කාරණාව ගැළපෙන හෝරාව තෝරාගමු

සුබ කටයුත්ත එහෙමත් නැත්නම් අලුත් වැඩක්, අලුත් ව්‍යාපාරයක් ආරම්භ කිරීමේදී ඊට සුදුසු වෙලාවක්, නැකැතක් සකසා ගැනීම අදක ඊයෙක සිදුවන්නක් නොවේ. එය බොහෝ කාලයක සිට එනම් ඈත අතීතයේ සිටම සිදුවෙන්නක්. එහිදී එම කාර්යයේ හැටියට ඊට ගැළපෙන හෝරාවක් තෝරාගත යුතුය. එසේ කිරීමෙන් ලැබෙන ප්‍රතිඵලය වඩාත් හොඳ වන බව ජ්‍යොතිෂයේ සඳහන් වෙයි. ඒ අනුව විවිධ කාරණාවන්ට සුදුසු කුමන හෝරාවක්ද යන්න සලකා බලමු.

කැති, උත්‍රසල, උත්‍රපල් යන නැකැත් ත්‍රිත්වය රවි ග්‍රහයාට අයත්ය. මේෂ සහ සිංහ රාශිගත වූ රවි සමඟ කැති, උත්‍රපල, උත්‍රපල් නැකැතේ යෙදුණු විට රවි හෝරාවෙන් සිදුකරන කාර්යයන් වඩා සුබඵල ගෙනෙන බව සත්‍යයකි. පීතෘ කාරක ග්‍රහයා මෙන්ම රාජ්‍යකාරක ග්‍රහයාද වූ රවි ග්‍රහයාගේ හෝරාවක් තුළ පියා සම්බන්ධ කටයුතු මෙන්ම, රාජ්‍ය නිලධාරීන් හමුවීමට යෑම, රාජ්‍ය ආයතන ඔස්සේ සිදුකරගත යුතු කාර්යයන් යුහුසුළුව ඉටුකරගත හැකි වීම විශේෂය. එමෙන්ම ගිවිසුම් අස්සන් කිරීමට, අන්තිම කැමැති පත්‍ර ලිවීමටද, නැතිවූ දෙයක් පිළිබඳ රාජ්‍ය අංශවල සහාය පැතීමද, මන්ත්‍ර-ශාස්ත්‍ර කටයුතු ආරම්භයද, රෝගවලට බෙහෙත් ලබා ගැනීමද, උසස්වීම් ලබා ගැනීමද, දෙවියන් සමඟ කරනු ලබන වැඩවලටද, දේශපාලන කටයුතුවලටද යහපත් වෙයි.
සඳු හෝරාව

රෙහෙණ, හත, සුවණ යන නැකැත් ත්‍රිත්වය පිළිබඳ අධිපතිත්වය දරන්නේ මාතෘ කාරක හා මවුකාරක වශයනේ පෙනී සිටිනා ග්‍රහලොව දෙවැනි ආලෝක ග්‍රහයා වන සඳු ග්‍රහයාය. කටක රාශියටද, වෘෂභ රාශියටද සඳු බලවත් වෙයි. එම රාශි දෙකෙන් එකක් සුබ වෙලාවට අදාළව තත්කාල රාශිය කරගනිමින් ඉහත සඳහන් නැකැතක් ඇති දිනයක (සඳුදා දිනය නම් ඉතා යහපත්ය.) සඳු හෝරාව තුළ වනිතා කටයුතු පිළිබඳව ගැටලු නිරාකරණය කර ගැනීමටද, විදේශ සංචාරවලටද, ළිං කැපීම් ඇළ-දොළ ප්‍රතිසංස්කරණ කටයුතු කිරීම්ද, දරුවන්ගේ කටයුතු පිළිබඳව අවධානය යොමු කිරීමද, හෙදියන් ලෙස වැඩ භාර ගැනීමටද, ගීත ප්‍රබන්ධය හා ගී තනු නිර්මාණයන්ද සිදුකළ හැකිය. එමෙන්ම සාගර ගවේෂණයටද, අලුත් වස්ත්‍ර ඇඳීමටද, වගුරු බිම් මිලදී ගැනීමටද සඳු හෝරාව ඉතා වැදගත්ය. සඳු සියලුම සුබ කාර්යයන්ට යහපත්ය.
