DFCC බැංකුවෙන් අපනයන ආශ්‍රිත ව්‍යාපාර වෙනුවෙන් සහනදායී ණයක්

DFCC බැංකුව මෙරට කුඩා හා මධ්‍යම පරිමාණ අපනයනකරුවන්ට සුවිශේෂී සහනයක් පිරිනැමීමේ අරමුණින් DFCC සහනය’ නමින් විශේෂ සහන ණය ක්‍රමයක් හඳුන්වා දීමට පසුගියදා කටයුතු කළේය.

කොවිඞ්-19 වසංගතය නිසා විශේෂයෙන්ම රටේ කුඩා හා මධ්‍යම පරිමාණ අපනන ආශ්‍රිත ව්‍යාපාර ඇතුළුව සමස්ත ව්‍යාපාර ක්ෂේත්‍රයට ඇතිවී තිබෙන බලපෑම සැලකිල්ලට ගනිමින්, එම ක්ෂේත්‍රය නැවත නගාසිටුවීමට අතදීමක් වශයෙන් මෙම සහන ණය ක්‍රමය හඳුන්වා දීමට DFCC බැංකුව පියවර ගෙන ඇත. රුපියල් බිලියන 2කට ආසන්න වටිනාකමකින් යුත් මෙම නව ණය යෝජනා ක්‍රමය යටතේ අපනයන ක්ෂේත්‍රයේ කුඩා හා මධ්‍යම පරිමාණ ව්‍යවසායකයන්ට තම ව්‍යාපාර නැවත බලගැන්වීම සහ එහි අනාගත දියුණුව උදෙසා සහන ණය පහසුකම් ලබාගත හැකිවේ.

DFCC සහනය’ යටතේ සුදුසුකම් ලබන ව්‍යාපාරවලට 9%ක වාර්ෂික පොලියක් යටතේ, රුපියල් මිලියන 5ත් 25ත් අතර ණය මුදලක් ලබාගත හැක. උපරිම ණය කාලසීමාව වසර 4ක් වන අතර, මෙම ණය ක්‍රමය යටතේ කාලීන ණය සහ ස්ථාවර කාරක ප්‍රාග්ධන ණය ලබාදීමට DFCC බැංකුව පියවර ගනු ඇත.