ජීවිතයට සෞභාග්ය උදාකරමින් සියලු වස්දොස් දුරු කරමින් සශ්රීකත්වය වර්ධනය කෙරෙන උතුම් වූ කිරි අම්මාවරුන්ගේ දානය පත්තිනි මෑණියන් උදෙසා පහත ආකාරයට පැවැත්වීමෙන් ඔබත් මාහැඟි අනිශංස ලබාගන්න. පුරාණයේ සිට අප හෙළ සංස්කෘතියේ සුවිශේෂ සලකුණක් ලෙසින් හැඳින්වෙන පත්තිනි දේවිය මුල්කරගනිමින් සිංහල බෞද්ධ නිවෙස්වල පැවැත්වෙන පිරිසිදු හා උතුම්ම පූජා විදියක් ලෙස කිරි අම්මාවරුන්ගේ දානය හඳුන්වනු ලබනවා. එම දානයේ ආනිශංස අතිමහත්ය.
මේ තුළින් අප සංස්කෘතියේ අභිමානය කියාපානු ලබනවා. විවිධ වූ අපල උපද්රවයන්, ලෙඩ රෝග, ව්යාධි, කරදර බාධා, රැකී රක්ෂා හා විවාහ බාධා, දරුපල ගැටලු මෙන්ම ජීවිතයේ අනේකවිධ වූ ගැටලු දුරුකර ගනු වස් බොහෝ සිංහල බෞද්ධ ජනතාව පත්තිනි දේවියට බාරහාර වීමෙන් අනතුරුව අදාළ කාලසීමාව තුළ එම පොරොන්දුව ඉටුකිරීම පිණිස පැවැත්වෙන ඉතා විශේෂ මෙන්ම අනභිභවනීය පූජා ක්රමයක් ලෙස කිරිඅම්මාවරුන්ගේ දානය හඳුන්වා දිය හැකිය. මෙම සත් කටයුත්ත නියමාකාරයෙන් පැවැත්වීමෙන් තම තමන් බලාපොරොත්තු වන්නා වූ ප්රතිඵල සර්වප්රකාරයෙන්ම සාර්ථක කරගැනීමේ හැකියාව පවතී.
කිරි අම්මාවරුන්ගේ දානයේදී එම උතුම් වූ පූජාව සඳහා කිරි අම්මාවරුන් තෝරාගැනීමේදී කරුණු රාශියක් කෙරෙහි අවධානය යොමු කළ යුතුය. ඒ සඳහා තෝරාගන්නා කාන්තාවන්,
• පතිදම් රකින සිල්වත් අය විය යුතුය.
• දිළිඳු බවින් යුතු බිලිඳුන් සිටින අය විය යුතුය.
• කුලහීන නොවන අය විය යුතුය.
• කණවැන්දුම් නොවූ, ආගම දහම කෙරෙහි භක්තිමත් අය විය යුතුය.
ඉහත දැක්වූ කාරණා සම්පූර්ණ වූ මව්කිරි බොන බිලිඳුන් සිටින කාන්තාවන් වැඩි දෙනකු සහිතව කණවැන්දුම් ස්ත්රීන් තෝරා නොගෙන (වයස අවුරුදු 50ට වැඩි කාන්තාවන්ගේ කණවැන්දුම් භාවය පිළිබඳ ගැටලු මතු නොවේ.) මෙම කණ්ඩායම කාන්තාවන් 7 දෙනකු වන සේ නිසි පරිදි තෝරාගැනීම තුළින් මෙම උතුම් ශාන්තිකර්මය සිදුකිරීමෙන් බලාපොරොත්තු වන යහපත අපට සර්වප්රකාරයෙන්ම ඉටුකර ගැනීමේ හැකියාව පවතී.
කිරි අම්මාවරුන්ගේ දානය සඳහා ආරාධනා කිරීමේදී පහත සඳහන් කාන්තාවන් තෝරා නොගත යුතුය.
• අනුන්ගේ ඕපාදූප සොයමින් කේලාම් කියමින් උනුන් කොටවමින් නිතර රණ්ඩු කරන සැර පරුෂ හික්මීමක් නොමැති අසංවර ස්ත්රීන්
• දරුවන් නොලැබූ වඳ ස්ත්රීන්
• මස් මාළු විකුණන හා ඒවා අනුභව කරන ස්ත්රීන්
• අභිසාරිකාවන් හා මත්පැන් පානය කරන ස්ත්රීන්
• සැමියා අකාලයේ මියගිය වැන්දඹු කාන්තාවන්
• ලැබූ දරුවන් සියලු දෙනා මියගිය කාන්තාවන්
• ඉතා මහලු හා දුර්වල, අසනීප සහිත හැරමිටි වාරුවෙන් ගමන් කරන අය
• සුවකළ නොහැකි කුෂ්ට රෝගයන්ගෙන් පෙළෙන අය
• අන්ධ හා බිහිරි අය
• උපතින් හෝ පසුව අත් පා බිඳීම් ආදියෙන් අංගවිකල වූ අය
• අංශභාග හෝ අපස්මාර රෝගී වූවන්
පත්තිනි දේවිය දොළොස් වාරයක් හා සත් වාරයක් මොලොව පහළ වී ඇති බව ජනප්රවාදයේ සඳහන්ය. ඒ අනුව සත් වාරයක් මොළොව පහළ වූ ආකාරයට අනුව සිද්ධපත්තිනි, සළඹපත්තිනි, අඹපත්තිනි, මල් පත්තිනි, ගිනිපත්තිනි, දේවපත්තිනි, සත් පත්තිනි, යන පත්තිනි මාතාවන්ගේ නම් හත වෙනුවට අම්මාවරු 7 දෙනකු මෙම දානය සඳහා සහභාගි කරගනී. කිරිබත්, කැවුම්, කිරියා හා කෙසෙල් ගෙඩි ඇතුළු තවත් රස කැවිලි වර්ග ප්රධාන කොට ගනිමින් සෙනසුරාදා හෝ බදාදා යන දින මූලික කොට ගනිමින් ඔබත් වසරකට වරක්වත් තම නිවෙසේදී හිමිදිරි උදෑසන මෙම දානය පැවැත්වීම තුළින් මහඟු ප්රතිඵල උදාකර ගන්න.
ජ්යොතිෂ හා වාස්තුවේදී සම්පත් එස්. කල්පගේ