සිනමාවේ තාරකාවක් වුණු ඇය හිටි ගමන් සැඟවී ගිහින්. ඇයගේ රැඟුමන් නරඹන්න ප්රේක්ෂකයින්ගෙ සිනමා ශාලා පිරී ඉතිරී ගිය කාලයක් තිබුණා. බොහෝ ඓතිහාසික කතා වස්තූන්වලට කතා නායිකාව වූ ඇය කුවේණි, ඇහෙළෙපොළ කුමාරිහාමි, පටාචාරා වගේ චරිත විශිෂ්ට ලෙස ජීවමාන කළා. ඇය තමයි දුලානි අනුරාධා.
කාලයක් දුලානිගේ හිතේ තිබුණු සිහිනයක් සැබෑවුණා නේද?
ඇත්තටම ඔව්. කාලයක් තිස්සේ මගේ හිතේ තිබුණා යුරෝපා රටක සංචාරය කරන්න. මෙයට කලිනුත් මට ඒ අවස්ථාව ලැබුණා. ඒත් නිර්මාණ වැඩකටයුතු නිසා මට යන්න බැරිවුණා. ඉතින් මේ පාර සැලැසුම් කරලම මම පාසල් නිවාඩුවට මාසයක් විතර විදේශගත වෙලා සංචාරය කළා.
කොහොමද ගිය ගමන සුන්දරද?
සුන්දරදත් අහනවා. චිත්රයක් බලනවා හා සමානයි. ප්රංශය, ඉතාලිය වගේ රටවල්වල මිනිසුන් ජීවත් වෙන රටාව හාත්පසින්ම වෙනස්. ඒ විතරක් නෙමේ ආර්ථික පැත්තෙනුත් දියුණුවෙලා. ගිය ගමන ගැන වචනවලින් කියන්න බැහැ. ගොඩාක් අත්දැකීම් ලැබුවා මම.
දැන් දුලානි නිර්මාණවල දකින්න නැත්තේ කලාවෙන් සමුගෙනද කියලා වෙලාවකට අපට හිතෙනවා?
අනේ නැහැ. මම කලාවෙන් දුරස් වෙලා නැහැ. මම කරපු චිත්රපට තුනක් විතර තිරගත වීමට නියමිතයි. ‘කිඞ්නැප්’, ‘සිහින’, ‘හොරා අංකල්’. මේ චිත්රපටවල මගේ රංග කුසලතා දැකබලා ගන්න පුළුවන්. රටේ තිබුණ වාතාවරණය නිසා චිත්රපට සියල්ලම තිරගත වීමට ප්රමාද වෙන්න ඇති කියලා මම හිතනවා.
කකුලෙ ආබාධය නිසා නිර්මාණ ගිලිහිලා යන්න ඇති සමහර විට?
ඇත්තටම කකුල අසනීප වුණු නිසා කාලයක් මම විවේකීව සිටියා නිර්මාණවලට සම්බන්ධ නොවී. මොකද ෂූටින් කරන්න ගියාම ලොකු මහන්සියක් වෙනවා. මට නිර්මාණ කිහිපයකින් ආරාධනා කළා. මම මොනවත් භාරගත්තෙ නැහැ. පාසලේ වැඩ කරලා ගෙදර එන්න තමයි මම බලන්නේ. දුර බැහැර රූපගත කිරීම්වලට යෑමත් මට ප්රශ්නයක් වුණා.
දුලානිගේ සමකාලීන මිතුරියන් විවාහ වෙනවා. තාම දුලානි ඒ ගැන හිතුවේ නැද්ද?
කාලයත් එක්ක හැමදේම සිදුවෙයි. මම හිතනවා ඒ කටයුතු ඉක්මනින්ම සද්දබද්ද නැතුව චාම්ව සිදුවෙයි කියලා.
හැබැයි දුලානි නටපු නැටිල්ලට තවම ප්රසංගයක් කරන්න බැරිවුණා. ඒක ගැන පසුතැවෙනවා ඇති?
මගේ තිබුණ එක සිහිනයක් තමයි මේක. ඒත් තවත් මට ඒ දේ කරගන්න බැරිවුණු එක ගැන මම දුක්වෙනවා. හැබැයි මගේ හිතවතුන් කියන්නේ තව ඔයා පරක්කු වැඩි නැහැ කියලා. ඒත් මගේ හිතින් ඒ අදහස ගිලිහී ගිහින් ඉවරයි. බලමු ඉතින් නුදුරු දිනයකදී.
වසන්ත විතාරණගේ
