ග්රහ මණ්ඩලය කිසි දිනක එකම ආකාරයකට පිහිටා තිබෙන්නේ නැත. එය විවිධාකාර වෙනස්කම්වලට යොමුවෙමින් නිතරම සිය පිහිටීම වෙනස් කරයි. එය ස්වභාවය වුවද එමඟින් මිහිපිට වෙසෙන ජීවීන්ට කෙරෙන බලපෑම සුළුපටු නොවේ. එහිදී මිනිසාට බලපාන සහ මුහුණදීමට සිදුවන සියල්ල උත්පත්ති කේන්දරයේ නිසියාකාරයෙන් සටහන් වෙන අතර, එය එම ජන්මියා පෙර ආත්මයන්ගේ කළ පින්, පව් අනුව සිදුවන බවද පැවසේ.
කෙසේ නමුත් ඉහත සඳහන් කළ ග්රහ බලපෑම් සහ ග්රහ දොස්වලට අමතරව මිනිසාට තමන් ජීවත් වෙන නිවසේ පිහිටීම අනුව යෙදෙන ග්රහ දෝෂවලට මුහුණදීමට සිදුවන්නේය. මෙය බොහෝදුරට දුරදිග නොබලා නොසිතා කරනු ලබන ඉදිකිරීම්වලින් ඇතිවන අයහපත් තත්ත්වයකි. එහිදී දොර ජනෙල්වල පිහිටීම, කාමර බිත්ති, වහල මෙන්ම නිවසින් පිටත ඇති වැසිකිළි, ළිං ආදියත් මාර්ග පිහිටීම්, මුළුතැන්ගේ පිහිටීම් ආදිය හේතුවෙන්ද වාස්තු දෝෂ ඇතිවෙයි. මෙම දෝෂවලින් සිදුවන බලපෑම සුළුපටු නොවේ. එය විවිධාකාරයෙන් මිනිසාට බලපායි.
මෙහිදී දෝෂවලට ලක්වීමෙන් පීඩාවට පත්වන්නන් ඉතා කල්පනාකාරීව කටයුතු කර තම තමන්ගේ දෝෂ දුරු කර ගැනීමට කටයුතු කළ යුතුය. එසේ නැතහොත් තත්ත්වය දරුණු අතට හැරී අනිසි ප්රතිඵලවලට ලක්වන්නට සිදුවන්නේද ඒ අයටමය. එනිසාම වාස්තු දෝෂවලට මුහුණපා සිටින අයට ඊට කළ හැකි පිළියම් ගැන දැනීමක් ඇත්නම් එය වැදගත් වෙයි. එසේම හැකි ඉක්මනින් වාස්තු ශිල්පය මැනවින් දන්නා, වාස්තු ශිල්පියකු ලවා සිය නිවස පරීක්ෂා කරවාගෙන දෝෂ ඇති තැන් හඳුනාගෙන ඊට යෙදිය යුතු හොඳම පිළියම් යොදන්නට හැකිනම් වඩාත් සුබදායකය. එයින් තම මුදලත්, කාලයත් ඉතිරි වෙනවා පමණක් නොව සෞඛ්ය තත්ත්වයද ආරක්ෂා වනු ඇත.
යම් ලෙසකට ඔබ පදිංචි නිවසට කොඩිවින, අණවින, හදිහූනියම් වැනි බලපෑමක් ඇතැයි සිතේනම් ඒ සම්බන්ධව හොඳ දැනීමක් සහ අවබෝධයක් ඇති ගුප්ත වෛද්ය හෝ ඇදුරකු කැඳවා අපල දෝෂ ඉවත් කරගත යුතුය. එසේම ග්රහ දොස් ඇතැයි සිතේ නම් නොපමාව ප්රවීණ ජ්යොතිෂයකු හමුවී කේන්දර පරීක්ෂා කරවාගෙන ඔබට ඇති දෝෂ සහ අපල හඳුනාගෙන ඊට සුදුසු පිළියම් සිදුකර ගැනීමත්, බෝධිපූජා, දේව පූජා ආදියෙන් සෙත සලසා ගැනීමත් සුබ වනු ඇත.
කෙසේ නමුත් අපල ඇති සැමදෙනා පන්සිල්පද ආරක්ෂා කරමින් දහමෙහි හැසිරීම වටිනා කටයුත්තකි. එමගින් අපලවල යම් අඩුවක් හෝ සහනයක් ලැබෙන්නට හැකි අතර, ඉහත සඳහන් සියලු ආකාරයේ අපල ඇති අයට පොදුවේ කළ හැකි විශේෂ පහන් පූජාවක් මේ සමඟ ඉදිරිපත් කරන අතර මෙමඟින් තම තමන්ගේ අපල තත්ත්වයන් දුරුකර ගැනීමට සහනයක් ලැබෙනු නිසැකය.
ඉතා පිරිසුදු පොල්තෙල් බෝතලයක් ගෙදරම සිඳගෙන එය ඉතිපිසෝ ගාථාවෙන් 1008 වරක් පිරිත් කරගෙන ආරක්ෂා සහිතව වෙන්කර තබා පසුව දිනපතා ඉතා හොඳින් පිරිසිදු වී තෙල්, මල්, පහන් පුදා තිසරණ සහිත පංච ශීලය සමාදන් වී ත්රිවිධ රත්නය වැඳපුදා සෙත් පිරිත් ගායනයෙන් පසු දෙවියන්ට පින්දී, අමතර පහනක් රැගෙන එය පිරිත් කළ පොල් තෙල්වලින් දල්වාගෙන එහි දැල්ල දෙස බලා තමන්ට ඇති අපල උපද්රව සිහියට නඟගෙන උතුම් වූ බුද්ධ බලයෙන් සියලු අපල දුරුවේවායි සිතා පිරිසුදු සිතින් ප්රාර්ථනා කරන්න. මෙය දිනපතා උදේ හෝ සවස සිදුකරන්න. කෙටි කලක් තුළදී ඔබට යම් සහනයක් ලැබෙනු ඇත. එසේම ඔබටත් ඔබගේ පවුලේ අයටත් තිබූ අසනීප රෝග පීඩා දුරුවී සැනසීම ළඟාවනු ඇත. මේ ආකාරයෙන් නිතිපතා පූජාව කළ හැකි නම් එය සියලු දෙනාටම යහපත් ප්රතිඵල අත්කර දෙනු නිසැකය.
පහන දල්වා ගායනා කළ යුතු ගාථා
සබ්බේ සත්තා සුඛප්පත්තා
අවේරාච අනාමයා
දීඝායුකෝ අඤ්ඤ මඤ්ඤං
පිය පප්පොත්තු නිබ්බුතිං
සබ්බ පාපස්ස අකරණං
කුසලස්ස උප සම්පදා
සචිත්ත පරියෝ දපනං
ඒතානු බුද්ධානු සාසනං
සබ්බේ බුද්ධා බලප් පත්තා
පච්චේ කානඤ්ච යං බලං
අරහං තානඤ්ච තේජේන
චිත්තං පාජේති මුඤ්චතී
