2026 වසරේ උදාවත් සමගම විශ්ව විචාරයේ සුවිශේෂ සන්ධිස්ථානයක් සනිටුහන් කරමින්, ග්රහ ලොව රජු ලෙස හඳුන්වන රවි ග්රහයා තමාට සතුරු රාශියක් වූ ශනි හිමි මකර රාශියට 2026 ජනවාරි මස මැද භාගයේදී සංක්රමණය වේ. ජ්යොතිෂ විද්යාවට අනුව මෙය ‘උත්තරායන’ කාලසීමාවේ ආරම්භයයි. දකුණු දිශාවට ගමන් කළ සූර්යයා මෙතැන් සිට උතුරු දිශාවට ගමන් ඇරඹීම ලොව පුරා රටවල් රැසක සංස්කෘතික හා ආගමික උත්සව සඳහා මුල් වේ. සූර්යයා මකර රාශියට පැමිණීම ඔබේ ලග්නයට අනුව ජීවිතයේ විවිධ ක්ෂේත්ර කෙරෙහි බලපාන්නේ කෙසේදැයි විමසා බලමු.
මේෂ
වෘත්තීය දිවියේ රන් දොරටු විවර වේ
මේෂ ලග්න හිමියන්ගේ කර්මස්ථානය හෙවත් 10 වැන්නට රවි පැමිණීම ඉතා වාසනාවන්ත වේ. රැකියා අපේක්ෂාවෙන් සිටි අයට සුදුසු රැකියාද, රැකියා කරන අයට උසස්වීම්ද හිමිවන කාලයකි. සමාජයේ කැපීපෙනෙන චරිතයක් බවට ඔබ පත්වේ.
වෘෂභ
දෛවයේ ආශීර්වාදය හා දුරබැහැර ගමන්
ඔබේ 9 වැන්නට සිදුවන මෙම සංක්රාන්තිය නිසා පියාගෙන් හෝ පිය පස ඥාතීන්ගෙන් උදව් උපකාර හිමිවේ. උසස් අධ්යාපන කටයුතුවල නිරත අයට ශුභයි. ආගමික නැඹුරුව වැඩිවන අතර, විදේශ ගමන් බලාපොරොත්තු වූ අයට ඒ සඳහා මංපෙත් විවර වේ.
මිථුන
සෞඛ්යය ගැන විමසිලිමත් විය යුතු කාලයක්
අටවැන්නට රවිගේ පැමිණීම නිසා සෞඛ්යය සම්බන්ධයෙන් තරමක් සැලකිලිමත් විය යුතුය. විශේෂයෙන්ම හෘදයාබාධ හෝ උෂ්ණාධික රෝග ඇති අය ප්රවේශම් වන්න. කෙසේ වෙතත්, අනපේක්ෂිත දේපළ ලාභ හෝ රක්ෂණ වන්දි වැනි ලැබීම්වලට ඉඩ පවතී.
කටක
සහකරු හෝ සහකාරිය සමග ඉවසීමෙන් කටයුතු කරන්න
හත්වැන්නට රවි පැමිණීම ඔබේ විවාහ ජීවිතයට හෝ හවුල් ව්යාපාරවලට යම් යම් පීඩනයන් ඇති කළ හැකියි. අනවශ්ය තර්ක විතර්කවලින් වැළකී සිටීම නුවණට හුරුය. පොදු කටයුතුවලදී ඔබේ නායකත්වය කැපීපෙනෙනු ඇත.
සිංහ
සතුරු කරදර මර්දනය වන විජයග්රාහී කාලයක්
ඔබේ ලග්නාධිපති රවි 6 වැන්නට පැමිණීම ඉතා ශුභයි. ඔබව පරාජය කිරීමට උත්සාහ කළ සතුරන් පසුබසිනු ඇත. නීතිමය ගැටලුවලින් නිදහස් වීමට මෙන්ම පවතින රෝගාබාධවලින් සුවය ලැබීමටත් මෙම කාලය මනා පිටිවහලක් වේ.
