හෙළයන්ගේ ඉඩම් පිටස්තරයන් අතට
වැවිලි කර්මාන්තයේ දියුණුවත් සමග විවිධාකාරයෙන් සියලුම අංශ දියුණු වෙද්දී මංමාවත් ඉදිවෙද්දී හෙළයන්ට සිදුවූ අනර්ථයද විශාලය.
ඒ අතරින් ප්රධානම අනර්ථයක් වන්නේ චිරාත් කාලයක් පුරාවට තමන් සතුව තිබූ හෙළයන්ගේ ඉඩම් මුඩුබිම් පනත යටතේ රජයට ගෙන එම ඉඩම් පිටරැටියන්ට ඉතා අඩු මුදලකට ලබා දීමය. එමගින් එම ඉඩම්වල මුල් අයිතිකරුවන් වූ හෙළයන්ට තම ඉඩම්වලම කම්කරුවන් ලෙස කටයුතු කරන්නට සිදුවිය.
රජයට ආදායම් වැඩිකර ජනතාව බීමතට
රජයේ ආදායම් වැඩිකර ගැනීම එකම අරමුණු කරගෙන රට පුරා මත්පැන් අලෙවිසල් ඇති කිරීමද මහා දියුණුවත් සමගින්ම මෙරටට ඇදී ආ අයහපත් ලැබීමකි. මත්පැන්ශාලා ඇති වීමත් සමග දවස පුරා වෙහෙස වී වතු රාජකාරියේ නිරත වූ හෙළයන් සවස් කාලයේ මත්පැන් පානයට හුරු විය. එය ක්රමයෙන් ජනප්රිය කාරණාවක් වෙද්දි රටබීමට මෙරට වැඩ කරන ජනතාව බහුතරයක් ඇබ්බැහි වීමෙන් වතු වැඩෙන් උපයාගත් මුදල් යළිත් වක්ර ආකාරයෙන් පිටරැටියන් අතටම ගලා ගියේය.
හේන් හා කුඹුරු වගාව නැති වී වතු වගාව රජවීම
වතු වගාව ප්රචලිත වීමෙන් හේන් සහ කුඹුරු වගාව කෙරෙහි යොමුව සිටි ජනතාව එයින් ගැලවී වතු වගාවට සම්බන්ධ විය. එයින් හේන් වගාව නැත්තට නැති විය. හේන් වගාව නැති වීමත් සමග එම පවුල්වල ඉදිරි පරපුර නිරායාසයෙන්ම වතු වගාවට සම්බන්ධ වීමට මගපෑදීය. මෙමගින් රජයද කුඹුරු සහ හේන් වගාවට ජනතාව උනන්දු නොකර වතු වගා කෙරේම අවධානය යොදවන ලද හෙයින් කලක් යද්දී සාමාන්ය වැසියනට වතු වගාවල කම්කරු රැකියා හැර වෙනත් විකල්පයක් නැති විය.