කුජ හෝරාව
මුවසිරස, සිත, දෙනට යන නැකැත් ත්‍රිත්වය තුළ කුජ ග්‍රහයා ගමන් කරන විට කුජ අධිපතිත්වය දරන මේෂ, වෘශ්චික හා මකර යන ලග්නයක් උදාවෙත්ම කුජ හෝරාව ඉතා ප්‍රබලය. කුජ යනු සෙන්පතියාය. සටනට අධිපතියා කුජ දිනයක කුජ හෝරාව තුළ සටනක් ඇරැඹීම එම සටනින් ජය අත්පත්කර දෙන්නා වූ මූලිකම පියවරය. සතුරන් පරාජය කිරීමට, හේන් ගිනි තැබීමට, ගඩොල් පෝරණුවලට ගිනි දැල්වීමට පොලිසි සහ හමුදා ආශ්‍රිත කටයුතුවලටද වගාවන්ට පොහොර යෙදීමටද, මුද්‍රණ කටයුතුවලටද, කුජ හෝරාව බලවත් වෙයි. තරග විභාග කටයුතුවලටද, කුජ හෝරාව අනගි රුකුලක් ලබාදෙනු ඇත. මේ අනුව සහෝදර කාරක ග්‍රහයා වූ කුජ ග්‍රහයාගේ හෝරාවන් තුළ ඉහත සඳහන් කාර්යයන්හි යෙදීම ඉතාම සුබදායක වෙයි.
බුධ හෝරාව
දෙට, අස්ලිය, රේවතී යන නැකැතක් උදාව පවතින බුධ දිනයක බුධ හෝරාව ඇති ප්‍රබලය. එමෙන්ම මිථුන හා කන්‍යා රාශියක බුධ සමඟ මෙවැනි නැකැතක් යෙදේ නම් එය ඉතා ප්‍රශස්ත වෙයි. නුවණ වඩවන සියලුම කටයුතු සඳහා බුධ හෝරාව ඉතා ප්‍රශස්ත බව පුරාණ ඍෂි මතය වෙයි. බුද්ධියට අධිපතිත්වය දරන බුධ ග්‍රහයාගේ බුධ හෝරාවෙන් විශේෂයෙන්ම අකුරුකරණයට බලවත් තැනක් පිළියෙල කරගත හැකිය. එමෙන්ම පාසල්වලට ළමයින් ඇතුළත් කිරීමටද, නීතිය හැදෑරීමටද, ඕනෑම විෂය කටයුත්තක මූලික පියවර තැබීමටද, ග්‍රන්ථකරණයටද, ලිපි ලේඛන සකස් කිරීමටද, පළමු කොට පොත්, පත්තර එළිදැක්වීමටද, ස්නායු දුර්වලතා පවතින පුද්ගලයන්ට ප්‍රතිකාර සඳහා යොමුවීමටද බුධ හෝරාව ඉගෙනීම් කටයුතුවලටද වඩාත් යහපත්ය.