කන්යා
බුද්ධිමත් තීරණ හා දරුවන්ගේ දියුණුව
පස්වැන්නට රවි පැමිණීම අධ්යාපන ක්ෂේත්රයේ නිරත අයට යහපත්ය. දරුවන්ගේ ජයග්රහණ දැක සතුටු විය හැක. එහෙත් ප්රේම සම්බන්ධතාවලදී දැඩි තීරණ ගැනීමෙන් වළකින්න. නිර්මාණාත්මක කටයුතුවලින් ආදායම් උපයාගත හැකියි.
තුලා
නිවසේ සතුට හා දේපළ ගැටලුවලට විසඳුම්
හතරවැන්නට රවි පැමිණීමෙන් නිවස සහ දේපළ සම්බන්ධ කටයුතුවලට අවධානය යොමු වේ. මවගේ සෞඛ්යය ගැන සැලකිලිමත් වන්න. වාහන මිලදී ගැනීමට හෝ නිවාස අලුත්වැඩියාවට සිත යොමුවන කාලයකි. රැකියා ස්ථානයේ වගකීම් වැඩිවිය හැක.
වෘශ්චික
සහෝදර සබඳතා සහ අභියෝග ජයගැනීම
තුන්වැන්නට රවි පැමිණීම වෘශ්චික ලග්න හිමියන්ට ඉමහත් ශක්තියක් ගෙනදෙයි. ඔබේ සහෝදර සහෝදරියන්ගෙන් උදව් ලැබේ. ලේඛන කලාවේ හෝ සන්නිවේදන ක්ෂේත්රයේ අයට විශේෂ ජයග්රහණ හිමිවේ. කෙටි සංචාර බහුල වන කාලයකි.
ධනු
මූල්ය ස්ථාවරත්වය හා කතාවේ බලය
දෙවැන්නට රවි සංක්රමණය වීමත් සමග ඔබේ ආර්ථිකය ශක්තිමත් කරගැනීමට අවස්ථාව උදා වේ. පවුලේ කටයුතු සඳහා වැඩි කාලයක් වැය කිරීමට සිදුවේ. කතාවෙන් අන් අයව නම්මවා ගැනීමට හැකි වුවත්, ආඩම්බරකාරී ලෙස කතා කිරීමෙන් සතුරන් ඇති කර නොගැනීමට වගබලා ගන්න.
මකර
ආත්ම විශ්වාසය ඉහළට
ඔබේ ලග්නයටම රවි පැමිණීම නිසා මුළු මාසය පුරාම ඔබ කාර්යබහුල චරිතයක් වනු ඇත. සමාජයේ ගෞරවය හා පිළිගැනීම ලැබේ. හිසේ අමාරු වැනි තත්ත්වයන් මතුවිය හැකි බැවින් විවේකයද අවශ්ය වේ. නායකත්වයේ වගකීම් භාරගැනීමට සිදුවේ.
කුම්භ
වියදම් පාලනය කරගත යුතු තීරණාත්මක කාලයක්
12 වැන්නට රවි පැමිණීම නිසා අනවශ්ය වියදම් මෙන්ම රෝහල් ගතවීම්වලටද ඉඩ පවතී. නීතිමය ප්රශ්නවලින් ඈත්ව සිටීම වැදගත්ය. එහෙත් විදේශගත වීමට උත්සාහ කරන අයට මෙම ග්රහ ගමන උපකාරී වනු ඇත.
මීන
අපේක්ෂා ඉටුවන වාසනාවන්ත මාසයක්
11 වැන්නට රවි පැමිණීම මීන ලග්න හිමියන්ට ඉතා ශුභයි. ආදායම් මාර්ග සරු වේ. වැඩිමහල් සහෝදරයන්ගෙන් හෝ උසස් නිලධාරීන්ගෙන් උදව් උපකාර හිමිවේ. ඔබ මෙතෙක් බලාපොරොත්තුව සිටි විශේෂ අරමුණක් ඉටුවන කාලයකි.
