කාර්යබහුල ජීවිතයක සිරවී සිටින ඔබට මානසික සතුට වෙනුවෙන් සති අන්තයේ ඔබේ ආදරණීයයන් එක්ක නීල හරිත සුවදායි පරිසරයක ඉතාමත් සැහැල්ලුවෙන් නිදහසේ ඉන්න කැමැති නම් මෙන්න කදිම තැන. කොළඹ දුහුවිලි පිරුණු නගරයට ඉතාමත් සමීපව මෙවැනි තැන් තිබෙන බව දුටුවහොත් ඔබ පුදුම වනු ඇත. මෙම උද්යානය තෙත් බිමක් සංරක්ෂණය කර එහි ජිවීන්ට හා ගහ කොළට හිතකර ලෙස මිනිසා විසින් නිර්මාණය කරන ලද්දකි. මෙවර ‘ඇවිදිමු ලංකා’ අපද එහි සංචාරය කළෙමු.
බත්තරමුල්ල නගරය සහ ශ්රී ජයවර්ධනපුර පාර්ලිමේන්තු සංකීර්ණය පෙනෙන මානයේ පිහිටා ඇති බැද්දගාන තෙත් බිම් උද්යානය ඕනෑම කෙනකුට ඉතා පහසුවෙන් සොයාගැනීමට හැකිය.
නාවල පාර, කොටා පාර හෝ කොල්ලුපිටිය – ශ්රී ජයවර්ධනපුර මාර්ගයේ සිට හෝ රාජගිරිය දෙසට පැමිණෙන ඔබ, මඳ දුරක් දියත උයන දෙසට ගමන් කරන විට ඇතුල්කෝට්ටේ බස් නැවතුමට මඳක් ඉදිරියෙන් ඔබේ දකුණු පසින් හමුවන පැරකුම්බා මාවතෙන් කෝට්ටේ පාරට සම්බන්ධ විය හැකිය. කෝට්ටේ පාරේ කිලෝමීටරයක් පමණ පිටකෝට්ටේ දෙසට පැමිණෙන ඔබට, වම් පසින් හමුවන කොටු බැම්ම මාර්ගයේ නැවතත් කිලෝමීටර භාගයක් පමණ ගිය තැන බැද්දගාන තෙත් බිම් උද්යානය හමුවේ. ඔබ ගමන ආරම්භ කරන ස්ථානයේ සිට යන මඟ ගූගල් සිතියම හරහා බලාගැනීමට හැකියාව තිබෙන්නේ මෙම උද්යානය ඇති ස්ථානය එහි පැහැදිලිව සටහන් කොට ඇති නිසාවෙනි.
ඔබ පෞද්ගලික වාහනයක ගමන් කරන්නේ නම් වාහන නවතා තැබීම ගැන වද වියයුතු නැත. විශාල රථ ගාලක් සේම පොදු වැසිකිළි හා ආහාර ලබා ගැනීමට ගැමි ආරට සැකසූ හෝටලයකින්ද සමන්විත මෙම උද්යානයේ මෝටර් රථයක් නවතා තැබීමට අයකරන්නේ ඉතා සුළු මුදලකි. රථ ගාලේ සිට මීටර පනහක් පමණ ඉදිරියට ගිය විට ඔබට උද්යානයේ පිවිසුම් දොරටුව දැකගත හැකිය. කිසිදු අයකුට ජාතික හැදුනුම්පත, හා අවසර පත්රයක් නොමැතිව ඊට ඇතුළු විය නොහැකිය. ඇතුළු වන විට සහ පිටවන විටද ඔබව ආරක්ෂක අංශ මගින් සෝදිසි කරනු ලැබේ. එය ඔබගේත්, ශාක හා සත්වයන්ගේත් ආරක්ෂාව උදෙසාය. තවද මත්ද්රව්ය හෝ ආහාර වාර්ග රැගෙන ඇතුළු විය නොහැකිය.
හෙක්ටයාර 18ක් පුරා විහිදුණු මේ අසිරිමත් උද්යානය, සුන්දර දියවන්නා ඔයේ ජල තීරය හැඩකරන එක් හරිත මායිමක් වේ. ශ්රී ජයවර්ධනපුර කෝට්ටේ කුරුලු අභයභූමිය ලෙස නම්කර ඇති ප්රදේශය තුළම පිහිටා ඇති, ඒකදේශික පක්ෂීන්ගේ සහ කුඩා සත්ව විශේෂයන්ගේ නිවහනක් ලෙස හැඳින්වෙන මේ බැද්දගාන තෙත් බිම් උද්යානය එවන් කාර්යබහුල නගරයක් තුළ සැඟවුණු ක්ෂේම භූමියකි.
ඉතා අලංකාර, එහෙත් සරල ලෙස තනා ඇති උද්යානය එහි ගමන් කරන්නකුගේ සිත සන්සුන් කරන ඉතා නිහඬ පරිසරයකින් යුතුය. වගුරු බිම් මතින් ලීවලින් තනා ඇති මාර්ග පථයේ ශාඛා විවිධ දිශාවන්ට යොමුකර සකස්කොට ඇති අතර, ඒ එක් එක් මාර්ගයේ ගමන්ගත් විට දැකිය හැකි දෑ පුවරු මඟින් ප්රදර්ශනය කොට ඇත. තවත් තැනක ඒ අවට දැකිය හැකි පක්ෂීන්, සමනල් විශේෂයන්ගේ නම් සහ ඡායාරූප ඇතුළත් පුවරු දැකිය හැකිය. ශාක හා සත්වයන් ගැන විශේෂයෙන් සමනලුන් ගැන අධ්යයනයේ යෙදෙන අයකුට මෙම ස්ථානය මහත් පිටිවහලකි.
උදෑසන හෝ සැන්දෑ යාමයේ උද්යානයට යන ඔබට ඉර නැඟෙනා හැටි වගේම ඉර බැසයන සැන්දෑ අහසේ සුන්දරත්වය විඳගැනීමට නැරඹුම් මැදිරි සහ නැරඹුම් තට්ටු කිහිපයක්ම උද්යානය තුළ තනා ඇත. උද්යානය මධ්යයේ තාරා පොකුණ මැද ඇති නැරඹුම් මැදිරියේ සිට ඈතින් දිස්වන නගරයත්, එයට මායිම්ව ඇති උද්යානයත් ඉතා අලංකාර ලෙස දැකගත හැකිය.
ඊට අමතරව දැකගත හැකි කුරුල්ලන් සහ අනෙකුත් ශාක සහ සතුන් වර්ග බොහෝය. උදෑසන සේම හවස් යාමේ ගං ඉවුරේ සිල්පර කොටන් බැම්මේ වාඩිවී සිටින විට එහි හැඟීම ඉතාමත් සුන්දරය. එය නම් වචනයෙන් විස්තර කළ නොහැකි තරම්ය. උද්යානය පුරා ඇති තුරු ගොමු තුළ සිටින විට සැබැවින්ම අපගේ ජීවිත මෙතරම් සුන්දර දැයි සිතේ.
ඉතින් ඔබත් යන්න ඒ සුන්දර හැඟීම විඳ මොහොතකට හෝ මානසික සතුටක් ලැබ අත්දැකීමක් ලබා ගන්න අප මවුබිමේ සොඳුරු තැන් සොයා.
මතක ඇතිව ඔබ රැගෙන යන පොලිතින් ඇතුළු සියලු දේ නැවත රැගෙන ඒමට කාරුණික වන්න.
ඉදුන් සම්පත් දැරණියගල