේ නම් සිංහාසන යෝගය පිහිටි කල එම ජන්මීන්ට හිමිවූයේ රටේ රජකමය. එහෙත් වර්තමානයට එකී තත්ත්වය යාවත්කාලීන කර ගළපාගැනීමේදී සිංහාසන යෝගයෙන් උපත ලද්දෝ කොතරම් දිළිඳු අසරණ පවුල් පසුබිමක ජනිත වුවද ඉදිරි අනාගතයේ එකී ජන්මියා සමාජයේ කවර හෝ ඉහළ නිලයක, තානාන්තරයක වැජඹීම නම් ස්ථිරය. සිංහාසන යෝගයෙන් මෙලොව ජනිත වීම ඉතා අපහසු සේම එසේ උපන්නවුන් අනුන් යටතේ සේවය කිරීමට බොහෝ විට අකැමැතිය. ඒ, ඔවුන් නායකත්වය, මූලිකත්වය, ප්රමුඛත්වය අපේක්ෂා කරන බැවිනි. මෙම යෝගය හිමිවූවන්ට උක්ත තත්ත්ව හිමිවනුයේ නිරායාසයෙනි. මෙවැන්නන් ස්ත්රී වේවා පුරුෂ වේවා බොහෝ විට සමාජයේ කැපීපෙනෙන ව්යාපාරිකයන්ය. සාමාන්යයෙන් සිංහාසන යෝගයෙන් උපන් ජන්මීන්ගේ ජීවිතය තරුණ විය දක්වා රක්ෂා කරගැනීම තරමක් අපහසුය. එනමුත් යම් ලෙසකින් මෙම යෝග හිමියෝ තරුණ වියට පාතැබුවහොත් යෝගයේ බල දුබලතාව මත ප්රතිඵල ලැබෙනු ස්ථිරය. විශේෂයෙන් යෝගයට දායක බලවත් ග්රහයකුගේ හෝ ඡායා ග්රහයකුගේ මහ දශා අතුරු දශා ලැබීමේදී හා ඒ සමග යෝගයට අදාළ ග්රහයන් ශුභ ගෝචරයක යෙදීමෙන් උසස් ප්රතිඵල හිමිවේ.
සිංහාසන යෝගය ජන්ම පත්රයක 2,6,8,12 යන දුෂ්ට ස්ථාන හෙවත් ත්රික ස්ථානවල ග්රහයන්ද, ඡායා ග්රහයන්ද තැන්පත් වීමෙන් නිර්මාණය වේ. මෙහිදී අවම වශයෙන් එක් ස්ථානයක ග්රහයකු හෝ ඡායා ග්රහයකු සිටිය යුතුය. සාමාන්යයෙන් කේන්දරයක දෙවැන්න ද්විතීක මාරක ස්ථානය ලෙසද, හයවැන්න රෝග ස්ථානය ලෙසද, අටවැන්න මරණ හෙවත් ආයුෂ ස්ථානය ලෙසද, දොළොස්වැන්න වැය ස්ථානය ලෙසද හැඳින්වේ. පොදුවේ ගත් කල උක්ත 2,6,8,12 යන සිවු ස්ථානයම අශුභ ස්ථානයන්ය.
සිංහාසන යෝග හිමියන් කරා ධනය, බලය, කීර්තිය, ගෞරවය යනාදිය ගලා එන්නේ නිරායාසයෙනි. විශේෂයෙන් ත්රික ස්ථානවල සියලුම ග්රහයන් ඒකරාශී වීමත්, එසේ නොමැති කල එම ස්ථානවල පාපීන්ම සිවුදෙනෙක් ස්ථානගත වීමත් තුළින් යෙදෙන සිංහාසන යෝගය ඉතා ප්රබලය. මොවුන් තම ආත්මගරුත්වය උපරිමයෙන් රැකගන්නා, ආත්ම අභිමානයෙන් යුතු පුද්ගලයන්ය. යම් ලෙසකින් සිංහාසන යෝගය ලග්නයේ තැන්පත් වූ චන්ද්රයා කෙරෙන් යෙදෙන විට වඩාත් බලවත්ය. කරුණු කාරණා එසේ නමුත් ඇතැම් ජ්යොතිෂ පොතපතට අනුව රාහු හා කේතු යන ඡායා ග්රහයන් මෙකී යෝගයට දායක නොවන බවද සඳහන් වේ. කෙසේ නමුත් සිංහාසන යෝගයේ බලය යම් යම් හේතු මත අඩුවන කල යෙදෙනුයේ අර්ධ සිංහාසන යෝගය වේ. අර්ධ සිංහාසන යෝගය බොහෝ විට යෙදෙනුයේ ග්රහ දෘෂ්ටිවලිනි. එවැනි අර්ධ සිංහාසන යෝග උසස්ම ප්රතිඵල නොව මධ්යම ප්රතිඵල ගෙනදේ.
සාමාන්යයෙන් ජන්ම පත්රයක පාපී ග්රහයන් ලෙස හඳුන්වනුයේ කුජ, ශනි, අවසඳු හා රවි යන ග්රහයන්ය. මේ හැර රාහු හා කේතු යන ඡායා ග්රහයන්ද පාපීන්ම සේ සැලකේ. තවද මෙකී පාපීන්ට පරිබාහිර ඒ ඒ ලග්නයට පාපීන් වන ග්රහයන්ද ජ්යොතිෂයේ සඳහන්ය. එසේම ජන්ම පත්රයක දුෂ්ට ස්ථාන අධිපතීන්ද 3,7,11 අධිපතීන්ද පාපීන්ම සේ සැලකේ. යම් ජන්ම පත්රයක සිංහාසන යෝග පිහිටීම දුටු කල එම යෝගය තුළ තැන්පත් ග්රහයන්ගේ රාශිගත බලය සේම භාවගත බලය මැනැවින් තුලනාත්මකව තක්සේරු කර පලාපල පැවැසිය යුතුය. එසේම එම ග්රහයන් තැන්පත් නැකැතද අදාළ භාවාධිපතියාට ඇති සතුරු මිතුරුකමද සැලකීමට බඳුන් කළ යුතුය. මීට අතිරේක යෝගයට දායක ග්රහයන් අස්ථද ග්රහ යුද්ධ ආදියෙන් පරාජිතද ශුභ අශුභ ග්රහ දෘෂ්ටි ලබයිද, භාව සන්ධිගතද, නොඑසේ නම් භාව ආරෝහණ හෝ අවරෝහණද, භාව මධ්යස්ඵුට ආසන්නයේද යන මග විමසා බැලිය යුතුය. තවද ලග්න කේන්දරයේ පමණක් නොව නවාංශක කේන්දරයේද යෝගයට අදාළ ග්රහයන් බලවත් නම් නිසැකවම සිංහාසන යෝගයේ ප්රතිඵල ජන්මියාට ලබාදේ. එනමුත් යම් ලෙසකින් මෙකී යෝගය ඉතා දුබලව දුර්වලව පිහිටි කල යෝගය යම් පමණ පලදීම සැක සහිත බව කිව යුතුය. ඔබට මේ ලිපිය අධ්යයනය තුළින් ඔබේ ජන්ම පත්රයේ සිංහාසන යෝගය පිහිටා ඇද්ද, එය පලදෙන මට්ටමක පවතීද යන්න අවබෝධ කරගත හැකිය.
ජ්යොතිෂවේදී දේශබන්දු ආචාර්ය මහේන්ද්ර පල්ලෙබැද්ද