ගුරු හෝරාව
පුනාවස, විසා, පුවපුටුප නැකැත් උදාව පවතින විට ධනු, මීන, කටක තත්කාල ලග්නයක් උදාවෙත්ම ගුරු දිනයක යෙදෙන ගුරු හෝරාව ඉතා ප්‍රබල සුබඵල ගෙනදෙන කාලයක් වන්නේය. තවද ගුරු හෝරාව සියලුම සුබ කාර්යයන්හි සුදුසු බව ඍෂි මතය වී ඇත. ගුරු දිනක ගුරු හෝරාව තුළ සිදුවන අවාහ විවාහ කටයුතු ඉතා යහපත් වෙයි. ජ්‍යොතිෂ වැනි විෂයන් ඉගෙනීමට, ගුප්ත කටයුතුවලට මුල පිරීමට, වෙහෙර, විහාර, පන්සල්, කෝවිල්වල කටයුතුවලට ගුරු හෝරාව ප්‍රශස්තය. එමෙන්ම අලුතින් බැංකු ගිණුමක් විවෘත කිරීමට, වෛi විiාව ඉගෙනීමට, වාණිජ මධ්‍යස්ථාන විවෘත කිරීමට, ගෙට ගෙවදීමට, නිවාස මුල්ගල තැබීම ඇතුළු නිවෙස්වල කෙරෙනා සියලු කටයුතුවලටද, පුස්තකාල ආරම්භයටද ගුරු හෝරාව තුළ වැදගත්ය. ණය මුදලක් ඉල්ලා ගැනීමට, බැංකු ආශ්‍රිතව කෙරෙන කටයුතු, රක්‍ෂණ ඔප්පු බාර ගැනීමට ඇතුළු සුබ කටයුතුවලටද ගුරු හෝරාව වැදගත්වෙයි.
සිකුරු හෝරාව
සිකුරාදා දිනක සිකුරු හෝරාව තුළ වෘෂභ, තුලා, මීන, තත්කාල ලග්නයක් උදාවන විට එදින හිමි නැකැත සිකුරුගේ නැකැතක් වන බෙරණ, පුවපල්, පුවසල යෙදී තිබේ නම් ඉතා ප්‍රශස්ත වෙයි. සිකුරාදා දිනෙක සිකුරු හෝරාවෙන් කාර්යයක් ආරම්භ කළ විට සිතේ සතුට හා දියුණුව තීව්‍ර වන බව පොදු මතයකි. මංගල කටයුතු සඳහාද, මංගල දැන්වීමක් පළ කිරීමටද, ඡායාරූප ගැනීමටද, මධුසමයට පිටත් වීමටද සිකුරු හෝරාව සුබදායකය. එමෙන්ම කිරිපට්ටි ආරම්භයටද, වහල සෙවිලි කිරීමටද සිකුරු හෝරාව යහපත්ය. ලක්‍ෂ්මී පූජාව තැබීමට, යමෙක් තමාට තනතුර ගැනීමට, වශී කර්මයන් සඳහාද, විසිතුරු භාණ්ඩ අලෙවියටද, මිලට ගැනීමටද සිකුරු හෝරාව ඉතාම යහපත් වෙයි.
ශනි හෝරාව
පුස, අනුර, උත්‍රපුටුප යන නැකැතක් උදාවෙත්ම සෙනසුරාදා දිනයක ශනි හෝරාව බලවත් වෙයි. ශනි හෝරාව බොහෝ විට යොදාගන්නේ ලෝකෝත්තර නොහොත් ආධ්‍යාත්මික සුවය පතා සිදුකරන්නා වූ වැඩකටයුතුවලටයි. විශේෂයෙන්ම පැවිදි කිරීමට ශනි හෝරාව ඉතා යහපත් බව පොතපතෙහි සඳහන් වෙයි. කෘෂිකාර්මික කටයුතුවලටද ශනි හෝරාව සුබදායක වෙයි. තවද යෝගී ව්‍යායාම ආරම්භයට, පතල් වැඩවලට, දරදඬු සහායකයන් මෙල්ල කිරීමට, සිල්සමාදන් වීමට, භාවනා වැඩීමට, ශනි හෝරාව යහපත්ය. මෙසේ බැලූ කල හෝරාවන් තුළ එම ග්‍රහයින්ට හිමි කාර්යයන් කිරීම මත උසස් ප්‍රතිඵල ලබාගත හැකි බව සත්‍යයක් ලෙස පෙනී යයි. ඔබත් ඔබගේ කටයුතු සාර්ථකත්වයට පත්කර ගැනීම සඳහා සුදුසු හෝරාවක් තෝරාගන්න. එයින් ජීවිතය තුළ කරදර පසෙකදා ජයලබාගත හැකිය.
ජ්‍යොතිෂවේදී ජයශ්‍රී නන්දකුමාර